ދަރުމަވަންތަ ހޮސްޕިޓަލް ބޭނުން ކުރަން ފެށިތާ ފަސް އަހަރު ފަހުން ޓާޝަރީ ފެންވަރުގައި ދަރުމަވަންތަ ހޮސްޕިޓަލް މިރޭ ރަސްމީކޮށް ހުޅުވައިފި އެވެ.
މި ހޮސްޕިޓަލް ރަސްމީކޮށް ހުޅުވައިދެއްވީ ރައީސް ޑރ. މުހައްމަދު މުއިއްޒެވެ.
ދަރުމަވަންތަ ހޮސްޕިޓަލަކީ 500 އެނދުގެ ބޮޑު ހޮސްޕިޓަލަކެވެ. އެ އިމާރާތަށް ދައުލަތުގެ ބަޖެޓުން 140 މިލިޔަން ޑޮލަރު (2.1 ބިލިޔަން ރުފިޔާ) ހަރަދުކޮށްފައިވެ އެވެ.
ދަރިމައިވުމުގެ ފަރުވާ ފެށުމަށް ތައްޔާރުވެފައި ވާއިރު މި ސެންޓަރުން އައިވީއެފް ފަދަ އެންމެ ފަހުގެ ޒަމާނީ ހުރިހާ ފަރުވާއެއް ލިބޭނެ ކަމަށް އެ ހޮސްޕިޓަލުން ބުންޏެވެ. އައިޔޫއައި އާއި އެގް، ސްޕާމް އަދި އެމްބްރިއޯ ފްރީޒިންގެ ހިދުމަތް ލިބޭނެ ކަމަށް ވެސް ހޮސްޕިޓަލުން ބުންޏެވެ.
އެ ހޮސްޕިޓަލުން ބުނީ މި ސެންޓަރާއެކު، ރާއްޖޭގައި ހުރެގެން މި ފަރުވާ ހޯދުމުގެ މަގުފަހިވެ، އާއިލާތަަކަށް މާލީ އަދި ނަފްސާނީ ގޮތުން ލުއިތަކެއް ލިބިގެން ދާނެ ކަމަށެވެ.
މިރޭ ވަނީ ދަރުމަވަންތަ ހޮސްޕިޓަލުގެ 11 ވަނަ ފްލޯގައި ގާއިމްކޮށްފައިވާ އެންމެ ޒަމާނީ ފެންވަރުގެ ހައިބްރިޑް ތިއޭޓަރުގެ ބައެއް ސާމާނުތައް ބަދަލުކޮށް އަދި އެންމެ ޒަމާނީ ފެންވަރުގެ ހައިބްރިޑް ކެތުލެބް ވެސް ރަސްމީކޮށް ހުޅުވައިފަ އެވެ.
”މި ސަރުކާރުން ވެރިކަމާ ހަވާލުވީއިރު ދަރުމަވަންތަ ހޮސްޕިޓަލް އޮތީ ތަސައްވުރުކޮށްލަން ވެސް ދަތި ހާލަތުގައި،“ އޭނާ ވިދާޅުވި އެވެ.
އޭނާ ވިދާޅުވީ އާ ސަރުކާރުން ވެރިކަމާ ހަވާލުވެ މިފަދަ ހުރިހާ އިހުމާލުތަކެއް ބަލައި، މައްސަލަތައް ހައްލުކޮށްފައިވާ ކަމަށެވެ. އަދި ހަލާކުވެފައި ހުރި އިކުއިޕްމަންޓުތައް ބަދަލުކޮށްފައިވާ ކަމަށް ވެސް ވިދާޅުވި އެވެ.
މީގެ އިތުރުން ކުރިން ބޭނުންނުކޮށް ހުރި ފަންގިފިލާތައް ވެސް މިހާރު އޮޕަރޭޝަނަސް ގެނެވިފައިވާކަމަށް ވިދާޅުވި އެވެ.
އެގޮތުން 17 ވަނަ ފަންގިފިލާގައި ޑެލިވަރީ ސޫޓްތަކާއި، 18 އަދި 19 ވަނަ ފަންގިފިލާގައި، އެޑްމިޓްކުރަން ހާއްސަ 14 ކޮޓަރިއާއި 21ވަނަ ފަންގިފިލާ އިދާރީ ހިދުމަތްތަކަށް ހާއްސަކޮށްފައިވާކަމަށް ވިދާޅުވި އެވެ. މީގެ އިތުރުން 22 ވަނަ ފަންގިފިލާގައި ނެޝަނަލް ފާޓިލިޓީ ސެންޓަރު ވެސް ގާއިމްކޮށްފައިވާ ކަމަށް ވިދާޅުވި އެވެ.
އެއާއެކު ހަލީމް ވަނީ ރަސްމީކޮށް ދަރުމަވަންތަ ހޮސްޕިޓަލް މިރޭ ހުޅުވުނީތީ ރައީސަށް މަރުހަބާ ވިދާޅުވެފަ އެވެ. އަދި ސިއްހީ ދާއިރާގެ ތަރައްގީއަށް ރައީސް ދެއްވާ އަހައްމިއްޔަތަށް ވެސް ޝުކުރު އަދައިކުރައްވައިފަ އެވެ.
މީގެ އިތުރުން ޑޮކްޓަރުންނާއި، ސިއްހީ ހިދުމަތްތެރިންނަށާއި، ސިއްހަތާ ބެހޭ ވުޒާރާއަށާއި، މާލީ ވުޒާރާއަށް ވެސް ޝުކުރު އަދައިކުރެއްވި އެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި އިމާރާތްކުރި 25 ބުރީގެ ހޮސްޕިޓަލް ބޭނުންކުރަން ފެށީ އެމްޑީޕީގެ ވެރިކަމުގައި 2019 ވަނަ އަހަރު އެވެ. ނަމަވެސް އެތަން ރަސްމީކޮށް ހުޅުވާފައެއް ނުވެ އެވެ. އަދި މުވައްޒަފުންނާއި ތަކެތީގެ ދަތިކަމާ ހެދި 17 ވަނަ ފްލޯއިން 19 ވަނަ ފްލޯއާ ހަމައަށް ބޭނުމެއް ނުކުރެ އެވެ.
