ކުރިޔަށް އޮތް ހަފްތާގައި އީރާނާއެކީ މަޝްވަރާގެ މޭޒަށް އަރާނެ ކަމަށާއި ނިއުކްލިއާ އެއްބަސްވުން މިހާރު އެހާ މުހިންމު ނޫން ކަމަށް އެމެރިކާއިން ބުނެފިއެވެ.
އެމެރިކާގެ ރައީސް ޑޮނަލްޑް ޓްރަމްޕް ބުނީ އެމެރިކާ އާއި އީރާނުގެ އޮފިޝަލުން އަންނަ ހަފުތާގައި މަޝްވަރާކުރާނެ ކަމަށާއި އެކަމުގެ ސަބަބުން ދެމެހެއްޓެނިވި ސުލްހައަކަށް ވަރަށް ބޮޑަށް އުއްމީދު ކުރާ ކަމަށެވެ.
ޓްރަމްޕް މިހެން ބުނީ އީރާނުގެ ނިއުކްލިއާ ޕްރޮގްރާމް ދެމެހެއްޓުމަށް އެ ގައުމުން ބާރު އަޅާފައިވާ ދުވަސްވަރެއްގައެވެ.
އިސްރާއީލާއި އީރާނާ ދެމެދު ހިނގި ހަނގުރާމަ 12 ދުވަސް ފަހުން ހުއްޓާލުމާއި ގުޅޭ ގޮތުން މަޝްވަރާ ކުރުމުގައި އިސް ދައުރެއް އަދާކުރި ޓްރަމްޕް ވަނީ އިއްޔެ ދަ ހޭގްގައި ބޭއްވި ނޭޓޯ ސަމިޓްގައި ނޫސްވެރިންނާއި ވާހަކަދައްކަމުން އީރާނާ އެކު މަޝްވަރާތައް އަލުން ފެށުމަށް އެހާ ޝައުގުވެރިކަމެއް ނެތް ކަމަށް ބުނެފައެވެ. އަދި އެމެރިކާގެ އަސްކަރީ ފިޔަވަޅުތަކުގެ ސަބަބުން އީރާނުގެ ނިއުކްލިއާ ފެސިލިޓީތަކަށް ވަރަށް ބޮޑެތި ގެއްލުންތަކެއް ލިބިފައިވާ ކަމަށާއި މިހާރު އެ ނިއުކްލިއާ ފެސިލިޓީތަކުގެ ބާރު ކެނޑިފައިވާ ކަމަށް ޓްރަމްޕް ވަނީ ބުނެފައެވެ. އެހެންކަމުން މިހާރު ނިއުކްލިއާ އެއްބަސްވުމަކީ އެހާ ބޭނުންތެރި ކަމެއް ނޫންކަން ޓްރަމްޕް ވަނީ ފާހަގަކޮށްފައެވެ.
ނަމަވެސް އީރާނުން ވަނީ ނިއުކްލިއާ ޕްރޮގްރާމް ހުއްޓާނުލާނެ ކަމަށް ބުނެފައެވެ. އަދި އިންޓަނޭޝަނަލް އެޓޮމިކް އެނާޖީ އެޖެންސީއާ އެކު އޮންނަ ގުޅުން ހުއްޓާލުމުގެ މަސައްކަތް އަވަސް ކުރުމަށް އިރާނުގެ ގާނޫނު ހަދާ މަޖިލީހުންވެސް ވަނީ ފާސްކޮށްފައެވެ.
އަންނަ ހަފުތާގައި އެއްވެސް މަޝްވަރާއެއް އެމެރިކާއެެކު ބާއްވާނެކަން އީރާނުން ކަށަވަރުކޮށްދީފައި ނުވާއިރު، އީރާނުގެ އޮފިޝަލަކު ވަނީ ހަފުތާ ބަންދުގައި އީރާނުގެ ނިއުކްލިއާ މަރުކަޒުތަކަށް ދިން ހަމަލާއާ ގުޅިގެން އެމެރިކާއަށް އިތުބާރު ކުރެވޭނެ ކަމާ މެދު ޝައްކު އުފައްދައިފައެވެ.
ޔަހޫދީން އީރާނަށް ހަމަލާ ދެމުން ދަނިކޮށް، ޖޫން މަހުގެ 22ވަނަ ދުވަހު އެމެރިކާއިން ވެސް ވަނީ ހަނގުރާމައިގެ ތެރެއަށް ވަދެ، އީރާނުގެ މައި ނިއުކްލިޔާ މަރުކަތުތަކަށް ބޮން އަޅައިފައެވެ. އެ ގޮތުން އިސްފަހާން، ފޫރްދޫ އަދި ނަޠާންޒުގައި ހުންނަ ނިއުކްލިޔާ މަރުކަޒުތަކަށް ހަމަލާ ދީފައިވެއެވެ. އޭގެ ބަދަލުގައި އީރާނުން ވަނީ ގަތަރުގައި ހުންނަ އެމެރިކާގެ އެންމެ ބޮޑު އަސްކަރީ މަރުކަޒަށް ހަމަލާދީފައެވެ. އޭގެ ފަހުން ދެ ފަރާތުން ވަނީ ހަމަލާ ބަދަލުކުރުން ހުއްޓައިލުމަށް އެއްބަސްވެފައެވެ.
