ދިވެހިރާއްޖޭގެ ތާރީހުގައި އަމިއްލަަ ފަރާތަކުން ކުރާ އެންމެ ބޮޑު އިންވެސްޓުމެންޓުކަމުގައިވާ އައިލާ ސަސްޓެއިނަބަލް ޓައުންޝިޕްގެ ބިންގާ އަޅައި، 800 މިލިއަން ޑޮލަރުގެ ބޮޑު އިންވެސްޓުމެންޓުގެ އަމަލީ މަސައްކަތް މިއަދު ފަށައިފިއެވެ.
މިއަދު ނ.އަތޮޅުގައި އައިލާ ޓައުންޝިޕް ތަރައްގީކުރުމަށް ހިއްކާފައިވާ ހިތްގައިމު ރަށްތަކުގައި ބޭއްވި ރަސްމިއްޔާތުގައި މި މަޝްރޫއުގެ ބިންގާ އަޅުއްވައިދެއްވީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒެވެ. އެ ރަސްމިއްޔާތުގައި ކެބިނެޓުގެ ވަޒީރުންނާއި ނ.އަތޮޅުގެ ދާއިރާތައް ތަމްސީލުކުރައްވާ ރައްޔިތުންގެ މަޖިލީހުގެ މެންބަރުންނާއި ބޭރު ގައުމުތަކުން ރާއްޖެއަށް ކަނޑައަޅުއްވާފައި ތިއްބަވާ ސަފީރުން ބައިވެރިވެވަޑައިގެންފައިވެއެވެ.
މި ރަސްމިއްޔާތުގައި އައިލާ މަޝްރޫއުގެ ޗީފް އެގްޒެކެޓިވް އޮފިސާ ޕެޓާ ކަރސްޓިކް ދެއްކެވި ވާހަކަފުޅުގައި އޭނާ ފާހަގަކުރެއްވި ގޮތުގައި ސަސްޓެއިނަބަލް ޓައުންޝިޕް މޮޑެލްއަކީ ރައީސް ޑރ.މުޢިއްޒުގެ ތަސައްވުރެކެވެ. އަދި އެ ތަސައްވުރު ހަގީގަތަކަށް ހެދުމަށް ރާއްޖޭގެ އިންވެސްޓުމެންޓު ބޯޑުން އައިލާ މަޝްރޫއަށް އިންވެސްޓުކުރާ ބްލޫ ރޮކް އަދި ކްރިސްޓަލް ހޯލްޑިންސްއާއެކު ވަރަށް ކައިރިން މަސައްކަތްކޮށްފައިވާކަމަށްވެސް އޭނާ ވިދާޅުވިއެވެ.
ރައީސްގެ ޓައުންޝިޕް މޮޑެލްއަށް ތާރީފުކުރައްވަމުން ޕެޓާ ކަރސްޓިކް ވިދާޅުވި ގޮތުގައި މިއީ ރާއްޖޭގެ ތަރައްގީ މުޅިން އައު މިސްރާބަކަށް ވިސްނުންތެެރިކަމާއި ޔަގީންކަމާއެކު ބަދަލުކޮށްލެއްވުމަށް ރައީސް ގެންގުޅުއްވާ ތަސައްވުރު ދައްކުވައިދޭ މޮޑެލްއެއް ކަމަށެވެ. ދެއްވި އެހީތެރިކަމާއި މަގުދެއްކެވުމަށް ރައީސަށް އޭނާ ޝުކުރު އަދާކުރެއްވިއެވެ.
މި މަޝްރޫއުގެ އަމަލީ މަސައްކަަތާ ހަމައަށް އާދެވުނީ ދެފުށް ފެންނަ އަދި ވަރުގަދަ އިޖުރާއީ މަރުހަލާއެއްގެ ތެރެއިން ބޯޑް އޮފް އިންވެސްޓުމެންޓުގެ މަގު ދެއްކުމާއެކުކަން ފާހަގަކުރައްވަމުން ކަރސްޓިކް ވިދާޅުވީ އެ މަރުހަލާގެ ސަބަބުން ރާއްޖޭގެ އިންވެސްޓުމެންޓު އޮނިގަނޑާމެދު އިތުބާރު ގާއިމުވެގެންދިޔަ ކަމަށެވެ.
”800 މިލިއަނާ ގާތްކުރާ އަދަދެއްގެ އިންވެސްޓުމެންޓަކާއެކު ރާއްޖޭގެ ތާރީހުގައި އަމިއްލަ ވިޔަފާރިއަކުން ކުރާ އެންމެ ބޮޑު އިންވެސްޓުމެންޓު ކުރާ އިންވެސްޓަރުގެ ހައިސިއްޔަތުން، ރާއްޖޭގައި އޮތީ ވިޔަފާރިއާ ވަރަށް ރަހުމަތްތެރި އަދި އެހާމެ ހަމަޖެހުން އޮތް އިންވެސްޓުމެންޓު މާހައުލެއް ކަމުގައި އަޅުގަނޑު ދަންނަވަނީ ޔަގީންކަމާއެކު،“ ކަރސްޓިކް ވިދާޅުވިއެވެ.
އިތުރަށް އޭނާ ވިދާޅުވީ ދިވެހިރާއްޖޭގެ މުއައްސަސާތަކުގެ ޕްރޮފެޝަނަލިޒަމާއި، ކުރެވުނު މަޝްވަރާތަކުގެ ދެފުށް ފެންނަ ފެނުމާއެކު، ރާއްޖެއަކީ ޒިންމާދާރުކަމާއެކު ބޮޑު ފުޅާ އިންވެސްޓުމެންޓުތަކަަށް ފަހި މާހައުލެއް އޮތް ގައުމެއް ކަމަށެވެ.
އިތުރަށް އޭނާ ވިދާޅުވީ ސަސްޓެއިނަބަލް ޓައުންޝިޕް މޮޑެލްއާއެކު ރާއްޖެއަށް އިންވެސްޓުކުރުމުގެ މުޅިން އައު ޒަމާނަކަށް އަލިވިލިގެންދާނެ ކަމުގައި ދެކެވަޑައިގަންނަވާ ކަމަށެވެ. އެއީ މިހާރަށްވުރެ ޝާމިލު، ލާމެހިފައިވާ ވިލުންތެރި ޒަމާނަކަށްވާނެ ކަމުގައިވެސް ވިދާޅުވިއެވެ.
ކަރސްޓިކްވަނީ އައިލާ މޯލްޑިވްސް ސަސްޓެއިނަބަލް ޓައުންޝިޕުގައި މުހިއްމު ބައެއް ކަންކަން ފާހަގަކުރައްވާފައެވެ. އެގޮތުން އެ ތަނުގައި ހޮސްޕިޓޭލިޓީ ތައުލީމުގައި ދުނިޔޭގެ މަތީ ފަންތީގެ މުއައްސަސާއަކާ ގުޅިގެން ހިންގާ ހޮސްޕިޓޭލިޓީ އެކަޑެމީއެއް ހުންނާނެކަމަށާއި، އެތަންވާނީ ދިވެހި ފަތުރުވެރިކަމަަށް ބޭނުންވާ ލީޑަރުން ބިނާކޮށް އުފައްދައިދޭ މުއައްސަަސާއަކަށް ކަމުގައި ފާހަގަކުރެއްވިއެވެ.
އައިލާ މަޝްރޫއުގެ ތެރެއިން އެންމެ ޒަމާނީ ފެންވަރުގެ ސިއްހީ ހިދުމަތް ދޭ ފެސިލިޓީއެއް ގާއިމުކުރެވިގެންދާނެކަން ފާހަގަކުރައްވަމުން ކަރސްޓިކް ވިދާޅުވީ އެ މަރުކަޒާއެކު ރާއްޖެ އަދި އައިލާ މަޝްރޫއަކީ ”ވެލްނެސް“ ފަތުރުވެރިންގެ މެދުގައި މަގުބޫލު މަތީ ފަންތީގެ މަންޒިލެއްގެ ގޮތުގައި ހަމަޖެހޭނެ ކަމަށެވެ.
އޭނާ ވިދާޅުވި ގޮތުގައި އެ މަޝްރޫއާމެދު އެންމެ ފަހުރުވެރިވެވަޑައިގަންނަވަނީ އެ މަޝްރޫއުގައި ގާއިމުކުރެވޭ ވަސީލަތްތަކަށް ބޭނުންވާ ހަކަތައިގެ 60 އިންސައްތަ އިއާދަކުރަނަވި ހަކަތައިން އުފެއްދި، ރާއްޖެ އަދި އައިލާ މަޝްރޫއު މުސްތަގުބަލުގެ ޖީލުުތަކަށް ވާސިލުކޮށްދިނުމުގައި ހިއްސާވެވޭތީއެވެ.
”މިއީ އަމިއްލަ ވިޔަފާރިއަކުން ހިންގާ މަޝްރޫއެއް ނަމަވެސް، މަޝްރޫއުން ކުރާނެ އާއްމު އަސަރާމެދު ވަރަށް ބޮޑަށް ސަަމާލުވަން. އަޅުގަނޑުމެންގެ މަގުސަދަކީ ތަފާތު ވަރުގަދަ މަންޒިލެއް ގާއިމުކުރުން އެކަންޏެއް ނޫން. މާނަހުރި ގޮތެއްގައި ރާއްޖޭގެ ތަރައްގީގެ ވާހަކައަށް ހިއްސާކުރުމަކީވެސް އަޅުގަނޑުމެންގެ މުހިއްމު އަމާޒެއް،“ ކަރސްޓިކް ވިދާޅުވިއެވެ.
އޭނާ ވިދާޅުވި ގޮތުގައި މިއަދުން ފެށިގެން އައިލާ މަޝްރޫއުގެ ބިނާކުރުމުގެ މަސައްކަތް ފެށޭނެއެވެ. އަދި ތާވަލުކުރެވިފައިވާ ގޮތަށް މަސައްކަތްކުރެވި 2028 ވަނަ އަހަރުގެ ހޫނު މޫސުމަށް މަޝްރޫއުގެ މަސައްކަތް ނިންމައިލެވޭނެ ކަމުގައި އޭނާ ވިދާޅުވިއެވެ.
މި މަޝްރޫއަކީ ދިގު މުއްދަތުގެ ރަށްވެހިކަމާއި ފަތުރުވެރިކަމާއި، އިންވެސްޓުކުރުމާއި ވަޒަންވެރިކަން ގުޅިގެންދާ ގޮތަށް ފަރުމާކޮށްފައިވާ މަޝްރޫއެކެވެ. މި މަޝްރޫއުގެ ދަށުން ގިނަ އަދަދެއްގެ ޒަމާނީ ވަސީލަތްތައް ގާއިމުކުރެވިގެންދާނެއެވެ. އެގޮތުން ޒަމާނީ ދަނޑުވެރިކަމާއި ސިއްހީ ހިދުމަތްތަކާއި ފެންވަރު ރަނގަޅު ތައުލީމީ ވަސީލަތްތައް އެ މަޝްރޫއުގެ ތެރެއިން ގާއިމުކުރެވޭނެއެވެ.
