ހޮލީވުޑްގެ މަޝްހޫރު ތަރި ކިމް ކާޑޭޝިއަންގެ ގާނޫނީ ވަކީލަކަށް ވުމުގެ ހުވަފެނަށް އަނެއްކާވެސް ހުރަސްތަކާ ކުރިމަތިލާން ޖެހިއްޖެއެވެ. އޭނާއަށް ޖުލައި 2025 ގައި ބޭއްވުނު ކެލިފޯނިއާ ބާ އެގްޒާމުން ފާސް ނުވާ ކަމަށް ވަނީ ހާމަވެފައެވެ. މި ހިތްދަތިކަމާ އެކުވެސް، ކިމް ވަނީ އޭނާގެ އަމާޒަށް ފުރަގަސްނުދޭނެ ކަމަށް ބުނެފައެވެ.
ކިމް އޭނާގެ އިންސްޓަގްރާމްގައި ހިއްސާކުރި ގޮތުގައި، އެގްޒާމްގެ ނަތީޖާއަށް އޭނާ ހިތްހަމަނުޖެހުނު ނަމަވެސް، ވަކީލަކަށް ވުމުގެ އަމާޒުން ދުލެއް ނުކުރާނެއެވެ. މިހާތަނަށް ހަ އަހަރު ދުވަހު ގާނޫނު ކިޔަވާފައިވާ ކަމަށާއި ރޭގަނޑު ނުނިދާވެސް ފިލާވަލޫ މުތޯލިއާ ކުރި ކަމަށާއި، ވަކީލަކަށް ވުމަށްޓަކައި މި މަސައްކަތް ކުރިއަށް ގެންދާނެ ކަމަށް ކިމް ބުންޏެވެ. ”އަހަރެން އިތުރަށް ބުރަކޮށް ކިޔަވައި، އަނެއްކާވެސް އެގްޒާމްގައި ބައިވެރިވާނަން. ކުރު މަގެއް ނެތް، ދުލެއް ނުކުރާނަން،“ އޭނާ ބުންޏެވެ.
މި މަސައްކަތުގައި އޭނާއަށް ލޯތްބާއި ހިތްވަރު ދިނުމަށްޓަކައި އޭނާގެ ފޮލޯވަރުންނަށް ޝުކުރުއަދާކުރިއެވެ. ކިމް ބުނީ ނާކާމިޔާބީއަކީ އެއްޗެއްގެ ނިމުމެއް ނޫން ކަމަށާއި، އެއީ އިތުރަށް މަސައްކަތް ކުރުމުގެ ސަބަބެއް ކަމަށެވެ. ”ފާސްވުމާ ގާތްކުރެވުނު، އެކަމުގެ ސަބަބުން އަހަރެންނަށް އިތުރަށް ކުރިއަށްދާން ހިތްވަރު ލިބޭ،“ އޭނާ ލިޔުނެވެ.
ކެލިފޯނިއާ ބާ އެގްޒާމަކީ އެމެރިކާގެ އެންމެ އުނދަގޫ އެގްޒާމްތަކުގެ ތެރޭގައި ހިމެނޭ އެގްޒާމެކެވެ. އާންމުކޮށް އެގްޒާމް ފާސްވާ މީހުންގެ ނިސްބަތަކީ ގާތްގަނޑަކަށް 50 އިންސައްތައެވެ. ކިމްއަށް ގާނޫނީ ދިރާސާތަކުގައި ގޮންޖެހުންތަކާ ކުރިމަތިލާން ޖެހުނު މިއީ ފުރަތަމަ ފަހަރެއް ނޫނެވެ. 2021 ވަނަ އަހަރު، އޭނާ ”ބޭބީ ބާރ“ އެގްޒާމް ތިން ފަހަރު ފެއިލްވުމަށްފަހު ހަތަރުވަނަ ފަހަރު ވަނީ ފާސްވެފައެވެ.
ކިމްއަށް ގާނޫނަށް ހުރި ޝައުގުވެރިކަން އައީ އޭނާގެ ބައްޕަ، ރޮބަޓް ކާޑޭޝިއަން ސީނިއަރގެ ފަރާތުންނެވެ. އޯ.ޖޭ. ސިމްޕްސަންގެ މަޝްހޫރު މައްސަލައިގައި ދިފާޢީ ވަކީލެއްގެ ގޮތުގައި ބައްޕަ ހޯދާފައިވާ ކާމިޔާބީތަކަކީ ކިމްއަށް ބޮޑު ހިތްވަރެކެވެ.
