ސަރުކާރުގެ ކުންފުންޏަކުން ކުރިއަށް އޮތް ތިން އަހަރުގެ ތެރޭގައި 10 ރިސޯޓު ތަރައްގީކުރަން ނިންމާފައިވާ ކަމަށާއި އެއިން ލިބޭ ފައިދާއިން ކޮންމެ ދިވެއްސަކަށް އަހަރަކު 400 ޑޮލަރު ދޭން ފަށާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ރައްޔިތުންގެ މަޖިލިސް ހުޅުވުމުގެ ޖަލްސާގައި ރިޔާސީ ބަޔާން އިއްވަވަމުން ރައީސް ވިދާޅުވީ ރާއްޖޭގައި ޓޫރިޒަމް ސިނާއަތް ރަސްމީކޮށް ފެށިތާ 50 އަހަރުވީއިރު ވެސް އެކަމުން ދިވެހިންނަށް ސީދާ ގޮތެއްގައި މަންފާ ލިބޭނެ އެއްވެސް މަގެއް ފަހިވެފައިނުވާ ކަމަށެވެ.
ރާއްޖޭގެ އިގުތިސޯދުގައި އެންމެ މުހިއްމު އެއް ދާއިރާއަކީ ޓޫރިޒަމް ސެކްޓާ ކަމަށް ވާއިރު އަމިއްލަ ފަރާތްތަކުން ރިސޯޓުތައް ހިންގަމުން ދަނީ ވެސް ގުދުރަތީ އެސެޓުތައް ދިގު މުއްދަތަކަށް ކުއްޔަށް ނަގައިގެން ކަމަށް އެ މަނިކުފާނު ވިދާޅުވި އެވެ. ނަމަވެސް ރިސޯޓު ވިޔަފާރީގެ ފައިދާ ސީދާ ލިބެން ޖެހޭނީ ދިވެހިންނަށް ކަމަށް ރައީސް ވިދާޅުވި އެވެ.
”އަޅުގަނޑު ގަބޫލުކުރަނީ މި ގުދުރަތީ އެސެޓުތަކުގެ ހަގީގީ ވެރިންކަމުގައިވާ ދިވެހި ހުރިހާ ރައްޔިތުންނަށް ސީދާ އާމްދަނީ ލިބޭނެ މަގެއް، ނިޒާމެއް ހަމަޖެހިގެން ދިއުމަކީ އެންމެ އަދުލްވެރި ގޮތް ކަމުގައި.“
”ސަރުކާރުން މިހާރު ނިންމާފައިވަނީ ކުންފުންޏެއް މެދުވެރކޮށް 3 އަހަރުގެ ތެރޭގައި މަދުވެގެން 10 ރިސޯޓް ތަރައްގީކޮށް، އެ ރިސޯޓުތަކުން ލިބޭ ފައިދާގެ ބޮޑު ބައެއް ހަމަ އެއްވެސް ރައްޔިތަކު ބާކީނުކޮށް ރާއްޖޭގެ ކޮންމެ ރައްޔިތެއްގެ ބޭންކު އެކައުންޓަށް ހަމަހަމަކަމާއެކު އަހަރަކު އެއް ފަހަރު ބޭރު ފައިސާއިން ޖަމާކޮށްދޭނަން.“ ރައީސް ވިދާޅުވި އެވެ.
އެ މަނިކުފާނު ވިދާޅުވީ އެ މަޝްރޫއުން ތަރައްގީކުރާ 10 ރިސޯޓުގެ ހިއްސާދާރުންނަކީ ދިވެހިން ކަމަށް ގާނޫނުން ހަމަޖައްސާނެ ކަމަށެވެ. އަދި އެކަމުގެ ނަތީޖާއަކީ އެ މަޝްރޫއުން ތަރައްގީކުރާ ރިސޯޓުން ލިބޭ ފައިދާ ކޮންމެ ދިވެއްސަކަށް އަހަރުން އަހަރަށް ލިބި، ރިސޯޓު ހިއްސާދާރުގައި ދިވެހިން ލިބި، އޭގެ ފައިދާ ލިބެން ފެށުންކަން ފާހަގަ ކުރެއްވި އެވެ.
ރިސޯޓުތައް ތަރައްގީކޮށް ނިންމައި، 2030 ވަނަ އަހަރުން ފެށިގެން ކޮންމެ ދިވެއްސެއްގެ އެކައުންޓަށް މަދުވެގެން 400 ޑޮލަރު ޖަމާކުރަން ފަށާނެކަން ރައީސް އިއުލާން ކުރެއްވި އެވެ.
”ހިސާބު ހަދާލާއިރު ކޮންމެ ރައްޔިތެއްގެ އެކައުންޓަށް އިރާދަކުރެއްވިއްޔާ އަހަރަކު މަދުވެގެން 400 ޑޮލަރު ޖަމާވެގެންދާނެ. މިސާލަކަށް ފަސް މެމްބަރުންގެ އާއިލާއެއް ނަމަ، ކޮންމެ މެމްބަރެއް، މަދުވެގެން 10 ރިސޮޓުގެ ޝެއާހޯލްޑަރަކަށް ވުމުގެ އިތުރުން އެ އާއިލާއަކަށް މަދުވެގެން 2000 އެމެރިކާ ޑޮލަރު ލިބިގެންދާނެ.“ އެ މަނިކުފާނު ވިދާޅުވި އެވެ.
އެމްއެމްއޭއާ ހަވާލާދީ ރައީސް ވިދާޅުވީ މިދިޔަ އަހަރު ޓޫރިޒަމް އިންޑަސްޓްރީން 5.5 ބިލިއަން ޑޮލަރުގެ އާމްްދަނީ ލިިބުނު ކަމަށެވެ. އެއީ އޭގެ ކުރިީ އަހަރާ އަޅާބަލާއިރު 13 ޕަސެންޓުގެ ކުރިއެރުމެކެވެ.
މި އަހަރު 5.6 ބިލިއަން ޑޮލަރުގެ އާމްދަނީއެއް ލިބޭނެ ކަމަށް އެމްއެމްއޭއިން އަންދާޒާ ކުރާއިރު ސަރުކާރުގެ އަމާޒަކީ ރާއްޖެ އަންނަ ޓޫރިސްޓުންނަށް 2.5 މިލިއަނަށް އިތުރުކޮށް 17 ޕަސެންޓްގެ ކުރިއެރުމެއް ހޯދުމެވެ.
