އެމެރިކާއިން އިއްޔެ ދިން ހަމަލާތަކާއި އިސްރާއީލުން މިހާރުވެސް ދެމުންދާ ހަމަލާތަކާއި ގުޅިގެން އިރާނަށް އެހީވުމަށް ރަޝިޔާގެ ކިބައިން ރަސްމީކޮށް އެދެފި އެވެ.
ރިޕޯޓުތައް ބުނާގޮތުގައި އީރާނުގެ ޚާރިޖީ ވަޒީރު އައްބާސް އަރަގްޗީ މިހާރު މޮސްކޯއަށް ކުރައްވަމުން ގެންދަވާ ދަތުރުފުޅުގައި އެޤައުމުގެ ސުޕްރީމް ލީޑަރު ޢަލީ ޚާމަނާއީ، ރަޝިޔާގެ ލީޑަރު ލަޑިމިއަރ ޕޫޓިންއަށް ފޮނުއްވި ސިޓީއެއް ވަނީ ރައްދުކޮށްދެއްވާފައި އެވެ.
ރޮއިޓާސްއާ ވާހަކަ ދެއްކި އިރާނުގެ އިސް ބޭފުޅަކު ވިދާޅުވި ގޮތުގައި އެ ސިޓީގައި ޚާމަނާއީ ވަނީ ރަސްމީކޮށް ޕުޓިންގެ އެހީތެރިކަމަށް އެދިފައިވެ އެވެ.
އަރަގްޗީ އާއި ރަޝިޔާގެ ރައީސް ޕުޓީން މީގެ އިރުކޮޅެއް ކުރީން ވަނީ މޮސްކޯގައި ރަސްމީކޮށް ބައްދަލުކުރައްވާފައި އެވެ. އަދި އެބައްދަލުކުރެއްވުމުގައި ޚާމަނާއީގެ ސިޓީ ޕުޓިން އާއި ހަވާލުކޮށްފައިވާއިރު ބައްދަލުވުމުގެ ތެރެއިން ނޫސްވެރިންނަށް މައުލޫމާތު ދެއްވަމުން ރަޝިޔާގެ ރައީސް ޕުޓިން ވަނީ އިރާނުގެ ރައްޔިތުންނަށް އެހީވާން ރަޝިޔާއިން މަސައްކަތް ކުރަމުންދާކަން ހާމަކުރައްވާފައި އެވެ.
އަދި އެމެރިކާއިން އިރާނަށް ދިން ހަމަލާތަކަކީ ބައިނަލަގްވާމީ ގާނޫނުތަކައި މުޅިން ހިލާފު ކަމެއް ކަމަށާއި އެކަމަށް އެމެރިކާއިން ދެއްކޭވެ ހުއްޖަތެއް ނެތް ކަމަށް ޕުޓިން ވިދާޅުވިކަމަށް އަލް ޖަޒީރާ އަރަބިކްއިން ވަނީ ރިޕޯޓުކޮށްފައި އެވެ.
މިހާތަނަށް ރަޝިޔާގެ ފަރާތުން ލިބެމުންދާ އެއްބާރުލުމާ މެދު އިރާނުން ހިތްހަމަނުޖެހޭ ކަމަށާއި، އިޒްރޭލާއި އެމެރިކާއާ ދެކޮޅަށް އީރާނުން ގެންގުޅޭ ސިޔާސަތު އިތުރަށް ހަރުދަނާ ކުރުމަށް ޕޫޓިންގެ އެހީތެރިކަމަށް އެދެމުން އަންނަ ކަމަށް އީރާނުގެ މަސްދަރުތަކުން ބުނެ އެވެ.
ނަމަވެސް މިއަދު ޚާމަނާއީ ފޮނުއްވި ސިޓީގައި ތެހެރާނުން އެދެނީ ކޮން ކަހަލަ އެހީއެއް ކަމެއް އަދި ހާމައެއް ނުކުރެ އެވެ.
ހުޅަނގުގެ ބާރުތަކާއެކު އީރާނުގެ ނިއުކްލިއާ މަޝްވަރާތަކުގައި ބައިވެރިވާ ރަޝިއާއަކީ އދ.ގެ ސަލާމަތީ މަޖިލީހުގެ ވީޓޯ ހޯލްޑިން މެމްބަރެއްގެ އިތުރުން ޓްރަމްޕްގެ ފުރަތަމަ ދައުރުގައި 2018 ވަނަ އަހަރު ޓްރަމްޕް ވަކިވެވަޑައިގެންނެވި ކުރީގެ ނިއުކްލިއާ އެއްބަސްވުމުގައި ސޮއިކޮށްފައިވާ ގައުމެކެވެ.
