ވައިގެ ދަތުރުފަތުރުގެ ވިޔަފާރި ހަމައެކަނި ދިވެހިންނަށް ކުރެވޭގޮތަށް ދަތުރުފަތުރާއި މަނަދީ ވަޔާއި ބެހޭ ވުޒާރާއިން ގަވައިދެއް އާންމުކޮށްފިއެވެ.
ގެޒެޓްކޮށްފައިވާ އެ ގަވައިދުގައި ވިދާޅުވެފައިވަނީ އެ ބަދަލުގެ ގެނައީ ވައިގެ ދަތުރުފަތުރުގެ ވިޔަފާރީގައި ދިވެހިންގެ ބައިވެރިވުން އިތުރުކުރުމަށް ކަމަށެވެ.
އެ ގަވައިދުގެ ދަށުން ޖެނެރަލް ސޭލްސް އެޖެންޓުންނާއި، ޕެސެންޖާ ސޭލްސް އެޖެންޓުން އަދި ކާގޯ ސޭލްސް އެޖެންޓްގެ ގޮތުގައި އޮޕަރޭޓު ކުރަން ހުއްދަ ދެވޭނީ ހަމައެކަނި 100 އިންސައްތަ ދިވެހި ކުންފުނިތަކަށެވެ.
އެ ގަވައިދުގައި ކުރިން އޮންނަ ގޮތުގައި އެ ވިޔަފާރިތަކުގައި 49 އިންސައްތަ ބޭރުގެ ހިއްސާ އޮންނަ ކުންފުނިތަކަށް ބައިވެރިވެވޭނެ ކަމަށެވެ. ނަމަވެސް ގަވައިދަށް ގެނައި އިސްލާހާއިއެކު އެފަދަ ކުންފުނިތަކަށް އެ ވިޔަފާރިތަކުގައި ދެން ބައިވެރިއެއް ނުވެވޭނެކަަށެވެ.
ވައިގެ ދަތުރުތަކާއި ބެހޭ ވުޒާރާއިން ވިދާޅުވީ އެ ގަވައިދަކީ ވައިގެ ދަތުރުފަތުރުގެ ދާއިރާއިން ގައުމީ އުފެންދުންތެރިކަން އިތުރުކޮށް ދިވެހި ވިޔަފާރިތަކަށް އިތުރު ބާރު ދިނުމަށް ސަރުކާރުން ހިންގާ މަސައްކަތްތަކަށް ލިބިގެންދިޔަ ކުރިއެރުމެއް ކަމަށެވެ.
އަދި އެ ގަވައިދާއިއެކު ވައިގެ ދަތުރުފަތުރު އަދި ދަތުރުފަތުރުގެ ދާއިރާއިން ލިބޭ މާލީ ފައިދާތައް ދިވެހި އިގްތިސޯދުގެ ތެރޭގައި ހިފެހެއްޓުމަށް ވަރަށް މުހިންމު ދައުރެއް އަދާކުރާނެކަމަށް ކަމަށް ވެސް އެ ވުޒާރާއިން ވިދާޅުވެއެވެ.
