ސަރުކާރު ހިންގަންވީ ގޮތް އެމްޑީޕީގެ ޗެއާޕާސަން ފައްޔާޒު އިސްމާއިލް ކިޔައިދިނުމުން ވަރަށް ހިނިއަންނަ ކަމަށް ބާރަށު ދާއިރާގެ މެންބަރު އަދި ޕީއެންސީގެ ނައިބު ރައީސް އިބްރާހީމް ޝުޖާއު ވިދާޅުވެއްޖެއެވެ.
ޝުޖާއު މިހެން ވިދާޅުވީ ”ރިބޫޓް“ ގެ ނަމުގައި ކުރިއަށްގެންދާ ޕޮޑްކާސްޓެއްގައި ފައްޔާޒު އިސްމާއިލް ދައްކަވާފައިވާ ވާހަކަތަކާ ގުޅިގެންނެވެ.
ސަރުކާރުތައް ހިންގަންވީ ނިޒާމާއި ކޮރަޕްޝަން ކުޑަކުރުމަށް ގެންގުޅޭގޮތުން ފައްޔާޒު ދެއްކެވި މިވާހަކަތަކާއި ގުޅުވައި އެކްސް ގައި ކުރެއްވި ޕޯސްޓެއްގައި ޝުޖާއު ފާހަގަކުރެއްވި ގޮތުގައި، އެމްޑީޕީއަށް ރައްޔިތުންގެ މަޖިލީހުގެ ސުޕަ މެޖޯރިޓީއާއެކު ވެރިކަން ލިބުނު ނަމަވެސް، އެ ޕާޓީން ކުރި މައިގަނޑު ކަމަކީ ދައުލަތުގެ ދަރަނި އިތުރުކުރުން ކަމަށާއި، ސަރުކާރު ހިއްސާވާ ކުންފުނިތައް ”ފުނޑާލި“ ކަމަށެވެ.
”ސަރުކާރު ހިންގާނެގޮތުގެ މޮޅު ގޮތް އެމްޑީޕީގެ ޗެއަރޕާސަން ފައްޔާޒު ކިޔާދިނީމާ އަޅުގަނޑުމެންގާތަށް ވަރަށް ހިނި އާދޭ! މަޖިލީހުގެ ސުޕަރ މެޖޯރިޓީއާއެކު ވެރިކަން ލިބުމުން ބޮޑު ކުރީ ދަރަނި. ފުނޑާލީ އެސްއޯއީ ތައް. ހިންގާލި މުޑުދާރު ވެރިކަމުގެ ސަބަބުން ޤައުމު އޮތީ ބަނގުރޫޓުގެ ތުންފަތްމަތީ! މޮޔަ ނުގޮވާ!“ ޝުޖާއު ވިދާޅުވިއެވެ.
