އިނގުރަކީ ބޭސްފަރުވާ ކުރުމަށާއި ކެއްކުމުގައި ޒަމާނުއްސުރެ ބޭނުންކުރަމުން އައިސްފައިވާ ބާވަތެކެވެ. މިއީ ބަލާލަން އެހާ ރީތި އެއްޗަކަށް ނުވިނަމަވެސް އިނގުރަކީ ވަރަށް ގިނަގުނަ ފައިދާތަކެއް އެކުލެވިގެންވާ އެއްޗެކެވެ. ކޮންމެ ދުވަހަކު އިނގުރު ޝޮޓެއް ބުއިމުން ހަށިގަނޑަށް ވަރަށް ގިނަގުނަ ފައިދާތަކެއް ލިބެއެވެ.
އިނގުރަކީ އިންސާނާ ހަކުރުބަލީގެ ނުރައްކަލުން ދުރުހެލިކޮށްދޭ އެއްޗެކެވެ. އިނގުރު ބޭނުންކުރުމުގެ ސަބަބުން ލޭގައި އިންސިއުލިން ގިނަކޮށްދެއެވެ. އަދި ލޭގައި ހަކުރު ހުންނަ ވަރު އެއް ހަމައެއްގައި ބެހެއްޓުމަށް އެހީތެރިވެދެއެވެ. މީގެ ސަބަބުން މީހާގެ ބަރުދަން ލުއިވެ ގައިގައި ހަކަތަ އިތުރުވެގެންދެއެވެ.
އިނގުރަކީ މީހާގެ ދިފާއީ ނިޒާމު ވަރުގަދަ ކޮށްދޭ އެއްޗެކެވެ. މިއީ ޒަމާނުއްސުރެ މީހުން އަރިދަފުސް ރޯގާއިން ރައްކާތެރިވުމަށް ބޭނުން ކުރަމުން އައިސްފައިވާ އެއްޗެކެވެ. މީގެ އިތުރުން އިނގުރަކީ އޭގައި އެކިކަހަލަ އެންޓިއޮކްސިޑެންޓްތައް އެކުލެވިފައިވާ އެއްޗަކަށް ވުމުގެ ސަބަބުން އެއީ އެލާރޖީތަކާއި، ނޭވާލާ ނިޒާމަށް ދިމާވާ އެކި ބަލިތަކަށް ފަރުވާކުރުމަށްވެސް ބޭނުންކުރާ އެއްޗެކެވެ.
އިނގުރަކީ ވައިގެ ބަލިތަކާއި ހަޖަމުގެ މައްސަލަތަކުން މީހާ ދުރުކޮށްދޭ އެއްޗެކެވެ. ވަރަށް ގިނަ ދިރާސާތަކުން ދައްކާ ގޮތުގައި އިނގުރު ބޭނުންކުރުމުގެ ސަބަބުން ވައިގެ މައްސަލަތަކަށް ލުޔެއް ލިބި، ކާތަކެތި ހަޖަމުކުރުމަށް ފަސޭހަ ވެގެން ދެއެވެ. މީގެ އިތުރުން މިއީ މޭނުބައިކުރުން ލުއިކޮށްދިނުމަށްވެސް އެހީތެރިވެދޭ އެއްޗެކެވެ.
