ރައްޔިތުންގެ މަޖިލީހަށް ހުށަހަޅާފައިވާ މީޑިއާ ބިލަކީ ޤާނޫނު އަސާސީއާ އެއްވެސް ތަޢާރުޒުވުމެއް ނެތް، އަދި އެއްވެސް އަސާސީ ޙައްޤަކަށް އުނިކަމެއް ނާންނާނެ ބިލެއް ކަމަށް ރައްޔިތުންގެ މަޖިލީހުގެ ކައުންސެލް ޖެނެރަލް އަލްއުސްތާޛާ ފާތިމަތު ފިލްޒާ ވިދާޅުވެއްޖެއެވެ.
މިއަދު ބޭއްވުނު ކޮމެޓީ ބައްދަލުވުމުގައި، ފިލްޒާ ހުށަހެޅުއްވި އިސްލާހުތަކާއެކު މިކަން ފާހަގަކުރެއްވިއިރު، ސަރުކާރުން ހުށަހެޅި 14 އިސްލާހުވެސް ވަނީ ބިލުގައި ހިމަނާފައެވެ.
މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަން ބިލަށް ކައުންސެލް ޖެނެރަލްގެ އިތުރު ހުށަހެޅުންތަކެއް ހުރުމާއެކު، އެ ހުށަހެޅުންތައް ހިމަނައި ބިލް އަލުން ފާސްކުރުމަށް ކޮމެޓީން ނިންމާފައިވެއެވެ. މި އިސްލާހުތަކުގެ ތެރޭގައި ކޮމިޝަނުގެ މަސްއޫލިއްޔަތުތަކުގެ ދަށުން އިސްލާމްދީނާ ޚިލާފު، އަޚްލާޤީ ގޮތުން ދަށު ދަރަޖައިގެ، އަދި ފާޙިޝް ޢަމަލުތަކަށް ހިތްވަރުދޭ ވާހަކަތައް ފެތުރުން ހުއްޓުވުމަށް މަސައްކަތް ކުރުން ހިމެނެއެވެ.
އަދި ކޮމިޝަނުގެ މެންބަރުން ކަނޑައެޅުމާއި ވަކިކުރުމުގައްޔާއި، ކޮމިޝަނުގެ ރައީސް އައްޔަންކުރުމުގައި ރައީސުލްޖުމްހޫރިއްޔާގެ އެއްވެސް ދައުރެއް ނުހިމެނޭ ގޮތަށް މާއްދާތައް ވަނީ އިސްލާހުކޮށްފައެވެ. މެންބަރުންގެ ޝަރުތުތަކުގެ ތެރޭގައި ސިޔާސީ ޕާޓީއެއްގެ މެންބަރެއް ކަމުގައި ނުވުން ވެސް ހިމަނާފައިވެއެވެ.
މީޑިއާގެ ސުލޫކީ ހަމަތަކުގެ ތެރޭގައި ތެދު މަޢުލޫމާތު ހާމަކުރުމުގެ އިތުރުން، އިންސާފުވެރިކަމާއެކު ހާމަކަން ބޮޑު ގޮތެއްގައި ޚަބަރާއި މަޢުލޫމާތު ގެނެސްދިނުން ހިމެނެއެވެ. މީގެ އިތުރުން، އަމިއްލަ މައުލޫމާތު ހާމަކުރުމުގެ މިންގަނޑުތަކަށް ވެސް މުހިންމު އިސްލާހުތަކެއް ވަނީ ގެނެސްފައެވެ.
