މިދިޔަ ހަފުތާގެ ތެރޭގައި ލައިސަންސް ވެސް ލިބިފައިވާ މޯލްޑިވްސް ޑިވެލޮޕްމަންޓް ބޭންކް ލިމިޓެޑް (އެމްޑީބީ) ގެ ހިދުމަތް މި އަހަރުގެ ތެރޭގައި ފެށުމަށް އަމާޒު ހިފައިފި އެވެ.
އިކޮނޮމިކް މިނިސްޓްރީން ބުނީ އެ ބޭންކުގެ ހިދުމަތް ފެށުމަށް ބޭނުންވާ ފަންނީ މުވައްޒަފުން ނެގުމުގެ މަސައްކަތް ވެސް މިހާރު ކުރިއަށްދާ ކަމަށެވެ. އަދި އަމާޒަކީ އަހަރު ނިމުމުގެ ކުރިން ބޭންކް ހުޅުުވައި ރަސްމީކޮށް ހިދުމަތް ދޭން ފެށުން ކަމަށް ބުންޏެވެ.
މި ސަރުކާރުން ޑިވެލޮޕްމަންޓް އުފެއްދީ މި އަހަރުގެ މެއި މަހުގެ 16 ގަ އެވެ. އަދި އެ ބޭންކްގެ ލައިސަންސަށް އެދި މިނިސްޓްރީން މޯލްޑިވް މަނިޓަރީ އޮތީރިޓީ (އެމްއެމްއޭ) އަށް ހުށަހެޅީ ޖުލައި 28 ގަ އެވެ. އަދި އެތަނުން އެމްބީޑީ އަށް ލައިސަންސް ދޫކުރީ މި މަހުގެ 13 ގަ އެވެ.
އެމްޑީބީގެ ހިދުމަތް ފަށަން ތައްޔާރީތައް ވަމުން އަންނަ އިރު، އޮގަސްޓް މަހުގެ ތެރޭގައި ވަނީ ބޭންކްގެ އެންމެ އިސް ދެ މަގާމަށް ބޭރުގެ ތަޖުރިބާކާރުންތަކެއް އައްޔަންކޮށްފަ އެވެ. އެގޮތުން ބޭންކްގެ ސީއީއޯ އަކީ އިނގިރޭސިވިލާތުގެ ނޮއެލް ގްރެގާ އެވެ. އަދި ޗެއާޕާސަނަކީ ސިންގަޕޫރުގެ އަރޫނީ ގުނިޓެލެކީ އެވެ.
އިކޮނޮމިކް މިނިސްޓްރީން ބުނެފައި ވަނީ އެމްޑީބީ ފޯކަސްކުރާނީ މައިގަނޑު ފަސް ދާއިރާއަކަށް ކަމަށެވެ. އެ ފަސް ދާއިރާ އަކީ ހަކަތަ އާއި ކާބޯތަކެތީގެ ޔަގީންކަން އަދި އަގުތައް ހިފެހެއްޓުމާއި ވަޒަންވެރިކަމާއި ބޯހިޔާވަހިކަމާއި ތިމާވެށި ހިމާޔަތްކުރުމާއި ޓޫރިޒަމް އަދި ވައިގެ ދަތުރުފަތުރުގެ ހިދުމަތްތަކާއި ކަނޑުގެ މަންފާ އާއި ކަނޑާއި ގުޅިފައިވާ އިގުތިސާދީ ހަރަކާތްތަކެވެ.
