އިންޖީނުގޭގައި އަލިފާނުގެ ހާދިސާއެއް ހިނގި ހައްދުންމަތީ ގަމަށް ފެނުގެ ޚިދުމަތް ދޭން ފަށާފައިވާ ކަމަށާއި، މިރޭގެ ވަގުތެއްގައި ކަރަންޓުގެ ޚިދުމަތްވެސް ދެވޭނެ ކަމަށް ފެނަކަ ކޯޕަރޭޝަން ލިމިޓެޑުން ބުނެފިއެވެ.
ލ. ގަން ފެނަކަ ބްރާންޗްގައި ދިމާވި އަލިފާނުގެ ހާދިސާއާ ގުޅިގެން ނެރުނު ބަޔާނެއްގައި ފެނަކަ ކޯޕަރޭޝަން ލިމިޓެޑުން ބުނީ، ލ. ގަމުގައި ފެނަކަ އިންޖީނުގޭގައި މިއަދު ހިނގި އަލިފާނުގެ ހާދިސާގެ ސަބަބުން މުޅި ރަށުން ކަރަންޓް ކެނޑިފައިވާ މި ދަނޑިވަޅުގައި އެ ކުންފުނިން މަސައްކަތް ކުރަމުން ދަނީ ވީހާވެސް އަވަހަކަށް ރައްޔިތުންނަށް ކަރަންޓް ދިނުމަށްކަމަށެވެ.
އެގޮތުން ކުރެވޭ މަސައްކަތުގެ ތެރެއިން މިރޭގެ ވަގުތެއްގައި ރަށުގެ ބޮޑުބަޔަކަށް ކަރަންޓު ދެވޭނެކަމަށް ލަފާކުރެވޭ ކަމަށް އެ ކުންފުނިން ބުނެފައިވެއެވެ.
ފެނަކަ ކޯޕަރޭޝަނުން ބުނީ، ވިޝުއަލް އިންސްޕެކްޝަން އިން ފާހަގަކުރެވުނު ގޮތުން، ގެއްލުން ވެފައިވަނީ 3 އެނެކްސް ގެ ތެރެއިން 1 އިންޖީނަކަށެވެ. މި ހާދިސާގެ ސަބަބުން އިންޖީނުގެއަށާއި ޕެނަލްތަކަށް ދިމާވި މައްސަލަތައް ދެނެގަނެ، އެ މައްސަލަތައް ހައްލުކުރުމުގެ މަސައްކަތް މިހާރު ކުރަމުން އަންނަ ކަމުގައިވެސް ފެނަކައިގެ ބަޔާނުގައި ބުނެފައިވެއެވެ.
އެ ކުންފުނިން ބުނީ، މިހާރު އެރަށަށް ފެނުގެ ޚިދުމަތް ދޭން ފަށާފައިވާ ކަމަށާއި ނަރުދަމާ ނިޒާމުގެ މަސައްކަތަށް ޚާއްސަ ޓީމް ތަކުން އަންނަނީ އެރަށުގެ ނަރުދަމާ ނިޒާމުގައި އެއްވެސް މައްސަލައެއް އުޅޭތޯ ބަލަމުން ކަމަށެވެ.
ފެނަކައިގެ ބަޔާނުގައި ބުނީ، މިހާދިސާގެ ސަބަބުން ލ. ގަމުގެ ރައްޔިތުންނަށް ދިމާވެފައިވާ ދަތިތަކަށް ނިހާޔަތަށް މައާފަށް އެދޭ ކަމަށެވެ. އަދި މިފަދަ ދަނޑިވަޅުގައި ރައްޔިތުން ދެއްވާ އެހީތެރިކަމާއި އެއްބާރުލުމަށް ޝުކުރު ދަންނަވާ ކަމަށްވެސް ބުންޏެވެ.
