މިދިޔަ މަހުގެ ތެރޭގައި ވެސް ރާއްޖެ އަށް މަސްތުވާތަކެތި އެތެރެކޮށްގެން ހައްޔަރުކުރި ދުވަސްވީ މީހާ އަނެއްކާ ވެސް ހަމަ އެ ކުށް ތަކުރާރުކޮށްގެން ހައްޔަރުކޮށްފި އެެވެ.
ހައްޔަރުކޮށްފައި ވަނީ އައްޑޫ ހިތަދޫ ވެހެތާނުގޭ އަބްދުالله ސޯދިގު، 65، އެވެ. އޭނަގެ ބަންދާ މެދު ގޮތެއް ނިންމުމަށް މިދިޔަ ބުރާސްފަތި ދުވަހު ކްރިމިނަލް ކޯޓަށް ހާޒިރުކުރުމުން ބަންދަށް 15 ދުވަސް ޖަހާފައިވެ އެވެ.
ކަސްޓަމްސްގެ ފޯމާ ހަވާލާދީ ކޯޓު އަމުރުގައިވާ ގޮތުން ސޯދިގް ރާއްޖެ އިން ބޭރުގައި ހުރެފައި އައި އިރު ލަގެޖްގެ ގޮތުގައި ގެންގުޅުނު ފޮށި ބަލައި ފާސްކުރިއިރު އޭގެ ތެރޭގައި މާ ޖަހާފައި ހުރި 3 ވާސް އޮތް ކަމަށާއި އެ އެއްޗެހީގެ ތެރެއިން މަސްތުވާތަކެތި ކަމަށް ޝައްކުކުރެވޭ 4 ރަބަރު ޕެކެޓް ފެނިފައިވާ ކަމަށެވެ.
އަދި އެ ތަކެތީގެ ވަގުތީ ޓެސްޓުން ހެރޮއިން އަށް ޕޮޒިޓިވްވެފައިވާ އިރު، ބަރުދަނުގައި 270 ގްރާމް ހުރި ކަމަށް ބުނެފައިވެ އެވެ.
ކޯޓު އަމުރުގައި ބުނެފައި ވަނީ އެ މައްސަލައި ސޯދިގުގެ ކުޑަކަމުދާ ތަކެތި އޯޕީއޭޓްސް އަށް ޕޮޒިޓިވްވެފައިވާ ކަމަށެވެ.
ސޯދިގަކީ މިދިޔަ މަހުގެ 16 ވަނަ ދުވަހު ވެސް އޭނަ ރާއްޖެ އިން ބޭރުން އައި އިރު، މަސްތުވާތަކެތި ގެނައި މައްސަލައެއްގައި ހައްޔަރުކުރި މީހެކެވެ. އެ ފަހަރު އޭނަގެ އަތުން 3.49 ގްރާމްގެ ހެރޮއިން ފެނިފައިވެ އެވެ. އަދި އެ މައްސަލަގައި ބަންދަށް 15 ދުވަސް ޖެހި އެވެ.
