ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު 2023ގެ ރިޔާސީ އިންތިހާބުގައި ވާދަކުރެއްވުމަށް އެ ޕާޓީގެ ޓިކެޓް ހޯއްދެވުމަށް ރިޔާސީ ޕްރައިމަރީގައި ވާދަކުރައްވާނެކަމުގެ އަޑުތައް ޕާޓީގެ ތެރެއިން ގަދަވެއްޖެ އެވެ.
ޕްރައިމަރީ ބާއްވާނެ ތާރީހެއް އެމްޑީޕީން ރަސްމީކޮށް ނުނިންމި ނަމަވެސް، އެ ޕާޓީން މަސައްކަތް ކުރަމުން ދަނީ އަންނަ ޖެނުއަރީ މަހުގެ ފަހުކޮޅު ޕްރައިމަރީ ބޭއްވުމަށެވެ. ނަޝީދާ ގާތް ބައެއް މެންބަރުން މިއަދު ’ދައުރު’އަށް ވިދާޅުވި ގޮތުގައި، އެ މަނިކުފާނު އެ ޕްރައިމަރީގައި ވާދަކުރައްވާނެ އެވެ.
”އަދި ސީދާ މުޅިއަކުން ނުނިންމަވާ. މިއަދުގެ ވަގުތެއްގައި ފައިނަލް ނިންމުމެއް ނިންމަވާނެ. ބޮޑަށް ބެލެވެނީ ވާދަކުރައްވާނެހެން، އެގޮތަށް ނިންމަވައިގެން އެ ހުންނެވީ،“ އެމްޑީޕީގެ ގައުމީ މަޖިލީހުގެ މެންބަރަކު ނަން ނުޖެހުމަށް ޝަރުތުކޮށް ވިދާޅުވި އެވެ.
ނަޝީދާ އަރިސް އެމްޑީޕީގެ މަޖިލިސް މެންބަރުން ވެސް ވިދާޅުވީ ޕްރައިމަރީގައި ނަޝީދު ވާދަކުރައްވާނެ ކަމަށެވެ.
”ޕްރައިމަރީ ވޯޓު ކަރުދާހުގައި ރައީސް ނަޝީދުގެ ނަން އޮންނާނެ،“ އެމްޑީޕީގެ މަޖިލިސް މެންބަރަކު ވިދާޅުވި އެވެ.
ރައީސް ސޯލިހްގެ ފެކްޝަންގައި އިސްކޮށް އުޅުއްވާ ބޭފުޅަކު ވެސް މިއަދު ’ދައުރު’އަށް ވިދާޅުވީ ނަޝީދު ޕްރައިމަރީގައި ވާދަކުރައްވާނެ ކަމުގެ އަޑުތަކެއް ޕާޓީގެ އިސް ބޭފުޅުންގެ މެދުގައި އެބައޮތް ކަމަށެވެ.
ނަޝީދު ޕްރައިމަރީގައި ވާދަކުރައްވާނެކަމުގެ އަޑުތައް ގަދަވިއިރު، އެ ޕާޓީގެ ތެރޭގައި އޮތް ދެ ފެކްޝަންގެ ކޯޅުން ވަނީ ވަރަށް ބޮޑަށް ބޮޑުވެފަ އެވެ. އެގޮތުން، މިދިޔަ ހަފްތާގެ ތެރޭގައި އެމްޑީޕީގެ ގްރޫޕެއްގައި ނަޝީދު ވަނީ، ރައީސް ސޯލިހަށް ދެވަނަ ދައުރެއް ދިނުމަށް ތާއީދު ނުކުރައްވާ ކަމަށް ވިދާޅުވާ ވިދާޅުވުން ތަކުރާރުކުރައްވާފަ އެވެ.
އޭގެ އިތުރުން، މިދިޔަ ބުރާސްފަތި ދުވަހު މަޖިލީހުގައި ބޭއްވި ބަޖެޓް ބަހުސްގައި ނަޝީދު ފެކްޝަންގެ މެންބަރުން ވަނީ ރައީސް ސޯލިހަށް ދެވަނަ ދައުރެއް ދިނުމާ މެދު ސުވާލު އުފައްދަވާފަ އެވެ.
މި ޒުވާބު އެމްޑީޕީގެ ގައުމީ މަޖިލީހުގެ ވަޓްސްއެޕް ގްރޫޕުގައި ވެސް ކުރި އެވެ. ދެ ފެކްޝަންގެ މެންބަރުންގެ ޒުވާބާ އެކު، އެ ގްރޫޕުގެ މެންބަރުންނަށް މެސެޖް ނުކުރެވޭ ގޮތަށް ވެސް ވަނީ ހަދާފަ އެވެ.
