އިސްލާމިކް ރިވޮލިއުޝަނަރީ ގާޑް ކޯޕްސްގެ ޤުދުސް ފޯސްގެ ކޮމާންޑަރު އީރާނުގެ ބްރިގޭޑިއާ ޖެނެރަލް އެސްމާއީލް ޤާނީ ދިރިހުއްޓާ ފެނިފައިވަނީ އަންގާރަ ދުވަހު ތެހެރާނުގައި އިސްރާއީލުގެ މައްޗަށް އީރާނުން އަމިއްލައަށް ކަމަށް ބުނާ ކާމިޔާބީ ފާހަގަކުރުމުގެ ތެރެއިން ކަމަށް ލޯކަލް މީޑިއާތަކުން ބުނެއެވެ.
އީރާނުގެ ތަސްނީމް ނިއުސް އެޖެންސީން އާންމުކުރި ވީޑިއޯއަކުން ފެންނަ ގޮތުގައި މި ހަރަކާތުގައި އެއްވެ ތިބި މީހުންގެ ތެރޭގައި ޤާނީ ހިމެނެއެވެ.
”އޮޕަރޭޝަން ޑިވައިން ވިކްޓަރީއާ ގުޅިގެން މިއަދު ބާއްވާ ތެހެރާނުގެ ރައްޔިތުންގެ އެއްވުމުގައި ކޮމާންޑަރ ޤާނީ ބައިވެރިވެވަޑައިގަންނަވަނީ،“ އެކްސްގައި އެ އިދާރާއިން ބުނެފައިވެ އެވެ.
ދައުލަތުން ފައިސާ ދީގެން ހިންގާ ޕްރެސް ޓީވީން ވެސް ވީޑިއޯ ޝާއިއުކޮށް ބުނެފައި ވަނީ ”ޒަޔަނިސްޓް (އިސްރާއީލު) ވެރިކަމުގެ މައްޗަށް ކާމިޔާބީ ފާހަގަ ކުރަމުން ދިޔައިރު ތެހެރާނުގައި އައިއާރުޖީސީގެ ޤުދުސް ފޯސްގެ ކޮމާންޑަރު ބްރިގޭޑިއާ ޖެނެރަލް އެސްމާއީލް ޤާނީއަށް ހޫނު މަރުހަބާއެއް ކިޔާފައިވާ“ ކަމަށެވެ.
މިމަހުގެ ކުރީކޮޅު ނިއުޔޯކް ޓައިމްސްގައި ރިޕޯޓުކޮށްފައިވާ ގޮތުގައި އިސްރާއީލުގެ ހަމަލާތަކުގައި މަރުވި އީރާނުގެ އަސްކަރީ ލީޑަރުންގެ ތެރޭގައި ޤާނީ ހިމެނެއެވެ.
އިސްރާއީލުން ޖޫން 13 ވަނަ ދުވަހުން ފެށިގެން މުޅި އީރާނުގެ ބައެއް ތަންތަނަށް ވައިގެ ހަމަލާތައް ދީފައިވާއިރު، އޭގެ ތެރޭގައި އަސްކަރީ އަދި ނިއުކްލިއާ ފެސިލިޓީތައް ހިމެނެ އެވެ.
އީރާނުން ބަދަލު ހިފުމުގެ މިސައިލް އަދި ޑްރޯން ހަމަލާތައް ދިން އިރު، އެމެރިކާއިން ވަނީ އާދީއްތަ ދުވަހު އީރާނުގެ ތިން ނިއުކްލިއާ ސައިޓަކަށް ބޮން ގޮއްވައިގެން ހަނގުރާމައިގައި ބައިވެރިވެފަ އެވެ.
ސަރަހައްދީ ދެ ބޮޑު ދުޝްމަނުންގެ މެދުގައި 12 ދުވަހުގެ ވައިގެ މަގުން ހަނގުރާމަ ކުރުމަށް ފަހު އެމެރިކާގެ ރައީސް ޑޮނަލްޑް ޓްރަމްޕް ވަނީ އިސްރާއީލާއި އީރާނާ ދެމެދު ހަނގުރާމަ ހުއްޓާލުމަށް ރޭގަނޑެއްގެ ތެރޭގައި އިއުލާންކޮށްފަ އެވެ.
