ރާއްޖެއިން ޑްރަގު ނައްތާލުމަށް ފެށި އޮޕަރޭޝަންގައި މިހާތަނަށް 23 މިލިއަން ރުފިޔާގެ ޑްރަގްސް އަތުލައިގެންފައިވާކަމަށް ހޯމް މިނިސްޓަރު އަލީ އިހްސާން ވިދާޅުވެއްޖެއެވެ.
ޑްރައިގާއި ދެކޮޅަށް ’އޮޕަރޭޝަން އަލިމަގު’ގެ ނަމުން ނަން ދީފައިވާ އޮޕަރޭޝަނެއް ފުލުހުން ފެށީ މީމަހުގެ 13 ވަނަ ދުވަހުއެވެ. މި އޮޕަރޭޝަންގައި އެދުވަހު 100 ވުރެ ގިނަ މީހުން ހައްޔަރުކޮށްފައިވާކަމަށް ފުލުހުން ކުރިން ވަނީ ބުނެފައެވެ.
މި އޮޕަރޭޝަނާއި ގުޅޭގޮތުން މީޑިއާގައި ވާހަކަ ދައްކަވަމުން މިނިސްޓަރު އަލީ އިހްސާން ވިދާޅުވީ އެ އޮޕަރޭޝަންގައި މަގުމަތީގެ އަގުން ބަލާނަމަ ގާތްގަނޑަކަށް 23 މިލިއަން ރުފިޔާގެ ޑްރަގްސް އަތުލައިގެންފައިވާކަމަށެވެ. އަދި އޮޕަރޭޝަން ނިންމާލިއިރު 110 މީހަކު ހައްޔަރުކޮށްފައިވާކަމަށްވެސް މިނިސްޓަރު އިހްސާން ވިދާޅުވިއެވެ.
މި އޮޕަރޭޝަނާއި ގުޅޭ މާ ބޮޑު ތަފްސީލެއް ފުލުހުން މިހާތަނަށް އާޢްމުކޮށްފައެއް ނުވެއެވެ.
އޮޕަރޭޝަންގައި އަތުލައިގަތް ބައެއް ޑްރަގުގެ ބާވަތްތައް
ކެނެބިސް
މެތު
ހެރޮއިން
ސިންތެޓިކް ޑްރަގު
މީގެ އިތުރުން މަސްތުވާތަކެތި ކުދިކޮށް ބަންދުކުރަން ބޭނުންވާ ސާމާނާއި މަސްތުވާތަކެތި ކިރަން ބޭނުންކުރާ ސާމާނު ވެސް އަތުލައިގެންފައިވާކަމަށް ފުލުހުން ވަނީ ބުނެފައެވެ.
