ޓީމޫ ފަދަ އޮންލައިން ވެބްސައިޓްތަކުން ގަންނަ އެއްޗިއްސަށް ބޭންކް އޮފް މޯލްޑިވްސް (ބީއެމްއެލް) އިން %30 ނަގާ ގޮތަށް، އެ ބޭންކް އިން ގެނައި ބަދަލުތަކަށް ބައެއް ތަޖުރިބާކާރުން ތާއިދު ކޮށްފިއެވެ.
ބީއެމްއެލް އިން ޑެބިޓް ކާޑްތަކުން ރާއްޖެ އިން ބޭރުގެ މުދަލާއި ހިދުމަތަށް ފައިސާ ދެއްކޭ ލިމިޓް 250 ޑޮލަރުން، 500 ޑޮލަރަށް ވަނީ ބޮޑުކޮށްފައެވެ. އަދި ޓީމޫ، ޝެއިން، އަލިބާބާ، އަލި އެކްސްޕްރެސް، ލަޒާޑާ އަދި އީބޭއަށް ބީއެމްއެލް ޑެބިޓް ކާޑު މެދެވެރިކޮށް ފައިސާ ދައްކާއިރު %30 އާ ހަމައަށް ފީއެއް ނަގަން ވަނީ ނިންމައިފައެވެ.
އެ ބޭންކް ވިދާޅުވުވެފައިވާގޮތުގައި ކާޑުތަކުން ރާއްޖޭން ޑޮލަރު އެންމެ ގިނައިން ބޭރުކުރެވޭ އެއްކަމަކީ އިންޓަނެޓް މެދުވެރިކޮށް ބައެއް ފަރާތްތަކުން މަދު ސައިޓްތަކުން ވިޔަފާރީގެ ބޭނުމަށް މުދާ ގެނައުމަށް ފައިސާ ދެއްކުމެވެ.
މި ބަދަލާއެކު ބައެއް ތަޖުރިބާކާރުން ދަނީ މިކަމަށް ތާއިދު ކުރައްވަމުންނެވެ.
މިގޮތުން މި ބަދަލާއެކު ރިޔަލްޓީ ކޮންސަލްޓެންސީ މޯލްޑިވިސްގެ ސީއީއޯ އަދި މާލީ ހޭލުންތެރިކަން އިތުރު ކުރުމަށް މަސައްކަތް ކުރައްވާ އަހްމަދު ރިޒާ ފޭސްބުކަށް ދޫކޮށްލެވީ ސުވާލެކެވެ.
’ހަމަ އެންމެ ސުވާލެއް އަހާލާނަން އަމިއްލަ އެކައުންޓުގައި މި ހުންނަނީ ރުފިޔާ. ރާއްޖޭން ބޭރަށް ކުރާ ޓްރާންސެކްޝަންތަކަށް މި ކަނޑަނީ މި ރުފިޔާ އެކައުންޓުން. އެ ޓްރާންސެކްޝަނަށް ބޭންކުން ޑޯލަރު ދޭންޖެހޭނެ ކަމަށް އެކްސްޕެކްޓު ކުރެވިދާނެތަ؟ މިކަން ހަމަޖެހެނީ ކިހިނެއް؟ މިކަން ހަމަ އެއްވެސް ވަރަކަށް ނުވިސްނެނީތަ.“. އޭނާގެ ޕޯސްޓްގައި ވެއެވެ.
ކުރީގެ އުއްތަމަ ފަނޑިޔާރު އަހްމަދު ފާއިޒް ހުސައިން ވިދާޅުވީ، ބީއެމްއެލް އިން ކާޑު ޕޮލިސީއަށް ގެނައި ބަދަލުގެ ސަބަބުން ކުދި ވިޔަފާރިތައް ރަނގަޅުވުން އެކަށީގެންވާ ކަމަށެވެ.
”ކޮންމެހެން ބޭނުންވާ ކަންކަމަށް ނޫނީ ޑޮލަރު ހޭދަނުކުރުމަކީ އިގްތިސާދަށް ލާބަ ކުރާނެ ކަމެކެވެ. ފެނުނު މަންޒަރެއް ދަންނަވާލަންތޯއެވެ. ޕިކްޕޯސްޓަކުން ދެ ބާލީސް ނަގައިގެން ދިޔަތަން ދުށީމެވެ. އެއީ ޑޮލަރު އިސްރާފު ކުރުން ނޫންތޯއެވެ؟.“. ފާއިޒު ވިދާޅުވިއެވެ.
ބީއެމްއެލް އިން ވިދާޅުވިގޮތުގައި، ކަސްޓަމަރުން ރާއްޖޭން ބޭރުން ކުރާ ވިޔަފާރިއަށް 45 މިލިއަން ޑޮލަރު މަހެއްގެ މައްޗަށް ހަރަދު ކުރާ ކަމަށެވެ.
ބީއެމްއެލް އިން މިހާތަނަށް 300،000 އަށްވުރެ ގިނަ ކަސްޓަމަރުންނަށް ޑެމިޓް ކާޑު ދޫކޮށްފާއިވާކަން ފާހަގަކޮށްލަން ޖެހެއެވެ.
