އަންނަ ރިޔާސީ އިންތިހާބުގައި ވާދަކުރަށްވާނެ ކަމަށް ކުރީގެ ރައީސް ޔާމިން އަބުދުލްގައްޔޫމް މިއަދު ވިދާޅުވެއްޖެއެވެ.
ރައީސް ޔާމިން މިކަން ހާމަކުރެއްވީ އެމަނިކުފާނުގެ ވެރިކަމުގައި އެންމެ ބޮޑަށް އެމަނިކުފާނާއި ދެކޮޅަށް މައުލޫމާތު ފަތުރަމުން ގެންދިޔަ ރާއްޖެ ޓީވީގެ ޕްރޮގްރާމެއްގައި މިއަދު ވާހަކަފުޅު ދައްކަވަމުންނެވެ.
ކުރީގެ ރައީސް ޔާމިން އަބުދުލްގައްޔޫމް ވިދާޅުވީ އަންނަ ރިޔާސީ އިންތިހާބުގައި ވާދަކުރައްވަން ނިންމަވާފައިވާ ކަމަށެވެ. ރައީސް ޔާމިން ވިދާޅުވީ އެމަނިކުފާނު ރިޔާސީ އިންތިހާބަށް ކުރިމަތިލައްވަނީ ވެރިކަން ބޭނުންފުޅުވެގެން ކަމަށެވެ. އަދި އެމަނިކުފާނު އަލުން ވެރިކަމަށް ކުރިމަތިލައްވަނީ މައިގަނޑު ތިން ކަމެއް ހާސިލުކުރައްވަން ކަމަށް ޔާމިން ވިދާޅުވިއެވެ. އޭގެތެރޭގައި ފޯޅަވަހި ކަނޑުގެ ސަރަހައްދު ހޯދުމަށް ކުރަންޖެހޭ މަސައްކަތް ކުރުމާއި އިންޑިޔާ ސިފައިން ރާއްޖެއިން ބޭލުން ހިމެނޭކަމަށް ރައީސް ޔާމިން ވިދާޅުވިއެވެ.
”މިދެކަންތައް ހައްލުކުރުމަށްޓަކައި ވެސް އަޅުގަނޑު ބޭނުންވޭ ޚިދުމަތުގައި ފުރުސަތެއް ލިބުން، އަޅުގަނޑަށް ގަބޫލެއް ނުކުރަން ދެން ވެރިކަމަށް ވަޑައިގަންނަވާ އެއްވެސް ބޭފުޅަކު މިކަން ކުރަށްވަފާނެ ކަމަކަށް. ހުރިހާ ބޭފުޅުންނަކީ ކޮމްޕްރަމައިޒް ބޭފުޅުން، ހުރިހާ ލީޑަރުން، މިވަގުތު ތިބި ހުރިހާ ބޭފުޅުންނަކީ ކޮމްޕްރަމައިޒް ބޭފުޅުން،“ ރައީސް ޔާމިން ވިދާޅުވިއެވެ.
