އެމެރިކާއިން ހުށަހަޅާފައިވާ ސުލްހައިގެ އެއްބަސްވުމެއް ވަރަށް އަވަހަށް ގާއިމުކުރެވިދާނެ ކަމަށް ވައިޓް ހައުސްއިން އުންމީދުކުރި ނަމަވެސް، އެކަން އެހާ އަވަހަށް ނުވާނެ ކަމަށް އީރާނުން ބުނެފިއެވެ.
އެމެރިކާގެ ރައީސް ޑޮނަލްޑް ޓްރަމްޕް ވަނީ ދެ ގައުމުގެ ދެމެދުގައި ކުރިއަށްދާ ހަނގުރާމަ ނިމުމަކަށް ގެނައުމަށް އެއްބަސްވުމަކާ ހަމައަށް އާދެވިފައިވާ ކަމަށް ދާދި ފަހުން ވިދާޅުވެފައެވެ. އަދި އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވެސް ވަނީ މިއީ ވަރަށް އަވަހަށް ނިމިދާނެ ކަމެއް ކަމަށް އިޝާރާތްކުރައްވައިފައެވެ. އެމެރިކާގެ އޮފިޝަލުންނާ ހަވާލާދީ މީޑިއާތަކުން ރިޕޯޓުކޮށްފައިވާ ގޮތުގައި، ކުރިއަށް އޮތް މަދު ދުވަސްކޮޅެއްގެ ތެރޭގައި އެއްބަސްވުމުގައި ސޮއިކުރެވޭނެ ކަމަށް ވައިޓް ހައުސްއިން އުންމީދުކުރެއެވެ.
ނަމަވެސް، އީރާނުގެ ހާރިޖީ ވުޒާރާގެ ތަރުޖަމާނު އިސްމާއީލް ބަގާއީ ވިދާޅުވި ގޮތުގައި، ގިނަ ކަންތައްތަކަކާ މެދު ދެ ގައުމަށް އެއްބަސްވުމަކަށް އާދެވިފައިވީ ނަމަވެސް، މީގެ މާނައަކީ އެއްބަސްވުމުގައި ސޮއިކުރުން ގާތްވުމެއް ނޫނެވެ. އޭނާ ފާހަގަކުރެއްވި ގޮތުގައި ދެ ގައުމުގެ ދެމެދުގައި އަދިވެސް ވަރަށް ބޮޑެތި ހިޔާލުތަފާތުވުންތައް އެބަހުއްޓެވެ. އެހެންކަމުން، މަދު ހަފުތާތަކެއްގެ ތެރޭގައި މިކަމަށް ދާއިމީ ހައްލެއް ލިބިދާނެ ކަމަށް ގަބޫލުކުރުމަކީ ގޯހެއް ކަމަށް އޭނާ ވިދާޅުވިއެވެ.
މި މަޝްވަރާތަކުގައި އެންމެ ބޮޑަށް ހިޔާލުތަފާތުވެފައިވަނީ ހޯމޫޒް ކަނޑުއޮޅި ހުޅުވާލުމާއި، އީރާނުގެ ނިއުކްލިއާ ޕްރޮގްރާމާއި، އަދި އެމެރިކާއިން އީރާނާ ދެކޮޅަށް އަޅާފައިވާ ކަނޑުމަގުގެ ދަތިކުރުމުގެ ފިޔަވަޅުތަކާ ގުޅޭގޮތުންނެވެ. މީގެ އިތުރުން، ހިފަހައްޓާފައިވާ އީރާނުގެ ފައިސާތައް ދޫކޮށްލުމާމެދު ވެސް ދަނީ މަޝްވަރާކުރަމުންނެވެ. އެމެރިކާއިން ބޭނުންވަނީ އީރާނުގެ ނިއުކްލިއާ ހަތިޔާރު އުފެއްދުން ހުއްޓުވުމަށެވެ. ނަމަވެސް އީރާނުން ބުނަމުންދަނީ އެފަދަ ވިސްނުމެއް ނެތް ކަމަށެވެ.
މިހާރު ކުރިއަށްދާ މަޝްވަރާތަކަކީ މިއަހަރުގެ ފެބްރުއަރީ މަހު ފެށުނު ހަނގުރާމަ ހުއްޓާލުމަށް ކުރެވޭ މަސައްކަތްތަކެކެވެ. ހުށަހަޅާފައިވާ އެއްބަސްވުމުގެ ދަށުން 60 ދުވަހުގެ މުއްދަތަކަށް ހަމަލާތައް މެދުކަނޑާލުމަށް ވަނީ ވާހަކަދެވިފައެވެ. ދެ ގައުމުގެ ދެމެދުގައި އޮތް ނުތަނަވަސްކަން ކުޑަކުރުމަށް ޕާކިސްތާނާއި ގަތަރު ފަދަ ސަރަހައްދީ ގައުމުތަކުން ވެސް ދަނީ މެދުވެރިއެއްގެ ދައުރު އަދާކުރަމުންނެވެ.
