ޒުވާނަކަށް ދޭން އެންމެ ރަނގަޅު ނަޞީޙަތަކީ ކޮބައިކަމާއިމެދު ބައެއް މީހުން ސުވާލުކުރެއެވެ. އެކަމަށް އޮތް އަހުރެންގެ ބަހަކީ ވަރަށް އާދައިގެ ބަހެކެވެ. ނަމަވެސް ވިސްނައި ޢަމަލުކޮށްފިނަމަ އެމީހަކަށް އިންތިހާއަށް ފައިދާކުރާނެއެވެ. އިން ޝާ ﷲ
އުފާވެރިކަން ކުރެވޭ ކަންކަން ވަރަށް ތަފާތެވެ. އަދި ކުރެވޭ ކޮންމެ ކަމަކީ އެހައި ބޮޑުކަމަކަށްނުވެވެސް ހިނގައިދާނެއެވެ. އެހެންކަމުން ހިތްހަމަޖައްސައިލުމަށްޓަކައި ވަރަށް އާދައިގެ ކަންކަން ކުރެވޭ ފަހަރުވެސް އަންނާނެއެވެ. އެބާވަތުގެ ކުޑަކުޑަ ކަމެއް ކުރިނަމަވެސް އެކަމެއް ކުރުމުން ތިމާގެ ޢަބުރާއި ޢިއްޒަތް ގެއްލޭނެ ކަމެއް ނުކުރާށެވެ. އަގުވެއްޓޭނެ ކަމެއް ނުކުރާށެވެ.
ހަމައެއާއިއެކު ކުރާ ކޮންމެ ކަމެއްވެސް ކުރަންވާނީ އެކަމަކަށް ވަރަށް ބޮޑަށް ވިސްނުމަށްފަހުގައެވެ. އެކަމެއް ކުރުމުން ފަހުން ހިތާމަކުރަން ނުޖެހޭނެކަން ޔަޤީންކުރަން އެމީހަކަށް ކުރެވެންހުރި ހުރިހާ ކަންކަން ކުރުމަށްފަހުގައެވެ. މިދެކަންތަކަށް ސަމާލުކަން ދިނުމަށްވުރެ ވަކިން މުހިންމު ކަމެއް ނެތެވެ.
ޙަޤީޤަތުގައި ގިނަ ޒުވާނުންނަށް މައްސަލަތައް ކުރިމަތިވަނީ މި 2 ކަންތަކަށް ދޭންޖެހޭ ސަމާލުކަން ނުދެވޭތީއެވެ. ބައެއް ފަހަރު މިއީ މިއީ ގިނަ ބައަކުކުރާ ވަރަށް ޢާންމު ކަމެއް ކަމަށް ބަލައިގެން ކުރެވޭ ކަންކަމުގެ ސަބަބުން އަގުވެއްތޭތީއެވެ.
ނުރަނގަޅު ކަންކަން ކުރެވުމުން ހަމައެކަނި އަންހެނުންގެ އަގުވެއްޓުނު ޒަމާން މާޒީއާއިއެކުވެ ހިނގައްޖެއެވެ. މިއަދު ހަަމ ފިރިހެނުންގެ އަގުވެސް ވެއްޓެވެ. އަގުވެއްޓުމުގެ ސަބަބުން ކައިވެނިކުރާނެ ރަނގަޅު ބައިވެރިއަކު ނުލިބިފައި އެތައް ބައިވެރު ޒުވާނުން އެތިބީ އެމީހުންގެ އަގު ވެއްޓުނީމައެވެ. ވިސްނާ ނުލައި ކުރެވޭ ކަންކަމުގެ ސަބަބުންނެވެ.
ވީމާ ކިތަންމެ ކުޑަކަމެއް ކަމަށް ހީކުރެވޭ ކަމެއް ނަމަވެސް އަދި ބޮޑު ކަމެއް ނަމަވެސް ކުރުމުގެ ކުރިން އެކަންކުރެވުނީތީ ފަހުން ހިތާމަކުރަން ނުޖެހޭނެކަން ޔަޤީންކުރާށެވެ! ޤަދަރު އުފުލި ރަނގަޅު ދިރިއުޅުމެއް ހޯދޭނީ އެއިރުންނެވެ!
