ރާއްޖޭގެ ގައުމީ އެއާލައިން މޯލްޑިވިއަންއަށް ކެބިން ކުރޫން ހޯދަން އިއުލާން ކޮށް، ވޯކިން އިންޓަވިއު ބާއްވާނެ ތާރީހް ހާމަކޮށްފިއެވެ.
މޯލްޑިވިއަން ހިންގާ އައިލެންޑް އޭވިއޭޝަނުން ބުނީ މި އިންޓަވިއު ކުރިއަށް ދަނީ އަންނަ ޑިސެމްބަރު މަހުގެ 10 ވަނަ ދުވަހު އެސްޓީއޯ ޓްރެއިނިން ސެންޓަރުގެ ހަތަރު ވަނަ ބުރީގައެވެ. މި އިންޓަވިއު ކުރިއަށްގެންދާނީ އެ ދުވަހުގެ ހެނދުނު 9:30 އިން 14:30 އަށެވެ.
ކެބިން ކުރޫން ހޯދުމަށް މޯލްޑިވިއަންއިން ކޮށްފައިވާ އިއުލާންގައި ބުނުފައި ވަނީ ވަޒީފާއަށް ހުށަހަޅާ މީހާއަކީ 18 35 އާ ދެމެދުގެ އުމުރުގެ މީހަކަށް ވާން ޖެހޭނެއެވެ. އަދި ބަރާބަރަށް އިނގިރޭސި އަދި ދިވެހިން ބަހުން ވާހަކަ ދައްކަން އިނގެން ޖެހޭނެ ކަމަށްވެސް ބުނެފައި ވެއެވެ. އަދި އޯލެވެލް ނުވަތަ އޭގެ މަތީ ފާހެއް އޮތް މީހަކަށް ވާން ޖެހޭނެ ކަމަށްވެސް ބުނެފައި ވެއެވެ.
އޭގެ އިތުރުން ފިރިހެނެއްނަމަ، އިސްކޮޅުގައި މަދުވެގެން ފަސް ފޫޓް ހަތަރު އިންޗި ހުންނަން ޖެހޭނެ ކަމަށާއި، އަންހެނެއްނަމަ އިސްކޮޅުގައި ފަސް ފޫޓް ދެ އިންޗް އެންމެ މަދުވެގެން ހުންނަން ޖެހޭނެ ކަމަށްވެސް އިއުލާންގައި ބުނެފައިވެއެވެ.
