ބަންޑާރަ ނައިބުގެ އޮފީހުގެ ރިޕޯޓުގައި ފެނަކަ ކޯޕަރޭޝަނާ ގުޅޭގޮތުން ހުރީ ސައްހަ ވާހަކަތަކެއް ކަމަށް، މި ސަރުކާރުގައި ފެނަކަ ކޯޕަރޭޝަންގެ މެނޭޖިން ޑިރެކްޓަރުގެ މަގާމާ އެންމެފުރަތަމަ ހަވާލުވެވަޑައިގަތް މުއާޒް މުޙައްމަދު ރަޝީދު ވިދާޅުވެއްޖެއެވެ.
އޮޑިޓް އޮފީހުން ނެރުނު ފެނަކައިގެ 2021 އިން ފެށިގެން 2023 ވަނަ އަހަރުގެ އޮޑިޓް ރިޕޯޓުން ދައްކާ ގޮތުގައި ކުރީގެ ރައީސް، އިބްރާހިމް މުހައްމަދު ސޯލިހުގެ ސަރުކާރުގައި ފެނަކައިން ހިންގިކަން ސާބިތުވާ ހިޔާނާތް 2.2 ބިލިއަން ރުފިޔާއަށް ވުރެ މައްޗަށް އަރައެވެ.
އެ ރިޕޯޓުގައި، ”ފިއްކަނޑައިގެންދާވަރު“ ގެ، ހިޔާނާތާ ގުޅުންހުރި ގިނަ މައުލޫމާތުތަކެއް ހިމަނާފައިވެއެވެ. އެ ރިޕޯޓާ ގުޅިގެން އޭރުގެ މެނޭޖިން ޑިރެކްޓަރަކަށް ހުރި އަހްމަދު ސައީދު ނެރުނު ބަޔާނެއްގައި، އޮޑިޓް ރިޕޯޓު ގޯސްކަމަށާއި އުސޫލުން ބޭރުން އެއްވެސް ކަމެއް ކޮށްފައިނުވާނެކަމަށް ބުނެފައިވެއެވެ.
އެހެންނަމަވެސް ކޮރަޕްޝަންގެ ކުށް ސާބިތުވެ އޭނާ 4 އަހަރަށް ޖަލަށްލުމަށް ކްރިމިނަލް ކޯޓުން ވަނީ ހުކުމްކޮށްފައެވެ.
ސައީދު ހަވާލުވެހުރިއިރު ފެނަކައިން ހިންގި ހިޔާނާތާ ގުޅޭގޮތުން އޮޑިޓް ރިޕޯޓުގައިވާ ކަންކަމާ ގުޅޭގޮތުން ”މެންދުރު ޓީވީ“ އަށް މައުލޫމާތު ދެއްވަމުން މުއާޒް ވިދާޅުވީ، އޮޑިޓު ރިޕޯޓުގައިވާ ގިނަ ވާހަކަތަކަކީ ރަނގަޅު ތެދު ވާހަކަތައް ކަމަށާއި، އެ ރިޕޯޓުގައި އުސޫލާ ހިލާފު ކަމެއް ކޮށްފައިވާނަމަ އެކަމެއް ތަހްގީގުކުރަން ވާނެކަމަށެވެ.
ފެނަކަ ރިޕޯޓާ ގުޅޭގޮތުން ވާހަކަދައްކަވަމުން މުއާޒް ވިދާޅުވީ، ކަމެއް ކޮށްފައިވާނަމަ އެކަމެއް ތަހްގީގު ކުރުމުން ނޫނީ ކޮށްފައި އޮތްކަމެއް ނޭނގޭނެކަމަށާއި، ތަހްގީގު ކުރުމުން އެކަމެއް ކޮށްފައި އޮތީ ކިހިނެއް، ކޮން ގޮތަކަށް ކަން ހާމަވާނެ ކަމަށެވެ.
އޮޑިޓް ރިޕޯޓުގައި ހުރި ވަރަށް ގިނަ ވާހަކަތަކަކީ ހަމަ ރަނގަޅު ވާހަކަތައް. ތެދު ވާހަކަތައް. އޭގައި އުސޫލާ ހިލާފު ކަމެއް ކޮށްފައި ހުރިއްޔާ އެކަމެއް ޖެހޭނީ ތަހްގީގު ކުރަން. ތަހްގީގު ކުރީމަ އެނގޭނީ ކޮންކަމެއް ކިހިނެއް ކަމެއް ކޮށްފައި އޮތީ. – ފެނަކަ ކޯޕަރޭޝަންގެ ކުރީގެ މެނޭޖިން ޑިރެކްޓަރ މުއާޒް މުޙައްމަދު ރަޝީދު
މުއާޒް ވިދާޅުވީ ވަކި ކުންފުންޏަކަށް މަސައްކަތެއް ހަވާލު ކުރުމަކީ ކޮރަޕްޝަން އެކުލެވިގެންވާ ކަމެއް ކަމަށް ގަބޫލު ނުކުރައްވާކަމަށެވެ. އެހެންނަމަވެސް ކުންފުނީގެ ޕޮލިސީއާ ހިލާފަށް ކަމެއް ހަވާލުކޮށްފައިވާނަމަ އެކަމެއް ކޮށްފައި ވަނީ އުސޫލާ ހިލާފަށްކަން ވަރަށް ސާފު ކަމަށް މުއާޒް ވިދާޅުވިއެވެ.
އަދި ކުރީގެ ސަރުކާރުން ފެނަކަ ހިންގި އިރުގައި އެކުންފުނިން އުސޫލާ ހިލާފަށް ވަރަށް ގިނަ ކަންކަން ހިންގާފައިވާކަން ފާހަގަ ކުރައްވާ މުއާޒް ވިދާޅުވީ، ޕްރޮޖެކްތައް އިންހައުސްކޮށް، ކޮންސްޓްރަކްޝަން މަސައްކަތްތައް ކުރިއަށް ގެންގޮސްފައިވާ ކަމަށެވެ. މުއާޒް ވިދާޅުވީ ފެނަކަ އިން ނުނިމި ހުރި ޕްރޮޖެކްޓުތަކަށް ފައިސާ ދައްކާފައިވާ ކަމަށެވެ. އަދި މިފަދަ މައްސަލަތަކަކީ ބަލަންޖެހޭނެ މައްސަލަތަކެއް ކަމަށް މުއާޒް ވިދާޅުވިއެވެ. އަދި ފެނަކައާއި ހަވާލުވެވަޑައިގެންނެވިއިރު ވެސް އެ ކުންފުނީގެ މާލީ ހާލަތު ވަރަށް ދައްކަމަށް މުއާޒް ވިދާޅުވިއެވެ.
އެމްޑީޕީގެ ވެރިކަމުގެ ފަސް އަހަރުތެރޭގައި ފެނަކައަށް ކުރިމަތިކުރުވި މާލީ އަނދަވަޅާއި އެ ހާލަތު އެންމެ ބޮޑަށް ތަހައްމަލުކުރައްވަން ޖެހިވަޑައިގެންނެވި އެއް ބޭފުޅަކަށް ހަމަ ގައިމު ވެސް ވެވަޑައިގަންނަވާނީ މުއާޒްއެވެ. މަގާމާ ހަވާލުވެވަޑައިގެންނެވިއިރު ފެނަކައިން އޭގެ ކުރީ ފަސް އަހަރު، އުސޫލާ ޚިލާފަށް ހިންގާފައިވާ ގިނަ ކަންތައްތަކެއްގެ ހިތި ފިލުވަން ޖެހިވަޑައިގެންނެވި އެއް ބޭފުޅަކީ ވެސް މުއާޒެވެ.
