ކައިވެނިކުރަން ބޭނުންވުމުން ހިތް އެދޭނީ އެކަމަށް އަވަސްވެގަތުމަށެވެ. ވީހާ އަވަހެއް ކުރުމަށެވެ. އަދި ދީނުގައި އޮތީވެސް ކައިވެނި ކުރުން އަވަސްކުރުމެވެ. ނަމަވެސް އެއިގެ މާނައަކީ ބަލަންޖެހޭ ކަންކަމަށް ނުބަލައި އަވަސްއަރުވާލައިގެން ކައިވެނިކުރުމެއް ނޫނެވެ.
ﷲ ތަޢާލާ ވަޙީ ކުރައްވަވާފައިވަނީ ދުނިޔެއިން ފެންނަ ކަންކަމަށް ބަލައި ވިސްނައިގެން ކަންކަން ކުރުމަށެވެ. ”ފަހެ، އެއުރެން ބިމުގައި ދަތުރުފަތުރުކޮށް ނޫޅެނީހެއްޔެވެ؟ އެހެންނަމަ، އެއުރެން އެއިން ވިސްނައިހަދާނޭ ހިތްތަކެއް އެއުރެންނަށްވީހެވެ. ނުވަތަ އެއިން އެއުރެން އަޑުއަހާނޭ ކަންފަތްތަކެއް (އެއުރެންނަށް) ވީހެވެ. އެހެނީ ހަމަކަށަވަރުން، ލޯތައް ކަނުވަނީއަކީނޫނެވެ. އެހެނެއްކަމަކު، ކަނުވަނީ މޭތަކުގައިވާ ހިތްތަކެވެ.“ (އަލް ޙައްޖު: 46)
ވީމާ ހިތްތައް ކަނުވެފައިވާ މީހަކަށް ނުވާށެވެ! ވިސްނައި ފިކުރުކޮށްގެން ކަންކަން ކުރުމުގެ އާދަ ހަރުލައްވާށެވެ!
ދިރިއުޅުމުގެ އެއްވެސް ކަމެއް އަވަސް އަރުވާލައި، ކުއްލިކުއްލިއަށް ނުނިންމާށެވެ! ޙިކުމަތްތެރިކަމާއިއެކު ނިންމަމުން ގެންދާށެވެ! އެންމެ ކާމިޔާބު ނިންމުމަކަށްވާނީ ފަހުން ކުރިމަތިވެދާނެ ކަންކަމަށް ވިސްނައިގެން ނިންމާ ނިންމުންތަކެވެ.
އިސްލާމް ދީނުގައިވެސް ބާރުއަޅަނީ ކުއްލިކުއްލިއަށް ދިރިއުޅުމުގެ ކަންތައްތައް ނުނިންމައި އެކަންކަމަށް ފުރިހަމައަށް ވިސްނައިގެން ކަންކަން ނިންމުމަށެވެ. އަދި ތިމާ ކުރާ ކޮންމެ ކަމެއްވެސް ކެތްތެރިކަމާއިއެކު ކުރުމަށެވެ.
ޒަވާޖީ ހަޔާތަށް ބެލި ނަމަވެސް ދެފަރާތުން ބަލަންޖެހޭ ކަންކަން ނުބަލައި އަވަސް އަރުވާލައިގެން ކައިވެނިކުރުމުން މުޅި އުމުރުގައި ހިތާމަކުރަންޖެހުން ވަރަށް ގިނައެވެ. އަދި ކެތްތެރިކަމާއިއެކު ނުވިސްނައި ކައިވެނި ރޫޅައިލުމުންވެސް އެގޮތަށް އެކަން ކުރެވުނީތީ މުޅި ޢުމުރުގައި ވެސް ހިތާމަކުރަން ޖެހުމަކީ ވަރަށް ގިނައިން ކުރިމަތިވާ ކަމެކެވެ.
ހަމައެފަދައިން ހިތްހަމަނުޖެހޭއިރަށް ވަޒީފާ ދޫކޮށްލުން ފަދަ ކަންކަން ކުރުމުން ވެސް ހިތާމަވެރި ގޮތްތައް މެދުވެރިވެއެވެ. މީގެ އިތުރުން ޢާއިލީ މައްސލތަކުގައިވެސް ކުއްލިކުއްލިއަށް ގޮތް ނިންމުމުން ހިތާމަވެރި ގޮތްތައް މެދުވެރިވެއެވެ. ވީމާ ކުރަން ބޭނުންވާ ކޮނަމް ކަމެއް ހަމަ ވަގުތުން ކޮށް ނިންމައިނުލާށެވެ! ބުނަން ބޭނުންވާ ބަސްތައް ބުނުމުގައިވެސް ފަރުވާތެރިވާށެވެ!
ޙަޔާތުގެ ކޮންމެ ކަމެއްވެސް ރަނގަޅަށް ޕްލޭންކޮށްގެން ކުރާށެވެ! ދުރާލައި ކަންކަން ރާވައި އިންތިޒާމުކޮށްގެން ކުރަމުން ގެންދާށެވެ! ޙަޔާތުގެ އެންމެ ބޮޑު ކާމިޔާބީއަކަށް ގިންފަހަރު ވެފައި އޮންނަނީ ވިސްނަން ހޭދަކުރާ ވަގުތާއި ދުރާލައި ރާވައިގެން ކަންކަން ކުރުމެވެ! ވީމާ ގޮތް ނިންމުން ލަސްކޮށްފިނަމަ އެކަމަކުން ބޮޑެތި ގެއްލުންތައް ލިބިދާނެ ފަދަ ކަމެއްގައި މެނުވީ ކުއްލިކުއްލިއަށް އެއްވެސް ކަމެއް ނުނިންމާށެވެ!
