ކުޅުދުއްފުށި ސިޓީ ކައުންސިލާއި ޒިގްޒެގް ފޯ ޔޫތް ލިންކޭޖް އާއި ގުޅިގެން ސިޓީގައި ތަރައްޤީކުރި ވިއުވިންގ ޕްލެޓްފޯމް ހުޅުވައިފިއެވެ.
މި ޕްލެޓްފޯމް ހުޅުވުމަށް ބޭއްވި ރަސްމިއްޔާތުގައި، މި ޕްލެޓްފޯމް ރަސްމީކޮށް ހުޅުވައިދެއްވާފައިވަނީ، ރަސްމިއްޔާތުގެ ޝަރަފްވެރި މެހެމާން ކުޅުދުއްފުށި ސިޓީގެ މޭޔަރ މުޙައްމަދު އާޠިފް އާއި ޒިގްޒެގް ފޯ ޔޫތް ލިންކޭޖް ގެ ޗެއަރމަން ސައުދުالله ނަޢީމް އަދި ޔޫ.އެން.ޑީ.ޕީ ބެންކޮކް ރީޖަނަލް ގަވަރނަންސް އެޑްވައިޒަރ، މިސް ޑަޔާނާ ޓޯރެސް އެވެ.
މިގޮތުން މި މަޝްރޫޢުގެ ތެރެއިން ޔޫ.އެން.ޑީ.ޕީގެ ޖެފްސް ސްމޯލް ގްރާންޓްސް ޕްރޮގްރާމުގެ ފަންޑިންގގެ ދަށުން ޒިގްޒެގުން ވަނީ ޕްލެޓްފޯމްގެ ޑިޒައިން އަދި ބީ.އޯ.ކިއު ހެދުމުގެ އިތުރުން ޕްލެޓްފޯމް ނިންމުމަށް ބޭނުންވާ ތަކެތި ފޯރުކޮށްދީފައެވެ. މީގެ ތެރޭގައި ޑަބްލިޔު.ޕީ.ސީ ޑެކިންގ މެޓީރިއަލްސް، ރެއިލިންގްސް އަދި ހިޔާގަނޑުގެ ސްޓްރަކްޗަރއަށް ބޭނުންވާ ތަކެތި ހިމެނެއެވެ. މި ކަންކަމަށް ވަނީ ގާތްގަނޑަކަށް 1 މިލިއަން ރުފިޔާ ޚަރަދުވެފައެވެ.
ކުޅުދުއްފުށީ ސިޓީ ކައުންސިލުން މި ޕްލެޓްފޯމުގެ މަސައްކަތް ވޭވްލެންތް ޕްރައިވެޓްް ލިމިޓެޑްއާ ހަވާލުކޮށްފައިވާއިރު އެ ކުންފުންޏާއި ހަވާލުކުރެވުނު މަސައްކަތްތަކުގެ ތެރޭގައި ޕްލެޓްފޯމުގެ ކޮންކްރީޓް މަސައްކަތާއި، ޑެކިންގ އަދި ރެއިލިންގ ހަރުކުރުމުގެ މަސައްކަތާއި ހިޔާގަނޑު ހެދުމުގެ މަސައްކަތް ހިމެނެއެވެ. މީގެ އިތުރުން ޕްލެޓްފޯމުގެ އެއްގަމުގައި ވޯކްވޭ އަދި ކުޅީގެ ނަންބޯޑު ހެދުމާއި، މުޅި މަޝްރޫޢުގެ ލައިޓިންގގެ މަސައްކަތްތައް ހިމެނެއެވެ.
ކުޅުދުއްފުށި ސިޓީ ކައުންސިލުން މި މަޝްރޫޢުއަށް މުޅި ޖުމްލަ 2.6 މިލިއަން ރުފިޔާ ވަނީ ޚަރަދުކޮށްފައެވެ. މި ރަސްމިއްޔާތުގައި ކުޅުދުއްފުށި ސިޓީގެ މޭޔަރ މުޙައްމަދު އާޠިފް ވިދާޅުވެފައިވަނީ، ކުޅުދުއްފުށީ މަށި ކުޅި އަކީ ރާއްޖޭގައި ހުރި ކުޅިތަކުގެ ތެރެއިން ވަރަށް ތަފާތު ކުޅިއެއް ކަމަށެވެ. އަދި މިހާ ބޮޑު ހުދު މަށީގެ ސްޓޮކެއް ހުރި ކުޅި އަކީ ކުޅުދުއްފުށީ ކުޅިކަން ފާހަގަކުރަމުން މޭޔަރ ވިދާޅުވެފައިވަނީ، މިފަދަ ތަންތަން ބޭނުންހިފޭނެ ގޮތަކަށް ތަރައްޤީވުމަށް އުންމީދު ކުރާކަމަށެވެ.
”ކުޅުދުއްފުށީ ކުޅި އަކީ ނަމޫނާ މެނޭޖްމަންޓް ޕްލޭނަކާއި އެކީގައި ރައްޔިތުނަންނަށް ގިނަ މަންފާތަކެއް ލިބިދާނެހެން އަދި ރަށުގެ އިޤުދިޞާދަށްވެސް ކޮންޓްރިބިއުޓް ކުރާނެ ގޮތަކަށް ތަރައްޤީވެގެން ދާނެ ތަނަކަށްވެގެދިއުން. މިއަދުގެ ސިޓީ ކައުންސިލުގެ އަމާޒަކީވެސްކީ އެއީ އުންމީދަކީވެސް އެއީ، އަދި ވިޝަންއަކީ ވެސް އެއީ.“
