ބަންގްލަދޭޝްގެ ކުރީގެ ބޮޑުވަޒީރު ޚާލިދާ ޒިއާ މިއަދު އަވަހާރަވުމާ ގުޅިގެން ރައީސް ޑރ. މުހައްމަދު މުއިއްޒު ތައުޒިޔާ ވިދާޅުވެއްޖެ އެވެ.
އެ ކަމަނާ އުމުރުން 80 އަހަރުވީ ސިއްހީ ގިނަ މައްސަލަތަކެއް ކުރިމަތިވެ، މިދިޔަ މަހުގެ 23 އިން ފެށިގެން ހޮސްޕިޓަލްގައި އެޑްމިޓްކޮށް ފަރުވާ ދެމުން ދަނިކޮށެވެ.
ހާލިދާ އަވަހާތަވުމާ ގުޅިގެން ސޯޝަލް މީޑިއާ ޕޯސްޓެއްގައި ރައީސް މުއިއްޒު ވަނީ ބަންގްލަދޭޝްގެ ސަރުކާރާއި އެ ޤައުމުގެ ރައްޔިތުންނަށް ތައުޒިޔާ ވިދާޅުވެފަ އެވެ. އަދި މި ހިތާމަވެރި ވަގުތުގައި އެކަމަނާގެ އާއިލާ އަށް މާތްﷲ ކެތްތެރިކަން ދެއްވުމަށް އެދި ދުޢާ ކުރައްވާ ކަމަށް ވެސް ވިދާޅުވި އެވެ.
ބަންގްލަދޭޝްގެ އެންމެ ނުފޫޒު ގަދަ ސިޔާސީ ލީޑަރުންގެ ތެރޭގައި ހިމެނިވަޑައިގަންނަވާ ޚާލިދާ އެ ގައުމުގެ ބޮޑުވަޒީރުކަން ކުރެއްވީ 2001-2006 އަށެވެ. އަދި އޭނަ އަކީ ބަންގްލަދޭޝްގެ އެންމެ ފުރަތަމަ އަންހެން ބޮޑުވަޒީރެވެ.
ޚާލިދާ އަވަހާރަވި އިރު، ގައުމުން ބޭރަށް އަރުވާލެވިގެން ލަންޑަންގައި 17 އަހަރު ދިރިއުޅުއްވުމަށް ފަހު އޭނަގެ ދަރިކަލުން އަދި ބީއެންޕީގެ އެކްޓިން ޗެއާޕާސަން ތާރީގް ރަހުމާން މި މަހުގެ 25 ގައި ބަންގްލަދޭޝް އަށް ވަޑައިގެންފައިވެ އެވެ.
ޚާލިދާގެ ޖަނާޒާ ބާއްވަން ހަމަޖެހިފައި ވަނީ މާދަމާ ކަމަށް މީޑިއާތަކުން ބުނެ އެވެ.
