ދެހާސް އަށާވީސް ވަނަ އަހަރު ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި، އެމްޑީޕީގެ ކުރީގެ ޗެއާޕާސަން ފައްޔާޒު އިސްމާއީލްގެ ބަދަލުގައި ވާދަކުރައްވާނީ ކުރީގެ ރައީސް މުޙައްމަދު ނަޝީދު ކަމަށް ރައްޔިތުންގެ މަޖިލީހުގެ މާފަންނު މެދު ދާއިރާގެ ކުރީގެ މެންބަރު އިބްރާހީމް ރަޝީދު (ބޮންޑޭ) ވިދާޅުވެއްޖެއެވެ.
އެސްއެސްޓީވީގެ ’ބާރު ހަތަރެއް‘ ޕްރޮގްރާމުގައި ވާހަކަދައްކަވަމުން ބޮންޑޭ ވިދާޅުވީ، ކުރިއަށް އޮތް ރިޔާސީ އިންތިޚާބުގައި ރައީސް ނަޝީދު ވާދަކުރެއްވުމަށް ފައްޔާޒު ވެސް ތާއީދުކުރައްވާނެ ކަމަށެވެ. އަދި އެމްޑީޕީން ފައްޔާޒު ވެރިކަމަށް ނެރުމަށް ތައްޔާރުވަނީ 2033 ވަނަ އަހަރުގެ ރިޔާސީ އިންތިޚާބުގައި ކަމަށް އޭނާ ފާހަގަކުރެއްވިއެވެ.
”2028 ގެ ފަހުން އަންނަ އިންތިޚާބަކީ ވަރަށް ބޮޑު ބަދަލެއް. އެ އިންތިޚާބުގައި ފައްޔާޒު ކުރިމަތިލައްވާނީ. އެކަމަކު، 2028 ގައި ނުކުންނަވާނީ ރައީސް ނަޝީދު. ފައްޔާޒު ވެސް އެކަން ގަބޫލުކުރައްވާނެ،“ ބޮންޑޭ ވިދާޅުވިއެވެ.
ބޮންޑޭ އިތުރަށް ވިދާޅުވި ގޮތުގައި، 2028 ގެ ސަރުކާރެއްގައި ފައްޔާޒު އިޚްތިޔާރުކުރައްވާނީ ނައިބު ރައީސްކަން ނުވަތަ ދައުލަތުގެ އެހެން އިސް މަގާމެކެވެ. އަދި އެކަން އެމްޑީޕީގެ ކޮންގްރެސްގެ ތެރެއިން ނުވަތަ އެ ނޫން ވެސް ގޮތަކުން ހަމަޖެހިގެންދާނެ ކަމަށް އޭނާ ވިދާޅުވިއެވެ. މީގެއިތުރުން، ވެރިކަމަށް އައުމަށްޓަކައި ޕާޓީގެ އެތެރޭގައި އުފެދޭ ދެބަސްވުންތަކުގެ ސަބަބުން ލިބޭ ގެއްލުން މާޒީގެ ތަޖުރިބާއިން އެމްޑީޕީގެ މެންބަރުންނަށް ވަރަށް ސާފުކޮށް އެނގޭނެ ކަމަށާއި، ގައުމަށް ފާގަތި މުސްތަގުބަލެއް ހޯދައިދެވޭނީ ރައީސް ނަޝީދު ކުރިމަތިލައްވައިގެން ކަމަށް ވެސް އޭނާ ވިދާޅުވިއެވެ.
ބޮންޑޭ މިފަދައިން ވިދާޅުވި ނަމަވެސް، ރައީސް ނަޝީދު މިދިޔަ ހަފުތާގައި ވިދާޅުވެފައިވަނީ، އެ މަނިކުފާނަށް ތާއީދުކުރާ ގިނަ ބަޔަކު ތިބި ނަމަވެސް، އެ މަނިކުފާނު ހުންނެވީ 2028 ގެ ވެރިކަމަށް ފައްޔާޒު ގެނައުމަށް ތާއީދުކުރައްވައިގެން ކަމަށެވެ. އަދި އެ މަނިކުފާނު ވަނީ ރިޔާސީ ޓިކެޓަށް ފައްޔާޒު އެންޑޯސް ވެސް ކުރައްވާފައެވެ.
މީގެކުރިން ސިޔާސީ ގޮތުން ޚިޔާލުތަފާތުވުންތަކެއް ހުރި ނަމަވެސް، ރައީސް ނަޝީދާއި ފައްޔާޒު ގުޅިގެން މަސައްކަތްކުރައްވާތާ މިހާރު އަހަރަކަށްވުރެ ގިނަ ދުވަސް ވެއްޖެއެވެ. މި ގޮތުން ދެ ބޭފުޅުން ގުޅިވަޑައިގެން ’ބޮޑު ބަދަލު‘ ގެ ނަމުގައި، ވެރިކަމުގެ ނިޒާމަށާއި ގާނޫނުއަސާސީއަށް ގެންނަން ފެންނަ މުހިންމު އިސްލާހުތަކެއް ވެސް ވަނީ ހުށަހަޅުއްވާފައެވެ.
އޭގެ ތެރޭގައި ދައުލަތުގެ އެންމެ އިސްވެރިޔާ އާއި ސަރުކާރުގެ އެންމެ އިސްވެރިޔާ ވަކިކުރުމާއި، މަޖިލީހާއި މިނިވަން މުއައްސަސާތަކުގެ ހިންގުމަށް ގެންނަންޖެހޭ ބަދަލުތައް ހިމެނެއެވެ.
ކުރިއަށް އޮތް ރިޔާސީ އިންތިޚާބުގައި އެމްޑީޕީގެ ޓިކެޓަށް ރައީސް ނަޝީދު ވާދަކުރެއްވުމަށް އެ ޕާޓީގެ ގިނަ މެންބަރުންތަކެއް އެދެމުންދާ ކަމުގެ އަޑުތައް ފެތުރިފައިވާއިރު، ފައްޔާޒުގެ އިތުރުން ޕާޓީގެ ރައީސް ޢަބްދުﷲ ޝާހިދާއި ކުރީގެ ނައިބު ރައީސް ފައިޞަލް ނަސީމް ވެސް ޕްރައިމަރީގައި ވާދަކުރައްވަފާނެ ކަމަށް ވަނީ އަޑުފެތުރިފައެވެ.
