ގަލްފް ކަނޑުގެ ސަރަހައްދަށް ވަންނަ ކޮންމެ އެމެރިކާގެ އުޅަނދެއް ކަނޑު އަޑިއަށް ފައްތާލާނެ ކަމުގެ އިންޒާރު އީރާނުން ދީފިއެވެ.
އީރާނުގެ އަސްކަރިއްޔާގެ ތަރުޖަމާނަކު މިގޮތަށް އިންޒާރު ދެއްވީ އެމެރިކާ އާއި އިސްރާއީލާ ގުޅިގެން އީރާނަށް ބޮން އަޅަމުން އަންނަ ދަނޑިވަޅެއްގައެވެ. ރައްދުގައި އީރާނުން ވެސް ދަނީ މެދުއިރުމަތީގައި ހުރި ގައުމުތަކުގެ ތެރެއިން އެމެރިކާގެ އަސްކަރީ މަރުކަޒުތައް ހުރި ތަންތަނަށް މިސައިލް ހަމަލާތައް ދެމުންނެވެ.
އީރާންގެ އިންޒާރު މިގޮތަށް މިއައީ ”ވީ އެންމެ އަވަހަކަށް“ ހޯމުޒް ކަނޑުއޮޅިން ތެޔޮ ޓޭންކަރުތައް އެސްކޯޓުކުރަން އެމެރިކާގެ ކަނޑުގެ ސިފައިން ފަށާނެ ކަމަށް މި ހަފްތާގެ ކުރީކޮޅު އެމެރިކާގެ ރައީސް ޑޮނަލްޑް ޓްރަމްޕް ބުނެފައިވާ ދަނޑިވަޅެއްގައެވެ.
މިދިޔަ ހޮނިހިރު ދުވަހު އިސްރާއީލާއި އެމެރިކާ ގުޅިގެން އީރާނަށް ހަމަލާދީ އެ ގައުމުގެ ރޫހީ ލީޑަރު އާޔަތުﷲ އަލީ ޚާމަނާއީ އާއި އީރާންގެ އަސްކަރިއްޔާ އަދި ސަރުކާރުގެ އިސްވެރިންތަކެއް އަވަހާރަކޮށްލުމާ ގުޅިގެން އީރާނުން ރައްދުގައި ގެންދަނީ އިސްރާއީލަށާއި މެދުއިރުމަތީގެ ގައުމުތަކުގެ ތެރެއިން އެމެރިކާގެ އަސްކަރީ މަރުކަޒުތައް ހުރި ގައުމުތަކަށް ހަމަލާތައް ދެމުންނެވެ.
އޭގެ ތެރޭގައި ސައުދީ އަރަބިއްޔާ، ބަހްރެއިން، ގަތަރު، ކުވައިތު، ޔޫއޭއީ، އުރުދުން ފަދަ ގައުމުތައް ހިމެނެއެވެ. އީރާނުން ދެމުން އަންނަ ހަމަލާތަކާ އެކުގައި މުޅި މެދުއިރުމަތީގައި ވަނީ ހަނގުރާމަ ފެށިފައެވެ.
