އެމްއެމްޕީއާރުސީގެ މައްސަލައިގައި ކުރީގެ ނައިބު ރައީސް އަހްމަދު އަދީބަށް މާފު ދެއްވި ސަބަބާ ގުޅޭ ގޮތުން ސުވާލު ކުރުމުން ކުރީގެ ރައީސް އިބްރާހިމް މުހައްމަދު ސޯލިހް ޖަވާބު ދެއްވުމަށް ދެކޮޅު ހައްދަވައިފި އެވެ.
އަދީބުގެ މައްޗަށް އިއްވާފައި އޮތް އެ ހުކުމަށް ސޯލިހް މާފު ދެއްވީ، އެ މަނިކުފާނުގެ ވެރިކަން ނިމެން ހަފްތާއަކަށް ވުރެ ކުޑަ ދުވަސްކޮޅަކަށް ވެފައި ވަނިކޮށް، 13 ނޮވެމްބަރު 2023ގަ އެވެ.
ރިޔާސީ އިންތިހާބުގެ ދެވަނަ ބުރުގައި ލިބިވަޑައިގެންނެވި ނާކާމިޔާބީއަށް ފަހު ސޯލިހް ނިންމެވި އެ ނިންމެވުމާ ގޫޅޭ ގޮތުން އާންމުންގެ ކަންބޮޑުވުންތައް އޭރު ބޮޑުވި އެވެ.
އެ ނިންމެވުމަށް ފަހު، ސޯލިހް ފުރަތަމަ ފަހަރަށް ނޫސްވެރިންނާ ދިމާވީ މިދިޔަ ހުކުރު ދުވަހުގެ ރޭ އެމްޑީން ބޭއްވި މުޒާހަރާގެ ތެރެއިންނެވެ.
މުޒަހަރާ ނިންމާލި ވަގުތު ނޫސްވެރިއަކު ސޯލިހާ ކުރި ސުވާލަކީ އަދީބަށް މާފު ދެއްވީ ކީއްވެގެންތޯ އެވެ.
”ތި ވާހަކައަށް [އަދީބަށް މާފު ދިން މައްސަލައިގައި] ހިނގާ ފަހުން އަޅުގަނޑުމެން ފަހުން ވާހަކަ ދައްކާލަން،“ އެ ސުވާލުގެ ޖަވާބުގައި ސޯލިހް ވިދާޅުވި އެވެ.
އެ ވަގުތު އެ ސުވާލަށް ޖަވާބު ނުދެއްވޭނެތޯ އެހުމުން އެ މަނިކުފާނު ތުރުތުރު އަޅައިވަޑައިގެން ވިދާޅުވީ ”މިހާރު މި ދަނީ މުޒާހަރާ ނިންމާލާފައި ގެއަށް“ ކަމަށެވެ.
އެހެން ވިދާޅުވުމަށް ފަހު ސޯލިހް ވަޑައިގެންނެވީ ކާރަށް އަރާވަޑައިގަތުމަށެވެ.
ސޯލިހް 2018ގައި ވެރިކަމަށް ވަޑައިގަތީ އެމްއެމްޕީއާރުސީގެ ހިޔާނާތް ބަލައި ގެއްލުނު ފައިސާ ހޯދާނެ ކަމުގެ ވައުދާ އެކު އެވެ. އެކަމަށްޓަކައި ރިޔާސީ ކޮމިޝަނެއްވެސް އުފެއްދެވި އެވެ. ވެރިކަމުގެ ފަސް އަހަރު ނިމިގެންދިޔައިރު، އެއިން އެންމެ ފައިސާއެއް ވެސް ދައުލަތަށް ހޯދިފައެއް ނުވެ އެވެ.
ވެރިކަން ނިމުނު އިރު، އޭރު މި ހިޔަނާތާ ގުޅިގެން ޖަލުގައި އޮތީ ޔާމީން އެކަންޏެވެ. ހަގީގީ ވަގަކީ ޔާމީނެވެ. ޔާމީންގެ މައްޗަށް އޭރު އިއްވާފައި އޮތް11 އަހަރުގެ ޖަލު ހުކުމް ފަހުން ހައިކޯޓުން ބާތިލުކޮށް، އެމަނިކުފާނުވެސް ވަނީ މިނިވަންވެވަޑައިގެންފަ އެވެ. އެ ހުކުމްގެ އިސްތިއުނާފް މަރުހަލާ މިހާރު ސުޕްރީމް ކޯޓުގައި ކުރިއަށް އެބަ ދެ އެވެ.
