ވަޅުޖެހިފައި އޮތް ކުޅިވަރުގެ ދާއިރާ މި ސަރުކާރުން ނަގާ ކޮޅަށް ޖަހާނެ ކަމުގައި ވިލިމާލޭ ދާއިރާގެ މަޖިލިސް މެންބަރު މުޙައްމަދު އިސްމާޢީލް ވިދާޅުވެއްޖެއެވެ.
މެންބަރު މުޙައްމަދު އިސްމާޢީލް މިއަދު ވަނީ ކުޅިވަރުގެ ދާއިރާ އާރޯކޮށް، ކުރިއަރުވައި، ކުރިއެރުވުމަށް ސަރުކާރުން ކުރައްވާ މަސައްކަތްތަކަށް ތައުރީފު ކުރައްވައި، އެކްސްގައި ޕޯސްޓެއް ޝާއިޢު ކުރައްވާފައެވެ.
އެމަނިކުފާނުގެ ޕޯސްޓުގައި ފާހަގަ ކުރައްވާފައިވާ ގޮތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ އެމަނިކުފާނުގެ ރިޔާސީ ވައުދުފުޅާ އެއްގޮތަށް ގައުމީ ޓީމުތަކުގެ އެތުލީޓުންނާއި އޮފިޝަލުންގެ އިނާޔަތް ފުރަތަމަ ފަހަރަށް ބޮޑުކޮށްފައެވެ. މެންބަރު މުޙައްމަދު ވިދާޅުވީ މިކަމުގެ ސަބަބުން ކުޅިވަރުގެ ދާއިރާގައި ހަރަކާތްތެރިވާ ފަރާތްތަކުގެ އާއިލާތަކަށް އުފާވެރިކަމާއި އާރޯކަން ލިބިގެން ގޮސްފައިވާ ކަމަށެވެ.
މެންބަރު މުޙައްމަދު އިސްމާޢީލް ވަނީ “ވަޅުޖެހިފައި އޮތް ކުޅިވަރުގެ ދާއިރާ މިސަރުކާރުން ނަގާ ކޮޅަށް ޖަހާނެ” ކަމަށް ވިދާޅުވެ، މި ސަރުކާރުން ކުޅިވަރުގެ ދާއިރާއަށް ދެއްވާ ސަމާލުކަން ފާހަގަ ކުރައްވާފައެވެ.
ރައީސް މުޢިއްޒުގެ ސަރުކާރުން ވަނީ ކުޅިވަރުގެ ދާއިރާ ކުރިއެރުވުމަށް ގިނަގުނަ މަސައްކަތްތަކެއް ފަށާފައެވެ. އެގޮތުން، ގައުމީ ޓީމުތަކުގެ އެތުލީޓުންނާއި އޮފިޝަލުންނަށް ދެމުންގެންދާ އިނާޔަތްތައް ބޮޑުކުރުމަކީ އެދާއިރާގައި ހަރަކާތްތެރިވާ ފަރާތްތަކަށް ލިބުނު ބޮޑު ހިތްވަރެކެވެ. މީގެ ކުރިން ކުޅިވަރުގެ ދާއިރާގެ އިނާޔަތްތައް ބޮޑުކޮށްފައިނުވާތީ، މެންބަރު މުޙައްމަދު ފާހަގަ ކުރެއްވި ގޮތުގައި މިއީ ވަރަށް މުހިންމު ފިޔަވަޅެކެވެ.
ސަރުކާރުގެ މިފަދަ މަސައްކަތްތަކުގެ ސަބަބުން ދިވެހި ކުޅިވަރުގެ ދާއިރާގެ ކުރިމަގު ވަރަށް އުޖާލާ ވެގެންދާނެ ކަމަށް ގިނަ ބަޔަކު ދަނީ ބުނަމުންނެވެ. ކުޅިވަރުގެ ދާއިރާއަށް އިތުރު ފުރުސަތުތަކާއި ހިތްވަރު ދިނުމަކީ ގައުމުގެ ތަރައްގީއަށް ވަރަށް މުހިންމު ކަމެކެވެ.
