ފަހި ދިރިއުޅުން ކޯޕަރޭޝަން (އެފްޑީސީ) އިން ދޫކޮށްފައިވާ ސޯޝަލް ހައުސިންގް ފްލެޓްތައް ސަބް-ލީސް ކުރުމަކީ ނުވަތަ އެހެން ފަރާތްތަކަށް ކުއްޔަށްދޫކުރާ ފަރާތްތައް 50,000 ރުފިޔާއިން ޖޫރިމަނާކޮށް ފްލެޓް އަތުލާނެ ކަމުގެ އިންޒާރު އެ ކޯޕަރޭޝަނުން ދީފިއެވެ.
އެފްޑީސީ އިން މިހެން ބުނެފައި މިވަނީ ”އަމާން ދޯދި“ މަޝްރޫއުގެ ފްލެޓެއް ކުއްޔަށް ދިނުމަށް ސޯޝަލް މީޑިއާގައި އިޝްތިހާރު ކުރި މައްސަލައެއް ފެންމަތިވުމާ ގުޅިގެންނެވެ.
އެފްޑީސީގެ މެނޭޖިންގް ޑިރެކްޓަރު ހަމްދާން ޝަކީލް ވިދާޅުވީ ސަރުކާރުން ބޮޑު ސަބްސިޑީއެއް ދީގެން އާންމުންނަށް ފޯރުކޮށްދޭ މި ފްލެޓްތައް ވިޔަފާރި އުސޫލުން ކުއްޔަށް ދޫކޮށްގެން ނަފާ ހޯދުމަކީ ބޯހިޔާވަހިކަމުގެ މަޝްރޫއުތަކުގެ އަސްލު މަގްސަދު ގެއްލޭ ކަމެއް ކަމަށެވެ. އަދި އެތައް ރައްޔިތުންގެ ހައްގަކަށް އަރައިގަތުން ކަމަށެވެ.
މި މައްސަލަ ބަލައި ފިޔަވަޅު އެޅުމަށް އެފްޑީސީގެ ޓީމަށް މިހާރު އަންގާފައިވާ ކަމަށާއި، ގަވާއިދާ ހިލާފަށް ފްލެޓް ކުއްޔަށް ދޫކުރާ ފަރާތްތަކުގެ އެގްރީމެންޓް ބާތިލްކުރާނެ ކަމަށްވެސް އޭނާ ވިދާޅުވިއެވެ.
ސޯޝަލް މީޑިއާގައި ދައުރުވަމުންދާ ޕޯސްޓުގައި ކުއްޔަށް ދިނުމަށް ޖަހާފައިވަނީ އެފްޑީސީގެ އަމާންދޯދީގެ ޓަވަރެއްގައި ހިމެނޭ އެޕާޓްމަންޓެކެވެ. އެފްޑީސީން އެތަނުގެ ވެރިފަރާތަށް ކުއްޔަށްދީފައިވަނީ 10،500 ރުފިޔާއަށެވެ.
އެ ފްލެޓް ކުއްޔަށް ދިނުމަށް ސޯޝަލް މީޑިއާގައި ޖެހުމާއެކު އާންމުންގެ ގިނަ ބަޔަކު ދަނީނުރުހުން ފާޅުކޮށް، ބޯހިޔާވަހިކަމަށް ބޭނުންވެފައިވާ އެތައް ބަޔަކު ތިއްބާ މިފަދަ ކަންކަން ހިނގާތީ ސަރުކާރުގެ ސަމާލުކަމަށް އެކަން ގެނެސްފައެވެ.
ބޯހިޔާވަހިކަމުގެ މަޝްރޫޢުގެ ދަށުން ހުޅުމާލޭގައި ތަރައްޤީކޮށްފައިވާ 4000 ހައުސިން ޔުނިޓުތައް ހަވާލުކުރަމުންދަނީ ފިނިޝިން ހުރިހާ މަސައްކަތެއްވެސް ނިންމުމަށްފަހުއެވެ.
އެގޮތުން ފަހިދިރިއުޅުން ފްލެޓްތަކަކީ އިޖްތިމާއީ ބޯހިޔާވަހިކަމުގެ ދަށުން ސަރުކާރުން ހެޔޮ އަގުގައި ދޫކޮށްފައިވާ ފްލެޓްތަކެކެވެ. މި 4000 ފްލެޓްތަކުގައި 3 ކޮޓަރިއާއި ދެކޮޓަރީގެ ފްލެޓްތައް ހުރިއިރު، މިތަންތަން ކުއްޔަށް ދިނުމަކީ އެތަންތަނުގެ ވެރިންނާއެކު ވެފައިވާ އެއްބަސްވުމާއިވެސް ހިލާފު ކަމެކެވެ.
