އީރާނުން އިސްރާއީލުގެ އެކި ސަރަހައްދުތަކަށް އަމާޒުކޮށް ވަރުގަދަ މިސައިލް ހަމަލާތަކެއް ދީފިއެވެ. މި ހަމަލާތަކުގެ ތެރެއިން އިސްރާއީލުގެ ބެއިޓް ޝެމޭޝް ސަރަހައްދަށް އަމާޒުވި ހަމަލާތަކުގައި ގިނަ ބަޔަކު މަރުވެފައިވާ ކަމަށް ރިޕޯޓްތައް ބުނެފިއެވެ.
މި ހަމަލާތަކަކީ އިސްރާއީލުގެ އިސްތިއުމާރީ ބާރުތަކުން ހިންގަމުންދާ އުދުވާނުތަކަށް ރައްދު ދިނުމުގެ ގޮތުން އީރާނުން ފޮނުވާލި މިސައިލްތަކެއް ކަމަށް ބެލެވެއެވެ. ބެއިޓް ޝެމޭޝްއަށް ވެއްޓުނު މިސައިލްތަކުގެ ސަބަބުން އެ ސަރަހައްދުގެ އިމާރާތްތަކަށް ބޮޑެތި ގެއްލުންތަކެއް ލިބި، ގިނަ އަދަދެއްގެ ބަޔަކު ޝަހީދުވެފައިވާ ކަމުގެ މައުލޫމާތު ވަނީ ލިބިފައެވެ.
”އީރާނުގެ މިސައިލް ހަމަލާތައް އަމާޒުވީ އިސްރާއީލުގެ މުހިންމު ސަރަހައްދުތަކަށް،“ ކަމަށް ބައިނަލްއަގުވާމީ މީޑިއާތަކުން ރިޕޯޓް ކުރެއެވެ. މި ހަމަލާތަކާ ގުޅިގެން އިސްރާއީލުގެ އެކި ކަންކޮޅުތަކުގައި ނުރައްކަލުގެ ރަނގަބީލު ޖަހާފައިވާއިރު، އާންމުން ވަނީ ރައްކާތެރި ތަންތަނަށް ވަދެފައެވެ.
މި ހަމަލާއާ ގުޅިގެން މެދުއިރުމަތީގެ މަސްރަހު އިތުރަށް ނުތަނަވަސްވެފައިވާއިރު، އިސްރާއީލުން މި ހަމަލާއަށް ރައްދު ދޭނެ ކަމަށް ބެލެވެއެވެ. ނަމަވެސް މިހާތަނަށް އިސްރާއީލުގެ އަސްކަރިއްޔާއިން މިކަމާ ގުޅޭގޮތުން ރަސްމީ ބަޔާނެއް ނެރެފައެއް ނުވެއެވެ.
