ވެލާނާ އެއަރޕޯޓުގެ އައު ޓާމިނަލް ހުޅުވުމަށް ކުރިއަށްގެންދާ ހަރަކާތްތަކުގެ ތެރެއިން ހަވާ އެރުވުމާ ގުޅޭގޮތުން ޔަހޫދީންނަށް ވާގިވެރިވާ އެއްވެސް ކުންފުންޏަކާ މުޢާމަލާތްކޮށްފައިނުވާނެ ކަމަށް އެމްއޭސީއެލްއިން ބުނެފިއެވެ.
ވެލާނާ އެއަރޕޯޓުގެ އައު ޓާމިނަލް ހުޅުވުމަށް އެ އެއަރޕޯޓު ހިންގާ އެމްއޭސީއެލްއިން ގިނަ ތައްޔާރީތަކެއް ވަމުން އަންނައިރު، ހަވާއެރުވުމުގެ ކަންކަން ކުރިއަށް ގެންދަން ހަވާލުކޮށްފައިވަނީ ޔަހޫދީ ދައުލަތައް ވާގިވެރިވާ ކުންފުންޏަކާއި ކަމަށް ބުނެ ބައެއް މީޑިއާތަކުން ވަނީ ރިޕޯޓްކޮށްފައެވެ.
މިކަމާ ގުޅޭގޮތުން އެމްއޭސީއެލްގެ ޑެޕިއުޓީ މެނޭޖިން ޑިރެކްޓަރ މުޙައްމަދު ލަމްޢާން ވިދާޅުވީ، އިސްރާއީލަށް ވާގިވެރިވާ އެއްވެސް ކުންފުންޏަކާއި އެކުންފުނިން މުޢާމަލާތް ކުރަމުން ނުދާކަމަށާއި އެފަދަ މުޢާމަލާތެއްވެސް ކޮށްފައިނުވާނެ ކަމަށެވެ. ލަމްޢާން ވިދާޅުވީ އައު ޓާމިނަލް ހުޅުވުމަށް ކުރިއަށް ގެންދާ ހަރަކާތުގެ ހަވާއެރުވުމުގެ ކަންކަން ކުރިއަށްދާނެ ކަމަށެވެ. އަދި އެކަން ކުރާނީ މިފަދަ ކަންކަން ކުރުމުގައި ދުނިޔޭގައިވެސް ފާހަގަކޮށްލެވޭ ކުންފުންޏަކުން ކަމަށާއި އެ ހަރަކާތް ކުރިއަށްދާނީ އެމްއެންޑީއެފްއާއި ގުޅިގެންކަމަށް އޭނާ ފާހަގަކުރެއްވިއެވެ.
މިމަހުގެ 26 ވަނަ ދުވަހު އައު ޓާމިނަލް ހުޅުވާއިރު، މިހާރު ކުރިއަށްދަނީ އެ ޓާމިނަލް ހުޅުވުމުގެ ކުރިން ވާންޖެހޭ އެންމެ ފަހުގެ ތައްޔާރީތައް ކަމަށް އެމްއޭސީއެލްއިން ވިދާޅުވިއެވެ.
