ޓިކްޓޮކުން ބުނާ ގޮތުގައި އެމެރިކާގައި ޓިކްޓޮކް މަނާކުރާ ނުވަތަ ވިއްކާލަން މަޖުބޫރުކުރާ ގާނޫނާ ދެކޮޅަށް ކޯޓަށް ދާނެކަމަށެވެ.
ރައީސް ބައިޑަން ވަނީ ސޯޝަލް މީޑިއާ ޕްލެޓްފޯމްގެ ޗައިނާގެ ވެރިޔާ ބައިޓްޑާންސްއަށް އެ އެޕް ޑައިވެސްޓް ކުރުމަށް ނުވަ މަސް ދުވަހުގެ މުއްދަތެއް ދީފައިވާ ބިލެއް ގާނޫނަކަށް ހަދައިފަ އެވެ.
މި ގާނޫނު ތައާރަފްކޮށްފައިވަނީ ޓިކްޓޮކުން ޗައިނާ ސަރުކާރާ ޔޫޒަރުންގެ ޑޭޓާ ހިއްސާ ކޮށްފާނެތީ ކަންބޮޑުވުންތަކެއް ހުރުމުންކަމަށް ބުނެއެވެ. އެއީ ޓިކްޓޮކުން އަބަދުވެސް ދޮގުކުރާ ތުހުމަތު ތަކެކެވެ.
”އަހަރެމެންނަށް ޔަގީންކަން އެބައޮތް، ކޯޓުތަކުގައި ތިޔަބޭފުޅުންގެ ހައްގުތަކަށްޓަކައި ހަނގުރާމަ ކުރަމުން ގެންދާނަން،“ ޓިކްޓޮކްގެ ވެރިޔާ ޝޯ ޒީ ޗު ބުންޏެވެ.
”ހަގީގަތްތައް، އަދި ގާނޫނު އަސާސީ ވެސް އަޅުގަނޑުމެންގެ ފަރާތުގައި އެބަހުރި… ޔަގީންކޮށްލައްވާ، އަޅުގަނޑުމެން އެއްވެސް ތަނަކަށް ނުދާނަން.“
އެ ޕްލެޓްފޯމްގައި އާންމުކުރި ވީޑިއޯއެއްގައި އޭނާ ވަނީ ބިލަށް ފާޑުވިދާޅުވެ، ޓިކްޓޮކުން ދިރިއުޅުން ރަނގަޅު ކުރި ގޮތުގެ ވާހަކަތައް ހިއްސާ ކުރުމަށް ގޮވާލާފަ އެވެ.
ވަކިން ނެރުނު ބަޔާނެއްގައި ޓިކްޓޮކުން އިތުރަށް ބުނެފައިވަނީ ”ހަގީގަތްތަކާއި ގާނޫނު“ އެ ކުންފުނީގެ ކޮޅަށް ”ސާފުކޮށް“ އޮތް ކަމަށް ގަބޫލުކުރާ ކަމަށެވެ.
”ހަގީގަތަކީ، އެމެރިކާގެ ޑޭޓާ ރައްކާތެރިކޮށް، އަޅުގަނޑުމެންގެ ޕްލެޓްފޯމް ބޭރުގެ ނުފޫޒާއި މެނިޕިއުލޭޝަނުން މިނިވަން ކުރުމަށް އެތައް ބިލިއަން ޑޮލަރެއް އިންވެސްޓްކޮށްފިން،“ އެ ރިޕޯޓުގައިވެއެވެ.
މި ފިޔަވަޅު ފާސްކޮށްފައިވަނީ ޔޫކްރޭނާއި އިސްރާއީލާއި ޓައިވާން އަދި އިންޑޯ ޕެސިފިކް ސަރަހައްދުގައި ތިބި އެމެރިކާގެ އެހެން ބައިވެރިންނަށް އަސްކަރީ އެހީ ވެސް ހިމެނޭ ހަތަރު ބިލެއްގެ ޕެކޭޖެއްގެ ތެރެއިންނެވެ.
އެކަމަށް ގާނޫނު ހަދާ މަޖިލީހުގެ މެމްބަރުންގެ ފުޅާ ތާއީދެއް އޮތްއިރު، 79 ސެނެޓަރުން އެކަމަށް ވޯޓު ދިންއިރު، 18 ސެނެޓަރުން ވަނީ އެކަމާ ދެކޮޅަށް ވޯޓު ދީފަ އެވެ.
”އަހަރުތަކެއް ވަންދެން އަހަރެމެން ޗައިނާގެ ކޮމިއުނިސްޓް ޕާޓީއަށް އެމެރިކާގެ އެންމެ މަގުބޫލު އެއް އެޕް ކޮންޓްރޯލް ކުރުމުގެ ހުއްދަ ދީފައި މިވަނީ… އެއީ ނުރައްކާތެރި ގޮތަކަށް ކުރު ވިސްނުމެއް،“ އިންޓެލިޖެންސް ކޮމިޓީގެ އެންމެ އިސް ރިޕަބްލިކަން ޕާޓީގެ ސެނެޓަރު މާކޯ ރޫބިއޯ ވިދާޅުވި އެވެ.
”އާ ގާނޫނުން އޭގެ ޗައިނާގެ ވެރިފަރާތުން އެޕް ވިއްކަން ޖެހޭނެ. މިއީ އެމެރިކާއަށް ރަނގަޅު ފިޔަވަޅެއް،“ އޭނާ އިތުރަށް ވިދާޅުވި އެވެ.
ޓިކްޓޮކުން ބުނެފައި ވަނީ ބައިޓްޑާންސް އަކީ ”ޗައިނާގެ ނުވަތަ އެހެން ގައުމެއްގެ އޭޖެންޓެއް ނޫން“ ކަމަށެވެ. ބައިޓްޑާންސް އިން ބުނަނީ އެއީ ޗައިނާގެ ފާމެއް ނޫން ކަމަށެވެ.
