ބިޒްނަސް އީމެއިލް ހެކް ކޮށްގެން ހިންގާ ސްކޭމްތަކަށް ސަމާލުވާން ފުލުހުން އެދިއްޖެއެވެ.
ފުލުހުން ބުނީ މިއަދުގެ ޑިޖިޓަލް ޒަމާނުގައި ރަސްމީ މުއާމަލާތްތައް ހިންގުމުގައި އީމެއިލަކީ އެންމެ އަސާސީއެއް ވަސީލަތް ކަމަށެވެ. ނަމަވެސް އެއީ ކުށްވެރިން ނަހަމަ ގޮތުގައި އެކައުންޓުތަކަށް އެކްސެސްވުމަށް ބޭނުންކުރާ އެންމެ ނުރައްކާތެރި އެއް ގޮތް ކަމަށާއި ވަކިން ހާއްސަކޮށް، ”ބިޒްނަސް އީމެއިލް ކޮމްޕްރޮމައިޒް“ (ބީ.އީ.ސީ) އަކީ މުޅި ދުނިޔޭގައި ވެސް މާލީ ސްކޭމް ހިންގުމަށާއި ފައިސާ ވަގަށްނެގުމަށް މިހާރު އެންމެ ގިނައިން ބޭނުންކުރަމުންދާ އެއް އުކުޅު ކަމަށް ފުލުހުން ބުނެފައި ވެއެވެ.
އެގޮތުން ފުލުހުން ބުނީ މިފަދަ ސްކޭމްތަކުގައި ކުށްވެރިން އީމެއިލް ފޮނުވަނީ އިތުބާރުކުރެވޭ ފަރާތްތަކަށް ވެގެން ކަމަށާއި އޭގެ ތެރޭގައި ކުންފުނިތަކުގެ ސީ.އީ.އޯގެ ނަމުގައި ގިފްޓް ކާޑު ގަތުމަށް އެދުމާއި، ސަޕްލަޔަރުންގެ ނަމުގައި ބޭންކު އެކައުންޓު ބަދަލުވިކަމަށް ބުނެ މެސެޖު ފޮނުވުން ހިމެނޭ ކަމަށް ފުލުހުން ބުނެފައި ވެއެވެ.
”މިވަގުތު މީޓިންގްއެއްގައި މި އިނީ، ވަރަށް އަވަހަށް މުވައްޒަފުންނަށް ބަހަން 50 ގިފްޓް ކާޑު ގަނެލަދީފައި އޭގެ ސީރިއަލް ނަންބަރު ފޮނުވާލަދީބަލަ.“ އެފަދަ މެސެޖުތައް ހުންނާނީ މިކަހަލަ ގޮތަކަށް ކަމަށް ފުލުހުން ބުނެފައި ވެއެވެ.
”އަޅުގަނޑުމެންގެ ބެންކު އެކައުންޓަށް ބަދަލެއް އަތުވެއްޖެ. މީގެ ފަހުން ފައިސާ ޖަމާކުރަންވާނީ މި އެކައުންޓަށް.“ ސަޕްލަޔަރުގެ ނަމުގައި އަންނާނީ މިފަދަ ގޮތަކަށް ކަމަށް ފުލުހުން ބުންޏެވެ.
”ގޯތީގެ އެޑްވާންސް ފައިސާ ޓްރާންސްފަރ ކުރަންވީ މިހާރު މި އީމެއިލްގައިވާ އެކައުންޓަށް.“ ލޯޔަރުގެ ނަމުގައި އަންނާނީ މިކަހަލަ ގޮތަކަށް ކަމަށް ފުލުހުން ބުނެފައި ވެއެވެ.
ފުލުހުން ވަނީ ސޯޝަލް މީޑިއާގައި އަމިއްލަ މައުލޫމާތު ހާމަނުކުރުމަށާއި، އީމެއިލް މެދުވެރިކޮށް ލިބޭ ލިންކުތަކަށް ނުފިއްތުމަށާއި އީމެއިލް އެޑްރެސްތަކުގައި ހުންނަ ކުދިކުދި ތަފާތުތަކަށް ސަމާލުވުމަށާއި، ހުރިހާ އެކައުންޓެއްގައި ’ޓޫ-ފެކްޓަރ އޮތެންޓިކޭޝަން‘ ބޭނުންކުރުމަށް އެދިފައެވެ.
އަދި ފައިސާގެ މުއާމަލާތެއް ނުވަތަ އެކައުންޓް ނަންބަރު ބަދަލުކުރަން ބުނެފިނަމަ، އީމެއިލްގައިވާ ނަންބަރުގެ ބަދަލުގައި ކުރިން ވެސް ގުޅުމަށް ބޭނުންކުރި ނަންބަރަށް ގުޅައި އެކަން ކަށަވަރުކުރުމަކީ މުހިންމު ކަމެއް ކަމަށްވެސް ފުލުހުން ހާމަކުރިއެވެ.
ހަމައެހެންމެ މިފަދަ ކަމެއް ދިމާވެއްޖެނަމަ، ލަސްނުކޮށް ބޭންކަށް ގުޅައި ފައިސާ ހިފެހެއްޓޭތޯ މަސައްކަތް ކުރުމަށާއި، ފުލުހުންގެ އެންޓި-ސްކޭމް ސެންޓަރުގެ ނަންބަރު 125 އަށް ގުޅައި އެކްސްޓޭންޝަން 2020 ރިޕޯޓުކުރުމަށް ފުލުހުން ވަނީ އެދިފައެވެ.
މީގެ އިތުރުން ހޭލުންތެރިވެ ތިބެ ރައްކާތެރިކަމާއެކު އީމެއިލް ބޭނުންކުރުމަށް ފުލުހުން ވަނީ އެދިފައެވެ.
