އިސްރާއީލުގެ ވެރިރަށް ޓެލްއަވީވަށް ވަރުގަދަ ރޮކެޓް ހަމަލާތަކެއް އަމާޒުވެ، އެ ސިޓީގެ އެކި ސަރަހައްދުތަކުގައި ބޮޑެތި ގޮވުންތަކެއްގެ އަޑު އިވެމުންދާ ކަމަށް އިސްރާއީލުގެ މީޑިއާތަކުން ރިޕޯޓްކޮށްފިއެވެ.
މި ހަމަލާތަކާ ގުޅިގެން މުޅި ޓެލްއަވީވްގައި ވަނީ ނުރައްކަލުގެ ރަނގަބީލު އަޅާފައެވެ. އިސްރާއީލުގެ މީޑިއާތަކުން މި ހަމަލާތައް ސިފަކޮށްފައިވަނީ ”ރޮކެޓްތަކުގެ ތޫފާނެއް“ ގެ ގޮތުގައެވެ. މި ހަމަލާތަކުގެ ސަބަބުން އިސްރާއީލުގެ ރައްޔިތުންގެ މެދުގައި ބޮޑު ބިރުވެރިކަމެއް އުފެދި، ގިނަ ބަޔަކު ވަނީ ރައްކާތެރި ބަންކަރުތަކަށް ވަދެފައެވެ.
މި ހަމަލާތަކާ އެކު، ޔަމަނުގެ ހޫތީން ވަނީ އިސްރާއީލަށް ހަމަލާދޭން ފެށިކަން ރަސްމީކޮށް އިއުލާންކޮށްފައެވެ.
ޔަމަނުގެ ހަނގުރާމަވެރި ޖަމާއަތުން ބުނި ގޮތުގައި، އިސްރާއީލުގެ އެކި ސަރަހައްދުތަކަށް އަމާޒުކޮށް ގިނަ އަދަދެއްގެ ބެލިސްޓިކް މިސައިލާއި ޑްރޯން ބޭނުންކޮށްގެން ހަމަލާތައް ކުރިއަށް ގެންދާނެއެވެ. ޓެލްއަވީވަށް ދެވުނު މި ވަރުގަދަ ހަމަލާއަކީ އީރާނަށް ދިން ހަމަލާގެ ފެށުމެއް ކަމަށްވެސް އެ ފަރާތުން ވަނީ ބުނެފައެވެ.
