އީރާނާއި ރަޝިޔާ އަދި ޗައިނާއިން ގުޅިގެން އ.ދ.ގެ ސެކްރެޓަރީ ޖެނެރަލްއަށާއި ސެކިއުރިޓީ ކައުންސިލަށް ސިޓީއެއް ފޮނުވައި، އީރާނާއެކު ވެފައިވާ ނިއުކްލިއަރ އެއްބަސްވުން ނިމިއްޖެކަން އިއުލާންކޮށްފިއެވެ. މިކަމުގެ ސަބަބުން އ.ދ.ގެ ސެކިއުރިޓީ ކައުންސިލުން އީރާނުގެ ނިއުކްލިއަރ މައްސަލަ ބެލުން ހުއްޓުމަކަށް އަތުވެއްޖެއެވެ.
މި ތިން ގައުމުން ވަނީ އިނގިރޭސިވިލާތާއި ފަރަންސޭސިވިލާތާއި ޖަރުމަނު (އީ3) އަށް ފާޑުކިޔާފައެވެ. އެމީހުން ބުނި ގޮތުގައި، އީ3 އިން އ.ދ.ގެ ގަރާރު 2231 ގެ ދަށުން އީރާނުގެ މައްޗަށް އަލުން ދަތިކުރުމުގެ ފިޔަވަޅު އަޅަން މަސައްކަތްކުރާ ގޮތަކީ ‘ޤާނޫނީ އަދި އިޖުރާއީ ގޮތުން ގޯސް’ ކަމެކެވެ.
ސިޓީގައި ބަޔާންކޮށްފައިވާ ގޮތުގައި، ޖޭ.ސީ.ޕީ.އޯ.އޭ. (ޖޮއިންޓް ކޮމްޕްރެހެންސިވް ޕްލޭން އޮފް އެކްޝަން) އާއި ގަރާރު 2231 ގެ ދަށުން އެމީހުންގެ ވައުދުތައް ފުއްދުން ހުއްޓާލާފައިވާތީ، ޔޫރަޕުގެ ފަރާތްތަކަށް އެ ގަރާރުގެ މާއްދާތައް ބޭނުންކުރުމުގެ ހައިސިއްޔަތެއް ނެތެވެ.
މި ސިޓީގައި އިތުރަށް ބަޔާންކޮށްފައިވަނީ، ގަރާރު 2231 ގެ 8 ވަނަ އޮޕަރޭޓިވް ޕެރެގްރާފާ އެއްގޮތަށް، އެ ގަރާރުގެ ހުރިހާ މާއްދާއެއް 2025 ވަނަ އަހަރުގެ އޮކްޓޯބަރު 18 ގެ ފަހުން ނިމިފައިވާ ކަމަށެވެ. އަދި ގަރާރު 2231 މުޅިން ނިމުމަކީ އ.ދ.ގެ ސެކިއުރިޓީ ކައުންސިލުން އީރާނުގެ ނިއުކްލިއަރ މައްސަލަ ބެލުން ނިމުމަކަށް އައުން ކަމަށާއި، މިއީ ކައުންސިލްގެ ބާރާއި ބައިނަލްއަޤްވާމީ ޑިޕްލޮމެސީގެ އިތުބާރު ވަރުގަދަ ކުރުމަށް އެހީތެރިވާ ކަމެއް ކަމަށްވެސް ފާހަގަކޮށްފައިވެއެވެ.
އީރާނާއި ރަޝިޔާ އަދި ޗައިނާއިން ވަނީ ހުރިހާ ފަރާތްތަކަށްވެސް ގުޅިގެން މަސައްކަތްކުރުމަށާއި، ދެމެދުގައި އިހުތިރާމުކޮށްގެން ވާހަކަ ދައްކައިގެން ސިޔާސީ ހައްލެއް ހޯދުމަށް ގޮވާލާފައެވެ. އަދި އެއްފަރާތުން އަޅާ ދަތިކުރުމުގެ ފިޔަވަޅުތަކާއި، ބާރުގެ ބިރު ދެއްކުމާއި، ނުވަތަ ހާލަތު ގޯސްކޮށްލާނެ އެއްވެސް ކަމަކުން ދުރުހެލިވުމަށްވެސް އެދިފައެވެ.
އީރާނުގެ ޚާރިޖީ ވުޒާރާއިން ކުރިން ނެރުނު ބަޔާނެއްގައި ބުނެފައިވަނީ، އީރާނުގެ މައްޗަށް އ.ދ.ގެ ދަތިކުރުމުގެ ފިޔަވަޅު އަލުން އެޅުމުގެ ހުއްދަ ދިން ގަރާރު، ކަނޑައަޅާފައިވާ މުއްދަތަށްފަހު ރަސްމީކޮށް ހަމަވެފައިވާ ކަމަށެވެ.
2015 ވަނަ އަހަރުގެ ޖުލައި 20 ގައި ފާސްކުރި ގަރާރު 2231 ގައި ކަނޑައަޅާފައިވާ 10 އަހަރުގެ މުއްދަތު، އޮކްޓޯބަރު 18 ގައި ނިމިފައިވާ ކަމަށާއި، އީރާނުގެ ނިއުކްލިއަރ ޕްރޮގްރާމާ ގުޅުންހުރި ހުރިހާ މާއްދާއެއް، ހުރިހާ ހުރަހެއް އަދި ހުރިހާ މެކޭނިޒަމެއް މި ތާރީޚުން ފެށިގެން ނިމިފައިވާ ކަމަށްވެސް އެ ބަޔާނުގައިވެއެވެ.
އީ3 އިން ޖޭ.ސީ.ޕީ.އޯ.އޭ.ގެ ދަށުން ‘ސްނެޕްބެކް’ މެކޭނިޒަމް ހިންގަން ނިންމިކަން އޮގަސްޓު 28 ގައި އިއުލާންކުރިއެވެ. އެމެރިކާއިން އެ އެއްބަސްވުމުން ވަކިވުމަށްފަހު، އީރާނުން އެއްބަސްވުމާ ޚިލާފުވެފައިވާ ކަމަށް ތުހުމަތުކޮށް މިކަން ކުރިއަށް ގެންދިޔައީއެވެ.
