ނިރުބަވެރި އިސްރާއީލާއެކު މިދިޔަ އަހަރު ކުރި 12 ދުވަހުގެ ހަނގުރާމައިގެ ދުވަސްވަރަށްވުރެ ގައުމުގެ ބާރު މިހާރު އިތުރަށް ގަދަވާނެ ކަމަށް އީރާނުގެ އަސްކަރިއްޔާގެ ޗީފް ކޮމާންޑަރު އާމިރު ހަތާމީ ވިދާޅުވެއްޖެއެވެ.
އެ ގައުމުގެ ތަސްނީމް ނިއުސް އެޖެންސީއަށް ހަތާމީ ވިދާޅުވީ 2025 ވަނަ އަހަރު ހުޅަނގުގެ ޓެކްނޮލޮޖީ އާއި އެހީ ލިބިފައިވާއިސްރާއީލާ ދެކޮޅަށް އެހެން އެއްވެސް ގައުމަކުން ކުރިމަތި ލެވިފައި ނުވާ ވަރަށް އީރާނުން އިސްރަާއީލާއި ކުރިމަތިލި ކަމަށާއި އެއީ ވަރަށް ތަފާތު ވަރުގަދަ ތަޖުރިބާއެއް ކަމަށެވެ.
މި ހަމަނުޖެހުންތަކުގައި އިސްރާއީލުން އީރާނުގެ އަސްކަރޫ މަރުކަޒުތަކަށް ހަމަލާ ދިންއިރު، އީރާނުން ރައްދު ދިނުމުގެ ސަބަބުން އިސްރާއީލުން ބައެއް ސަރަހައްދުތަކަށް ގެއްލުން ލިބުނެވެ. އެމެރިކާ އިން ވަނީ އީރާނުގެ ތިން އަސްކަރީ މަރުކަޒަކަށް ވެސް ހަމަލާ ދީފައެވެ.
”12 ދުވަހުގެ ހަނގުރާމައަށްފަހު ފާއިތުވި ހަ މަސް ދުވަހުގެ ތެރޭގައި ކުރެވުނު ތައްޔާރީތައް ވަރަށް ރަނގަޅަށް،“. އިސްރާއީލާއު އެމެރިކާ އިން އީރާނަށް ކުރިމަތި ކުރުވާ ނުރައްކާތަކަށް ދިފާއުވުމުގެ ގޮތުން ކުރި ތައްޔާރީތަކެއް ކަން ފާހަގަކުރައްވަމުން ހަތާމީ ވިދާޅުވިއެވެ.
ހަތާމީ މިހެން ވިދާޅުވެފައިވާއިރު، އެމެރިކާގެ ރައީސް ޑޮނަލްޑް ޓްރަމްޕް މީގެ ކުރިން ބުނެފައިވާގޮތުގައި، މުޒާހަރާގެ ބައިވެރިންނާ ދެކޮޅަށް އީރާނުން ހިންގަމުންދާ އަނިޔާވެރި އަމަލުތަކުގެ ސަބަބުން އީރާނަށް އަދަބު ދިނުމަށް ”ވަރަށް ހަރުދަނާ“ ގޮތްތަކެއް ވިސްނަމުންދާ ކަމަށެވެ.
