ކުރީން ރާއްޖެ ހިފަން އައިހެން ކަނޑިއާއި ބަޑި ހިފައިގެންނެއް މިހާރު ނާންނާނެ ކަމަށާއި، ރާއްޖޭގެ ދިފާޢީ ބާރުވެސް، ހުރިހާ ޙާލަތަކަށް ތައްޔާރުކުރުން އެއީ ކުރަންޖެހޭ ކަމެއްކަމަށް ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ރޭ ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، ރޭ ބޭއްވެވި ނަޞްރުގެ ދުވަހުގެ ރަސްމީ ޖަލްސާ ގައެވެ.
ރައީސް ވިދާޅުވީ، މިހާރަކު ކޮންމެހެން އޭރުގައި އައިހެން ކަނޑިއާއި ބަޑި ހިފައިގެންނެއް ނާންނާނެ ކަމަށެވެ. އެހެންކަމުން ދިވެހި ދިފާޢީ ބާރުވެސް، ހުރިހާ ޙާލަތަކަށް ތައްޔާރުކުރުން އެއީ ކުރަންޖެހޭ ކަމެއް ކަމަށް ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ، ބަވަނަވެފައި މިއޮތް ދުނިޔޭގައި، އަޅުގަނޑުމެންގެ ލޯތައް ހުޅުވެން ޖެހޭކަމަށެވެ. އަދި މިހާރު ޤައުމެއްގެ މިނިވަންކަން ނަގައިލުމަކީ، ކޮންމެހެން އަބަދުވެސް، ކުރީ ޒަމާނުގައި އެ ހިނގިގޮތަކަށް ހިނގާނެ ކަމެއް ނޫންކަން ގަބޫލުކުރަންޖެހޭ ކަމަށް ރައީސުލްޖުމްހޫރިއްޔާ ވިދާޅުވިއެވެ.
“ލިޔެލާ ލިޔުމަކުން، ނޫނީވިއްޔާ އިންޓަރނެޓުން ހިންގާ އެކިކަހަލަ ކެމްޕެއިންތަކުން، ނޫނީވިއްޔާ އެފަދަ ކޮންމެވެސް ޒަމާނީ ވަސީލަތަކުން މިހާރު އެކި ޤައުމުތަކުގައި އެކި ކަންތައްތައް އެ ހިންގަނީ. އަޅުގަނޑުމެން އަބަދުވެސް ވާން އެބަޖެހޭ،“ ރައީސުލްޖުމްހޫރިއްޔާ ވިދާޅުވިއެވެ.
ދިވެހިން ވާންވީ ނޮވެންބަރު 3 ގައި އަޅުގަނޑުމެން ދެއްކި އެކުވެރިކަން ދައްކާ ބަޔަކަށް ކަމަށާއި، މިހާރުގެ މި ޙަޤީޤަތް ގަބޫލުކޮށް، މިހާރު އަޅުގަނޑުމެންނަށް މި ކުރިމަތިވާ އެކިކަހަލަ ގޮންޖެހުންތަކުގައި، އެ ދުވަހު ދެއްކި އެކުވެރިކަމާއި، އެއްބައެއްކަން ދައްކައި، އަޅުގަނޑުމެން ޤައުމުދެކެ ލޯބިވާކަން ދައްކަން ޖެހޭކަމަށް ރައީސުލްޖުމްހޫރިއްޔާ ވިދާޅުވިއެވެ.
“އަޅުގަނޑުމެންނަށް އަޅުގަނޑުމެންގެ މާތްވެގެންވާ އިސްލާމްދީނަށްވުރެ މުހިންމު އެއްޗެއް ނެތްކަން، އަޅުގަނޑުމެންގެ ކުރިމަތީގައި ދުޝްމަނުންނަށް އެއްބާރުލުން ދޭނެ އެއްވެސް މީހަކު ނުހުންނާނެކަން، ދުޝްމަނުންނަކީ މިހާރު ކޮންމެހެން ކުރިމަތިން ފެންނަ މީހެއް ނޫން. އެކިކަހަލަ އޮއިވަރުތައް ހިނގަމުން މިދަނީ. އެތެރެއިންނާއި ބޭރުން. އެތެރޭގައިވެސް ތިބޭ. އެކިކަހަލަ ނުބައި އޮއިވަރުތައް ހިންގަމުން މިދަނީ. އަޅުގަނޑުމެންގެ މުޖުތަމަޢު ވީރާނާކޮށް، އަޅުގަނޑުމެންގެ އެތެރެ ބައިބައިކުރުމަށް ހިންގާ ކަންތައްތައް. ޤައުމެއްގެ ސިފަ ގެއްލުވައިލުމަށްޓަކައި ހިންގާ ކަންތައް،“ ރައީސް ވިދާޅުވެފަވެއެވެ.
އެހެންކަމުން މި އެކުވެރިކަން އަޅުގަނޑުމެންގެ ތެރޭގައި އާލާކޮށް، ޤައުމީ ވިސްނުން އިސްކޮށް، ޙަޤީޤީ މާނައިގައިވެސް، އެންމެ ފުރަތަމަ ޤައުމު އެއީ، އަޅުގަނޑުމެންގެ ހިތުގެ ތެރޭގައި ބިންވަޅު ނެގޭ ކަމަކަށް ހެދުމަކީ، މިފަދަ މުހިންމު މުނާސަބަތެއްގައި އަޅުގަނޑުމެންގެ ޢަޒުމަށް ވާންޖެހޭނެކަމަށް ރައީސުލްޖުމްހޫރިއްޔާ ޑރ. މުޢިއްޒު ވަނީ ވިދާޅުވިއެވެ.
