މުޅި ރާއްޖެ ޑިޖިޓަލައިޒްކުރަން ސަރުކާރުން ހިންގާ ”މޯލްޑިވްސް 2.0“ މަޝްރޫއަށް އަންނަ އަހަރުގެ ބަޖެޓްގައި އިސްކަންދެއްވާނެ ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ،
ވ.އަތޮޅަށާއި މ.އަތޮޅަށް ކުރައްވަމުން ގެންދަވާ ދަތުރުފުޅުގައި މުލަކު ރައްޔިތުންނާ ބައްދަލުކުރައްވައި ރައީސް މިރޭ ވިދާޅުވީ ތަރައްގީވެފައިވާ ގައުމުތަކުގެ ލިސްޓްގައި ރާއްޖެ ހިމެނުމަށް ޓަކައި ކޮންމެ ރަށެއް ތަރައްގީވާން ޖެހޭނެ ކަމަށެވެ. ތަރައްގީ ވާންޖެހޭނީ ހުރިހާ ދާއިރާއަކުން ކަމަށް ވެސް އެ މަނިކުފާނު ވިދާޅުވި އެވެ.
”އެކަން ހާސިލުވުމާ އެކީގައި މިހާރު މި އޮތް، ބަވަނަވެފައި އޮތް ދުނިޔޭގެ ތަރައްގީގެ ހަގީގަތްތަކާ ގުޅިލާމެހިގެން އެންމެ ކުރީގައި ސަފުގައި ތިބެގެން [ކުރިއަށް]ދާން ޖެހޭނީ. އެހެންވީމާ މޯލްޑިވްސް 2.0 ގެ ނަމުގައި ފަށައިގެން ޑިޖިޓަލައިޒް ކުރުމުގެ ޕްރޮގްރާމެއް ވެސް މުޅި ރާއްޖޭގައި މި ގެންދަނީ. ކުރިއަށް އޮތް ދުވަސްތަކުގައި އަދި މި އަންނަ އަހަރު އަޅުގަނޑުމެން ބަޖެޓު ހަދާ އިރުގައި ވަރަށް އިސްކަމެއް އެބަ ދެން މި ޕްރޮގްރާމް ކުރިއަށް ގެންދަން ވެސް،“ ރައީސް ވިދާޅުވި އެވެ.
އެ މަނިކުފާނު ވިދާޅުވި ގޮތުގައި ޑިޖިޓަލައިޒްކުރުމުގެ އެއް ބޭނުމަކީ ރައްޔިތުންނަށް ދޭ ހިދުމަތްތައް ދެފުށް ފެންނަ ގޮތަކަށް ކުރިއަށް ގެންދެވޭނެކަން ކަށަވަރުކުރުމެވެ. ހިދުމަތްދެނީ އެންމެ ހަލުއި މިނުގައި ކަން ކަށަވަރުކުރުމާ އެކު އެފިޝަންޓްކޮށް، ކޮރަޕްޝަން ހުއްޓުވުމުގައި ޑިޖިޓަލައިޒް ކުރުމުގެ ބޭނުމެއްގެ ގޮތުގައި ރައީސް ފާހަގަކުރެއްވި އެވެ.
”މީގެ އެންމެ ބޮޑު ނަތީޖާއަކަށް ވާނީ ކޮރަޕްޝަން ނެތިގެން ދިއުން،“ އެ މަނިކުފާނު ވިދާޅުވި އެވެ.
އޮޓޮމޭޓްކުރުމުގެ ބަދަލުގައި އިންސާނުން އަމިއްލައަށް ހުރިހާ ކަމެއް ކުރާ ގޮތަށް އޮތުމުން ކޮރަޕްޝަނަށް މަގުފަހިވާ ކަމަށް ވެސް އެ މަނިކުފާނު ވިދާޅުވި އެވެ. ސަރުކާރުގެ ފެންވަރުގައި އަދި ޕްރައިވެޓް ސެކްޓާ ގައި ވެސް އެކަން ހިނގަނީ އެގޮތަށް ކަމަށް ވެސް ރައީސް ވިދާޅުވި އެވެ.
