އީރާނަށް އަސްކަރީ ހަމަލާއެއް ދިނުމަށް ހުއްދަ ދިނުމާ މެދު އަދި ވަކި ގޮތެއް ނުނިންމާ ކަމަށާއި އެ ގައުމުގެ އަމަލުތައް ހުރި ގޮތާ މެދު ހިތްހަމަނުޖެހޭ ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުނެފިއެވެ.
ވައިޓް ހައުސްއިން ނުކުމެ، ނޫސްވެރިންނާ ވާހަކަ ދައްކަމުން ޓްރަމްޕް ބުނީ، އޭނާ އަސްކަރީ ބާރުގެ ބޭނުން ކުރަން ބޭނުން ނުވި ނަމަވެސް، ބައެއް ހާލަތްތަކުގައި އެކަން ކުރަން ޖެހޭ ކަމަށެވެ. ޓްރަމްޕް ތުހުމަތު ކުރި ގޮތުގައި، ނިއުކްލިއާ ހަތިޔާރު ނުގެންގުޅޭ ކަމަށް ބުނެ އީރާނުން ދޮގު ހަދަމުން އަންނަ ކަމަށެވެ. ނަމަވެސް، އިރާނުގެ އޮފިޝަލުން ތަކުރާރުކޮށް ވިދާޅުވަމުން ގެންދަވަނީ އެގައުމުގެ ނިއުކްލިއާ ޕްރޮގްރާމަކީ ހަކަތައާއި، ސިއްހީ އަދި އިގްތިސާދީ ބޭނުންތަކަށް ކުރިއަށްގެންދާ މަދަނީ މަސައްކަތެއް ކަމަށެވެ.
”އަހަރެންގެ ވެރިކަމެއްގައި އީރާނަށް ދުވަހަކުވެސް ނިއުކްލިއާ ހަތިޔާރެއް ނުލިބޭނެ،“ ޓްރަމްޕް ބުންޏެވެ.
އޭނާ ބުނީ އިރާނާ މެދު އަދި ވަކި ގޮތެއް ނުނިންމި ނަމަވެސް، މިހާރުން މިހާރަށް އެއްބަސްވުމަކަށް އަންނަން ބޭނުންވާ ކަމަށެވެ. އެހެންނޫނީ ހަމަލާދޭން ޖެހިދާނެ ކަމަށް ވެސް ޓްރަމްޕް ބުނެފައިވެއެވެ.
މި މައްސަލައިގައި އިތުރު މަޝްވަރާތައް މިއަދު ކުރިއަށްދާނެ ކަމަށް ޓްރަމްޕް ފާހަގަކުރިއެވެ. މިގޮތުން، އެމެރިކާގެ ނައިބު ރައީސް ޖޭ.ޑީ ވޭންސް، އީރާނާއި އެމެރިކާއާ ދެމެދު މެދުވެރިއެއްގެ ދައުރު އަދާކުރާ އޮމާންގެ ފޮރިން މިނިސްޓަރާ ބައްދަލުކުރުމަށް ވަނީ ހަމަޖެހިފައެވެ. އީރާނުގެ ވެރިކަން ބަދަލުކުރުމާ ބެހޭގޮތުން ކުރެވުނު ސުވާލަކަށް ޖަވާބު ދެމުން ޓްރަމްޕް ބުނީ، އެއީ ވެދާނެ ނުވަތަ ނުވެދާނެ ކަމެއް ކަމަށެވެ.
މި ނުތަނަވަސްކަމުގެ ތެރޭގައި، އިސްރާއީލުގައި ހުންނަ އެމެރިކާގެ އެމްބަސީން ވަނީ ސަލާމަތީ ނުރައްކާތަކާ ހުރެ މުހިންމު ނޫން މުވައްޒަފުންނާއި އެމީހުންގެ އާއިލާތައް އެ ގައުމުން ބޭރުކުރުމަށް ނިންމައިފައެވެ. އަދި އެމެރިކާގެ ސްޓޭޓް ޑިޕާޓްމަންޓުން ވަނީ އެމެރިކާގެ ރައްޔިތުން އިސްރާއީލުން ފޭބުމަށް އިރުޝާދުދީފައެވެ.
ޖެނީވާގައި ބޭއްވުނު މަޝްވަރާތަކަށްފަހު އީރާނުގެ ފޮރިން މިނިސްޓަރު އައްބާސް އަރަގްޗީ ވިދާޅުވީ، ބައެއް ކުރިއެރުންތައް ލިބިފައިވާ ކަމަށާއި އަންނަ ހަފުތާގައި އޮސްޓްރިއާގެ ވިއެންނާގައި ”ޓެކްނިކަލް ލެވެލް“ ގެ ވާހަކަތައް ކުރިއަށްދާނެ ކަމަށެވެ. އެމެރިކާގެ އޮފިޝަލުންވެސް ވަނީ މި ބައްދަލުވުންތަކަކީ އުންމީދީ ބައްދަލުވުންތަކެއްގެ ގޮތުގައި ސިފަކޮށްފައެވެ.
