ދުނިޔޭގެ ޤައުމުތަކަސް ބަލާށެވެ! ހަނގުރާމަކުރަނީ މަދު ޤައުމުތަކަކުންނެވެ. އެކަމަކު ހުރިހާ ޤައުމުތަކަކުންވެސް ތިބެނީ ހަތިޔާރުއެއްކޮށްގެންނެވެ. އެއީ ހަނގުރާމަކުރަން ޖެހިއްޖެނަމަ ހަނގުރާމަކުރުމަށެވެ. ދުޝްމިނުންދޭ ޙަމަލާތަކުން ދިފާޢުވުމަށެވެ.
އަހުރެމެން ކޮންމެ މީހަކުވެސް މިކަމުން ފިލާވަޅު ލިބިގަންނަންވާނެއެވެ. ތިމާއަށް ޙާލަތެއް ކުރިމަތިވާނީ ކޮން ވަޤުތަކު ކަމެއް ނުއެނގޭނެއެވެ. ކޮންމެ ވަޤުތެއްގައި ކޮންމެ ކަމެއް ކުރިމަތިވިނަމަވެސް ތިމާގެ އަމިއްލަ ނަފުސް ދިފާޢުކުރުމުގެ ބާރު ލިބިގަނެގެން ހުންނަން އެބަޖެހެއެވެ. އެކަން ޙާޞިލުކުރެވޭނީ ރޫޙާނީ ބާރުވަރުގަދަކުރެވުނުވަރަކުންނެވެ. `
ވިސްނައިގެން އަޑުއަހާށެވެ!
މުޞީބާތަކީ ހަޔާތުގައި އަބަދުވެސް ކުރިމަތިވާނެ ކަމެކެވެ. މުޞީބާތެއް ނެތް ނަމަ ޙަޔާތުގެ މާބޮޑު ބޭނުމެއްވެސް ނެތެވެ. އަޅުގަނޑުމެންގެ ކަމަކަށް ވާންޖެހޭނީ މުޞީބާތުގެ ވަގުތުތަކުގައި އެންމެ ވަރުގަދަ މީހާއަށް ވުމެވެ.
އަޅުކަން ކުރުމަށް ސަމާލުކަން ދޭން ނުޖެހޭނެ ދުވަހެއް ނުއަންނާނެއެވެ! އެއީ ކޮންމެ ދުވަހަކުވެސް ސަމާލކުކަން ދޭން ޖެހޭ ކަމަކަށްވާތީއެވެ. ވީމާ މުޞީބާތުގެ ވަގުތުތަކުގައާއި ހިތްދަތިކަމުގެ ވަގުތުތަކުގައި އަޅުކަންކުރުން ގިނަކުރާށެވެ!
އެކަމުގައި ވަރަށް ބޮޑު ދެ ފައިދާއެއް ހިމެނެއެވެ. ފުރަތަމަ ފައިދާއަކީ ﷲ ތަޢާލާ އާއި އޮންނަ ގުޅުން އިތުރަށް ބަދަހިވެ ކުރިމަތިވެފައިވާ މުޞީބާތުން ވީހައި އަވަހަކަށް ސަލާމަތްވެވުމަށް ކުރެވޭ އުންމީދު އިތުރުވެގެން ދިއުމެވެ. ދެވަނަ ކަމަކީ މުޞީބާތުގެ ވަގުތުތަކުގައި އަޅުކަން ކުރުމުން ނަފްސާނީ ގޮތުންނާއި ރޫޙާނީ ގޮތުންވެސް ތިމާއަށް ވަރުގަދަކަން ލިބެމުން އަންނަ ކަމެވެ.
ކޮންމެ މީހަކަށް ނަމަވެސް އެއްވެސް ބާވަތެއްގެ މައްސަލައެއް ނުވަތަ ހިތްދަތިކަމެއް ކުރިމަތިވެއްޖެ ނަމަ އެމީހަކަށް އެންމެ ބޮޑަށް ބޭނުންވާނީ ރޫޙާނީ ބާރެވެ! ރޫޙާނީ ބާރު ވަރުގަދަވި ވަރަކަށް ނަފްސާނީ ބާރު ދާނީ ވަރުގަދަވަމުންނެވެ. އެއީ ވަރަށް ބޮޑަށް ގުޅި ލާމެހިފައިވާ ދެކަންތަކެވެ.
އެހެންކަމުން މުޞީބާތުގެ ވަގުތުތަކުގައި އަޅުކަން ކުރުމާއި ގާތްވިއަ ނުދިނުމަށް ކުރެވެން ހުރި ހުރިހާ ކަމެއް ޝައިޠޯނާ ކުރާނެއެވެ. އެއީ ރޫހާނީ ގޮތުން ތިބާ ބަލިކަށި ކުރުމަށެވެ. ޝައިޠާނާއަށް ތިބާގެ ނަފްސުގެ މައްޗަށް ގަދަވެގަނެވޭނީ ރޫހާނީ ބާރު ކުޑަކުރެވުނު ވަރަކުން ކަމުގައިވާތީއެވެ.
މުޞީބާތުގެ ވަގުތަކީ ޝައިޠާނާގެ ބާރުގެދަށަށް މީހާ ގެންދިއުމަށްޓަކައި އެންމެ ވަރުގަދައަށް މަސައްކަތްކުރާނެ ވަގުތެވެ. ވީމާ އެވަގުތަށް ފުރިހަމައަށް ތައްޔާރުވާންވާނެއެވެ! ތައްޔާރުވުމަށްފަހު ހަމަލާތައް ދިނުން ފަށައިގަންނާށެވެ! ޙަމަލާއަކީ އަޅުކަންކުރުން ކުރުން ގިނަކުރުމާއި ދުޢާކުރުން ގިނަކުރުމެވެ. އެއިރުން ޝައިޠާނާއަށް ޖެހޭނީ ބަލިކަށިވެ މާޔޫސްވެގެން ދުރަށްދާށެވެ! އިން ޝާ ﷲ
