ވާރޭ ނުވެހޭ އެއްވެސް ކޯޓެއް މާލެއަކު ނެތް ކަަމަށް ޖުޑީޝަލް ސާވިސް ކޮމިޝަން (ޖޭއެސްސީ)ގެ ރައީސް، މާފުށީ ދާއިރާގެ މަޖިލިސް މެންބަރު ހުސެއިން ރިޒާ އާދަމް ވިދާޅުވެއްޖެއެވެ.
ރައްޔިތުންގެ މަޖިލީހުގެ ޖުޑިޝަރީ ކޮމިޓީގެ މިއަދުގެ ބައްދަލުވުމުގައި، ކޯޓުތަކުން މައްސަލަތައް ނިމުން ލަސްވާ ސަބަބާ ބެހޭގޮތުން ވާހަކަދައްކަވަމުން ރިޒާ މިއަދު ވިދާޅުވީ، ސުޕްރީމް ކޯޓު ބޭރުން ކިތަންމެ ރީއްޗަސް އެތަނަށް ވާރޭވެހޭ ކަމަށާއި، ހައިކޯޓު ހިފަހައްޓަނީ ސީލިންތަކުގައި ދަގަނޑު ޖައްސައިގެން ކަމަށެވެ.
ރިޒާ ވިދާޅުވީ، 11 މެޖިސްޓްރޭޓް ކޯޓު މިހާރުވެސް ހިނގަމުންދަނީ ތަންތަން ކުއްޔަށް ހިފައިގެން ކަމަށާއި، 52 މެޖިސްޓްރޭޓް ކޯޓު ހިންގަނީ ކައުންސިލުތަކާ އެއް އިދާރާއެއްގައި ކަމަށެވެ.
”އެ ކައުންސިލުތަކުން ނިކުންނަން އެބަހުރި ސިޓީ ފޮނުވައިފަ، އެއީ ކައުންސިލްތަކުގެ ބިންތަކެއް ކަމަށް ނިންމައި މާދަމާ އެތަންތަނުން ނިކުތަސް ކޯޓުތައް ހިންގާނެ ތަންތަނެއް ނެތް،“ އޭނާ ވިދާޅުވިއެވެ.
ރިޒާ ވިދާޅުވީ، އާ އިމާރާތެއް ބޭނުންވާ 43 ކޯޓުގެ ތެރެއިން 13 ކޯޓު އިމާރާތް ކުރުމަށް ބޭނުންވާ ޖުމުލަ 64.7 މިލިއަން ރުފިޔާ 2024 ވަނަ އަހަރުގެ ބަޖެޓުގައި ޖެހި ކަމަށެވެ.
”ނަމަވެސް އެ މަސައްކަތްތައް ކުރިއަށް ނުގެންދަން ފިނޭންސް މިނިސްޓްރީން އަންގާފައި އެބައޮތް، މިއަހަރު އެއްވެސް މަަޝްރޫއެއް ކުރިއަށްގެންދަން ފިނޭންސުން ބަޖެޓް ދީފައެއް ނެތް. އެހެންވީމަ މިކަން ހައްލުކުރެވޭނީ އަޅުގަނޑު ދެކޭގޮތުގައި، ޕީއެސްއައިޕީގެ ބަޖެޓުގެ ދަށުން ރަނގަޅު ހައްލުތަކެއް އައިސްގެން ކޯޓުގެ ޖާގަތައް ފުރިހަަމަކުރެވޭނީ،“ އޭނާ ވިދާޅުވިއެވެ.
