ރައީސުންނާއި މިނިސްޓާރުންނާއި މަޖިލިސް މެމްބަރުންގެ އިތުރުން ފަނޑިޔާރުން ނުހައްގު މުއްސަނދިކަން ހޯދައިފިނަމަ ޖިނާއީ ކުށެއްގެ ގޮތުގައި ކަނޑައަޅައި 15 އަހަރަށް ޖަލަށް ލެވޭ ގޮތަސް މަޖިލިހަށް ބިލެއް ހުށަހަޅައިފިއެވެ.
މި ބިލު މަޖިލީހަށް ހުށަހެޅުއްވީ ސަރުކާރުގެ ފަރާތުން މާފުށީ ދާއިރާގެ މެމްބަރު ހުސައިން ރިޒާއެވެ.
ބިލުގައިވާގޮތުން ދައުލަތުގެ މުވައްޒަފަކަށްވެ ހުރެ ލިބެމުންދާ އާމްދަނީއާ ނުބައްދަލު ދިރިއުޅުމުގެ ފެންވަރު ދެމެހެއްޓުމަކީ ކުށެކެވެ. އަދި އާއިލީ ނުވަތަ ވިޔަފާރީގެ ގުޅުމެއް އޮތް މީހެއްގެ ނަމުގައި މުދާ ނުވަތަ ފައިސާ ހޯދައި މިލްކު ކުރުމަކީވެސް ކުށެކެވެ.
ނުހައްގު މުއްސަނދިކަން ހުއްޓުވަން ގާނޫނުލް އުގޫބާތަށް އިސްލާހު ގެންނަން ނިންމާފައިވަނީ ދައުލަތުގެ އިދާރާތަކުގެ ތެރޭގައި އަށަގެންފައިވާ ކޮރަޕްޝަނާއި ނުހައްގު މުއްސަދިކަން ހޯދުމުގެ މައްސަލަތައް ތަހުގީގުކޮށް ދައުވާކުރުމަށް ހުރި ގޮންޖެހުންތައް ނައްތާލުމަށް މަސައްކަތްކުރުމުގެ ގޮތުންކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ވިދާޅުވެފައެވެ.
އެމަނިކުފާނު ވިދާޅުވީ ގާނޫނުލްއުގޫބާތުގެ 515 ވަނަ މާއްދާއަށް ގެނެވޭ އިސްލާހުގެ ސަބަބުން ރައީސުލްޖުމްހޫރިއްޔާއާއި ވަޒީރުންނާއި ރައްޔިތުންގެ މަޖިލީހުގެ މެންބަރުންނާއި ފަނޑިޔާރުން ހިމެނޭގޮތުން، ދައުލަތުގެ މުވައްޒަފުންނާއި ދައުލަތުގެ މުވައްޒަފެއްގެ މަގާމު އަދާކޮށްފައިވާ ފަރާތްތަކުން ހޯދަމުންދާ ނުވަތަ ހޯދާފައިވާ ނުޙައްގު މުއްސަނދިކަމުގެ މައްސަލަތައް ބެލުމަށް ފަސޭހަވެގެންދާނެ ކަމަށެވެ.ނަހަމަ ގޮތުގައި ދައުލަތުން ހޯދާފައިވާ ފައިސާ އާއި ރާއްޖެއިން ބޭރުގައި ރައްކާކޮށްފައި ހުރި ވަގު ފައިސާ ހޯދަން ”އެސެޓް ރިކަވަރީ“ ގާނޫނެއް ހައްދަވާނެ ކަމަށްވެސް ރައީސްވަނީ ވިދާޅުވެފައެވެ.
މި ބިލު ފާސްވެއްޖެ ނަމަ ދައުލަތުގެ އިސް މަގާމުތަކުގައި ތިބޭ މީހުން ނުހައްގުން ހޯދާފައިވާ މުއްސަނދިކަމުގެ މައްސަލަތައް ބެލުމަށް ފަސޭހަވެ ގާނޫނީ ގޮތުން މި ފަދަ މައްސަލަތައް ބެލުމަށް އޮތް ހުރަސް ނައްތާލެވިގެންދާނެއެވެ.
