ޖިންސީ ގުޅުން ހިންގުމުގެ ތެރޭގައި ރައްކާތެރިވުމުގެ ވަސީލަތެއް ނެތުމުގެ ސަބަބުން، ވަގުތީ ހައްލެއްގެ ގޮތުން އަމިއްލަ ގުނަވަން ބަންދުކުރުމަށް ބާރުގަދަ ތެރަހެއް (ސުޕަރގްލޫ) ބޭނުންކުރި އިންޑިއާގެ ޒުވާނަކު ނުހަނު ހިތާމަވެރި ގޮތަކަށް މަރުވެއްޖެއެވެ. އިންޑިއާގެ ގުޖުރާތު މިލްކިއްޔާތުގެ އަހުމަދުއާބާދުގައި ހިނގި މި ހާދިސާގައި މަރުވެފައިވަނީ އުމުރުން 25 އަހަރުގެ ސަލްމާން މިރްޒާ ނަމަކަށް ކިޔާ ޒުވާނެކެވެ. މިއީ ސިއްހީ ހޭލުންތެރިކަން ކުޑަވުމާއި، ރައްކާތެރިނޫން އުސޫލުތައް އިޚްތިޔާރުކުރުމުގެ ސަބަބުން ދިމާވި ނާދިރު ނަމަވެސް ބިރުވެރި ހާދިސާއެކެވެ.
އަހުމަދުއާބާދު ފުލުހުންގެ ތަހުގީގީ ރިޕޯޓްތަކާ ހަވާލާދީ ބައިނަލްއަގުވާމީ މީޑިއާތަކުން ރިޕޯޓްކޮށްފައިވާ ގޮތުގައި، ސަލްމާން އާއި އޭނާގެ ބައިވެރިޔާ ހޮޓަލެއްގެ ކޮޓަރިއެއްގައި ދިމާވި ވަގުތު ރައްކާތެރިވާނެ ސައްހަ ވަސީލަތެއް ނެތުމުން، ބަނޑުބޮޑުވުން މަނާކުރުމުގެ ގޮތުން އޭނާ ބޭނުންކުރީ ސިނާއީ މަސައްކަތްތަކަށް ބޭނުންކުރާ ފަދަ ކެމިކަލް މާއްދާއެކެވެ. މި ސުޕަރގްލޫގެ ސަބަބުން އޭނާގެ ހަށިގަނޑުގެ އެތެރެހަށީގެ ގުނަވަންތަކަށް ބޮޑެތި ގެއްލުންތަކެއް ލިބި، ގުނަވަންތަކުގެ މަސައްކަތް ހުއްޓުމަކަށް އައެވެ. އޭނާ ހަބަރުހުސްވެފައި އޮއްވާ ފެނިގެން ސިވިލް ހޮސްޕިޓަލަށް ގެންގޮސް ފަރުވާދެނިކޮށް، ދިމާވި ސިއްހީ ނުރައްކާތެރި ކޮމްޕްލިކޭޝަންތަކެއްގެ ސަބަބުން އޭނާ ވަނީ ފަރުވާދެމުންދަނިކޮށް މަރުވެފައެވެ.
މި ހާދިސާއާ ގުޅިގެން ސިއްހީ މާހިރުން ދަނީ މުޅި މުޖުތަމައަށް ބޮޑު އިރުޝާދެއް ދެއްވަމުންނެވެ. މާހިރުން ފާހަގަކުރާ ގޮތުގައި، ރައްކާތެރިވުމުގެ ރަސްމީ ވަސީލަތްތަކުގެ ބަދަލުގައި ހަށިގަނޑަށް ނުރައްކާތެރި ސިނާއީ ކެމިކަލްތައް ބޭނުންކުރުމަކީ ފުރާނައަށް ސީދާ ނުރައްކާވާނެ ކަމެކެވެ. ސޯޝަލް މީޑިއާގައި މިހާރު ވަރަށް ބޮޑަށް ދައުރުވަމުންދާ މި ހާދިސާއަކީ، ސިއްހީ ދާއިރާގެ ރައްކާތެރިކަމުގެ މައުލޫމާތުތައް ރަނގަޅަށް ދެނެގަތުމުގެ މުހިންމުކަމާއި، މިފަދަ ނާޒުކު ކަންކަމުގައި ހޭލުންތެރިކަން އިތުރުކުރަންޖެހޭކަން ހަނދާންކޮށްދޭ ފިލާވަޅެކެވެ.
