އިރާގުގެ ކަތާއިބު ހިޒްބުﷲ (ހިޒްބުﷲ ބްރިގޭޑްސް) ހަރަކާތުން، އީރާނުގެ ދިފާއުގައި ކުރަންޖެހިދާނެ ކޮންމެ ހަނގުރާމައެއްގައި ބައިވެރިވުމަށް ތައްޔާރަށް އޮތްކަން ހާމަކޮށް، ދުނިޔޭގެ އެކި ކަންކޮޅުތަކުގައި ތިބި މުޖާހިދުން މިކަމަށް ތައްޔާރުވުމަށް ގޮވާލައިފި އެވެ.
އާދީއްތަ ދުވަހުގެ ރޭ ނެރުނު ވަރުގަދަ ބަޔާނެއްގައި، އެ ޖަމާއަތުން ވަނީ ”ކުފުރާއި މުނާފިގުކަމުގެ ލަޝްކަރާ“ ދެކޮޅަށް ނުކުތުމަށް ތައްޔާރަށް ތިބި އެންމެހައި ފަރާތްތަކުން، އީރާނަށް އެހީތެރިވުމަށްޓަކައި ކުރަންޖެހޭ ”ފުރިހަމަ ހަނގުރާމައަކަށް“ ތައްޔާރުވުމަށް އިލްތިމާސްކޮށްފަ އެވެ.
އެ ބަޔާނުގައި އީރާނަކީ މުޅި އިސްލާމީ އުންމަތުގެ އައްޑަނައެއް އަދި ފަޚުރެއްގެ ގޮތުގައި ސިފަކޮށްފައިވެ އެވެ. އަދި ފާއިތުވި ސާޅީހަކަށް އަހަރު ދުވަހުގެ ތެރޭގައި، މަޒްހަބަކަށް، ކުލައަކަށް ނުވަތަ ނަސްލަކަށް ބެލުމެއްނެތި، އަނިޔާލިބެމުންދާ އެންމެހައި މީހުންގެ ހައްގުގައި އީރާނުން ސާބިތުކަމާއެކު މަސައްކަތްކޮށްފައިވާކަން އެ ޖަމާއަތުން ފާހަގަކުރި އެވެ.
މީގެ އިތުރުން، މިހާރު އީރާނަށް ކުރިމަތިވަމުންދާ ނުރައްކާތަކަކީ ޒަޔަނިސްޓުންނާއި އަނިޔާވެރި ބާރުތައް ހިމެނޭ ”ބާތިލްގެ ބާރުތަކުން“، އެ ގައުމު އަޅުވެތިކޮށް ނުވަތަ ހަލާކުކޮށްލުމަށާއި، ދުނިޔޭގެ އަޚްލާގީ މިންގަނޑުތައް ފުނޑުފުނޑުކޮށްލުމަށް ކުރާ މަސައްކަތެއްގެ ގޮތުގައި އެ ބަޔާނުގައި ސިފަކޮށްފައިވެ އެވެ.
އެ ޖަމާއަތުން ވަނީ ދުނިޔޭގެ އިރުމައްޗާއި ހުޅަނގުގައި ތިބި، އީމާންތެރިކަމުން ފުރިގެންވާ އަދި ބާތިލްގެ ބާރުތަކާ ދެކޮޅު އެންމެހައި ”މުޖާހިދު އަޚުންނަށް“، އީރާނުގެ ދިފާއުގައި ފުރިހަމަ އަށް ތައްޔާރުވުމަށް ގޮވާލާފަ އެވެ.
އީރާނުގެ ދުޝްމަނުންނަށް އިންޒާރު ދެމުން އެ ބަޔާނުގައި ބުނެފައި ވަނީ، އެ ގައުމާ ދެކޮޅަށް ކުރާ ހަނގުރާމައަކީ ފަސޭހަ ކަމަކަށް ނުވާނެ ކަމަށާއި، ދުޝްމަނުންނަށް ކުއްލި މަރުގެ ހިތި ރަހަ ލިބި، ހުޅަނގު އޭޝިއާ ސަރަހައްދުން އެމީހުންގެ ނަންވެސް ފޮހެލާނެ ކަމަށެވެ. އިރާގުގެ ހިޒްބުﷲ ހަރަކާތުން ބުނި ގޮތުގައި، މުޅި ސަރަހައްދުން ވެސް އެބައިމީހުންގެ އަސަރު ފޮހެލާނެ ކަމަށެވެ.
ދީނީ ރޫހު އާލާކުރުމުގެ ގޮތުން އެ ބަޔާނުގައި ކީރިތި ގުރުއާނުގެ އާޔަތްތައް ހިމަނާފައިވެ އެވެ. އެގޮތުން، މުޝްރިކުން އެންމެން އެކުވެގެން މުސްލިމުންނާ ހަނގުރާމަކުރާ ފަދައިން، އެމީހުންނާ ދެކޮޅަށް އެންމެން އެކުވެގެން ހަނގުރާމަކުރުމަށާއި، ކާފިރުންގެ ހިތްތަކަށް ބިރުވެރިކަން ވައްދަވާނެކަމުގެ އިންޒާރު އެ ބަޔާނުގައި ދީފައިވެ އެވެ.
އިރާގުގެ ހިޒްބުﷲ އިން އިތުރަށް ބުނި ގޮތުގައި، ސަލާމަތްތެރިކަން އޮތީ ނަސްރަށް ނުވަތަ ޝަހީދުވުމަށް މަސައްކަތް ކުރުމުގަ އެވެ. އަދި އިސްލާމްދީނުގެ ދިފާއުގައި ފުރާނައިން ގުރުބާންވެގެން ކުރާ ޖިހާދުތަކުގައި ބައިވެރިވުމަކީ ވެސް އޮތް މަގެއްކަން އެ ޖަމާއަތުން ފާހަގަކުރި އެވެ.
މި ބަޔާން ނެރެފައި ވަނީ، އެމެރިކާގެ ކުރީގެ ރައީސް ޑޮނަލްޑް ޓްރަމްޕް އީރާނާ ދެކޮޅަށް އަސްކަރީ ބާރުގެ ބޭނުންކުރާނެ ކަމުގެ އިންޒާރު ދެއްވުމާ ގުޅިގެން، ދެ ގައުމުގެ ދެމެދުގައި ނުތަނަވަސްކަން އިންތިހާއަށް އިތުރުވެފައިވާ ދަނޑިވަޅެއްގަ އެވެ.
