މިދިޔަ އޮގަސްޓު މަހު ވޭޕްއާއި ގުޅޭ އެކިއެކި މައްސަލަތަކުގައި 150،000 ރުފިޔާގެ ޖޫރިމަނާ ކޮށްފައިވާ ކަމަށް ފުލުހުންގެ ތަފާސްހިސާބުތަކުން ދައްކައިފިއެވެ.
ފުލުހުންގެ ތަފާސްހިސާބުތައް ދައްކާ ގޮތުން އޮގަސްޓް މަހުގެ އެއް ވަނަ ދުވަހުން ފެށިގެން 31 ވަނަ ދުވަހުގެ ނިޔަލަށް، ވޭޕާއި ގުޅޭ އެކި މައްސަލަތަކުގައި 30 މީހަކު ޖޫރިމަނާކޮށްފައިވެއެވެ. އަދި މި ޖޫރިމަނާތަކުގެ އަދަދު ޖުމްލަ 150،000 ރުފިޔާއަށް އަރައެވެ.
ފުލުހުން މައުލޫމާތު ދީފައިވާ ގޮތުގައި، އޮގަސްޓު މަހު ވޭޕް ބޭނުންކުރުމުގެ މައްސަލައިގައި 14 މީހަކު 85,000 ރުފިޔާއިން ޖޫރިމަނާކޮށްފައިވާއިރު، ވޭޕް ގެންގުޅުމުގެ މައްސަލައިގައި 16 މީހަކު 65,000 ރުފިޔާއިން ޖޫރިމަނާކޮށްފައިވެއެވެ.
ރާއްޖޭގައި ވޭޕް ބޭނުންކުރުމާއި، ވިއްކުމާއި، ހިލޭ ބެހުން މަނާކުރާ ގާނޫނަށް އަމަލުކުރަން ފެށީ 2024 ވަނަ އަހަރުގެ ޑިސެންބަރު 15 ވަނަ ދުވަހުން ފެށިގެންނެވެ. މި ގާނޫނުގެ ދަށުން ރާއްޖެއަށް ވޭޕްގެ ބާވަތްތައް އެތެރެކުރުމުން 50,000 ރުފިޔާއިން ޖޫރިމަނާކުރެވޭނެއެވެ. އަދި އެތެރެކުރާ ކޮންމެ ވޭޕަކަށް 10,000 ރުފިޔާގެ މަގުން އިތުރު ޖޫރިމަނާއެއް ކުރެވޭނެއެވެ. އަދި ވޭޕް ކުރުމަށް ބޭނުންކުރާ އާލާތެއް ކުޑަކުއްޖަކަށް ވިއްކައިފިނަމަ ނުވަތަ ހިލޭ ދީފިނަމަ، 50,000 ރުފިޔާގެ އިތުރު ޖޫރިމަނާއެއް ކުރެވޭނެއެވެ.
މި ގާނޫނު ތަންފީޒުކުރުމުގެ ސަބަބުން ވޭޕް ބޭނުންކުރުން މަދުވެ އާންމު ސައްހަތަށް ކުރާ ނޭދެވޭ އަސަރު ކުޑަވާނެކަމަށް ސަރުކާރުން ގަބޫލު ކުރެއެވެ.
ފުލުހުން ވަނީ ގާނޫނާ ހިލާފުވާ ފަރާތްތަކަށް ވާރު ޕޭގެ ޕޭމަންޓް ލިންކެއް މެދުވެރިކޮށް ޖޫރިމަނާ ދެއްކޭނެ އިންތިޒާމު ހަމަޖައްސާފައެވެ. އަދި ދުންފަތް ކޮންޓްރޯލްކުރުމާބެހޭ ގާނޫނަށް ގެނައި އިސްލާހަށް އާންމުން ފުރިހަމައަށް އަމަލުކުރުމަށާއި، ގާނޫނު ތަންފީޒުކުރުމުގައި ފުލުހުންނަށް އެއްބާރުލުން ދިނުމަށް ފުލުހުން އަންނަނީ އިލްތިމާސް ކުރަމުންނެވެ.
