ބަންގްލަދޭޝްގައި އިއްޔެ ބޭއްވި އެގައުމުގެ 13 ވަނަ އާންމު އިންތިހާބުގައި ބަންގްލަދޭޝް ނޭޝަނަލިސްޓް ޕާޓީ (ބީއެންޕީ) އިން ހޯދި ކާމިޔާބީއަށް ރައީސް، ޑރ. މުހައްމަދު މުއިއްޒު މަރުހަބާ ދަންނަވައިފި އެވެ.
އެކްސްގައި ކުރެއްވި ޕޯސްޓެއްގައި، ރައީސް ވަނީ އެ ޕާޓީގެ ލީޑަރު ތާރިޤް ރަޙްމާނަށް އިންތިޚާބީ ކާމިޔާބީގެ ތަހުނިޔާ ދަންނަވާފަ އެވެ. އަދި ރާއްޖެއާއި ބަންގްލަދޭޝްއާ ދެމެދު އޮތް ޒަމާންވީ ގާތް ރަޙުމަތްތެރިކަމާއި އެއްބާރުލުން އިތުރަށް ހަރުދަނާކޮށް ބަދަހިކުރުމަށްޓަކައި، ގާތްކޮށް މަސައްކަތްކުރެއްވުމަށް އުންމީދުކުރައްވާކަމަށް ރައީސްގެ ޕޯސްޓުގައިވެ އެވެ.
މީގެ އިތުރުން، ކުރިއަށް އޮތް އަހަރުތަކުގައި ދެ ޤައުމުގެ ދޭދޭ ގުޅުން އެކި ދާއިރާތަކުން ފުޅާވެ، އިތުރަށް ވަރުގަދަވެގެންދާނެކަމުގެ ފުރިހަމަ ޔަޤީންކަން އެބައޮތްކަމަށް ވެސް ވިދާޅުވި އެވެ.
އިންތިޚާބުގެ ވަގުތީ ނަތީޖާ ދައްކާގޮތުން، 300 ގޮނޑި ހިމެނޭ ގާނޫނު ހަދާ މަޖިލީހުގެ 209 ގޮނޑި ކާމިޔާބުކޮށްފައިވަނީ ބީއެންޕީ ހިމެނޭ އިއްތިހާދުންނެވެ. މިއީ މަޖިލީހުގެ ތިންބައިކުޅަ ދެބައި އަޣުލަބިއްޔަތެކެވެ. ބީއެންޕީއާ އެންމެ ގާތުން ވާދަކުރި ޖަމާއަތޭ އިސްލާމީ ޕާޓީއަށް ލިބިފައިވަނީ 68 ގޮނޑިއެވެ.
