”ހަވާދުލީބިސް“ މިއީ ރަމަޞާން މަސްތަކުގައި އަދި މިނޫންވެސް ދުވަސްތަކުގައި ކެއުމަށް ދިވެހިންގެ ތެރޭގައި މަޤްބޫލް ބާވަތަކެެވެ. ޒަމާނުއްސުރެ ހަވާދުލީބިސް ތައްޔާރުކުރަމުން އައީ ދިވެހި އުފެއްދުމެއްކަމަށްވާ ދެވިހުނި ނުވަތަ ހަވާދުގެ އެކިކަހަލަ ބާވަތްތައް ބޭނުންކޮށްގެނެވެ.
ނަމަވެސް ޒަމާނާއެއްގޮތަށް ހެދިކާއަށް އައި ބަދަލު ތަކުގެ ތެރޭގައި އެންމެ ބޮޑު ބަދަލެއް އައިސްފައިވަނީ ހަވާދުލީ ބިހަށެވެ. ހަވާދުގެ ބަދަލުގައި ތަފާތު ވައްތަރުގެ ސޯސް ބިހުގައި ލާފަހުރުމުން މިބޮޑުބަދަލު ވަނީ ގިނަބަޔަކަށް ކަމުގޮސްފައެވެ. ޚާއްސަކޮށް ޒުވާން ކުދިންގެ މެދުގައި މަޤްބޫލްވެފައިވަނީ ހަވާދުގެ ބަދަލުގައި ބިހުގައި ސޯސް ލުމުންނެވެ.
މިދެބާވަތަކީވެސް ގިނަބައެއްގެ މަގުބޫލު އެއްޗަކަށްވާއިރު ހަވާދުލީބިހުގެ ނަމުގެ ކުރިއަށް ހަވާދު އަންނައިރު ބިހުގައި ސޯސްލުމުން އެކަން ގިނަބަޔަކަށް ވަނީ ފާހަގަކޮށްފައެެވެ. ޓޮމާޓޯ ޕޭސްޓް އަޅައިގެން ހަވާދުލީ ބިސް ހަދާފައި، އެއަށް ހަވާދުލީ ބިހޭ ނުކިޔާށޭ ވަރަށް ގިނަ މީހުން ބުނެ އެވެ. ހަވާދުލީބިހަށް ވާނީ ހަވާދު އަޅައިގެން ހެދީމަކަމަށްވެސް މީހުން ވަނީ ބުނެފައެވެ.
ކޮންމެގޮތެއްވިޔަސް ދިވެހީންނާއި ހަވާދުލީބިހާއި އޮންނަ ގުޅުން ދުވަހެއް ދުވަހަކަށް އަންނަނީ ވަރުގަދަވަމުންނެވެ. ދުވަހަކަށްވުރެން ދުވަހެއް ހަވާދުލީބިހުގެ އެކި ރެސިޕީތައް ތަފާތު ގޮތްގޮތަށް އަންނަނީ ތައްޔާރު ކުރަމުންނެވެ. ރިހާކުރުރޅ ހަވާދުލީބިހާއި، ޓޮމާޓޯޕޭސްޓްލީ ބިސް، ޓޮމާޓޯ ސޯސް އަދި ލޮނުމިރުސް ލީ ބިސްވެސް މިއީ މިހާރު ފެންނަމުން އަންނަ ބާވަތްތަކެވެ.
