ރިސޯޓުތަކުން ޑޮލަރު މާރުކުރަން ޖެހޭގޮތަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބޭރު ފައިސާގެ ގަވާއިދަށް ގެނައި ބަދަލު ބަދަލުނުކުރާނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ސަރުކާރަށް އެއް އަހަރު ފުރުމާ ގުޅިގެން ސޯޝަލް ސެންޓަރުގައި ކުރިއަށްދާ ޖަލްސާގައި ރައީސް ޑރ. މުއިއްޒު ވިދާޅުވީ އެ ގަވައިދަކީ ގާނޫނުއަސާސީއާ އެއްގޮތްވާ ގޮތުގެ މަތިން އެކުލަވާލާފައި އޮތް ގަވައިދެއް ކަމަށެވެ. އެ ގަވައިދު ބަދަލު ނުކުރައްވާނެ ކަމަށް ތަކުރާރުކޮށް އެމަނިކުފާނު ވިދާޅުވިއެވެ.
ޖަނަވަރީމަހުން ފެށިގެން މި ގަވާއިދަށް އަމަލުކުރަން ފެށިއްޖެނަމަ ރަސްމީ ރޭޓުގައި ޑޮލަރު ލިބޭނެ އިންތިޒާމު ހަމަޖެހިގެންދާނެކަމަށާއި ވެލާނާ އިންޓަނޭޝަނަލް އެއާޕޯޓުން މިހާރު ލިބޭ 500 ޑޮލަރު 2026 ގެ ފުރަތަމަ ކުއާޓަރަށް ދާއިރު 1000 ޑޮލަރަށް ހަދާދެވޭނެކަމަށް އެމަނިކުފާނު ވިދާޅުވިއެވެ. ރައީސް ވަނީ އެކަންކަމަށް ހުރަސް ނޭޅުއްވުމަށް ވިޔަފާރިވެރިންނަށް ގޮވާލައްވާފައެވެ.
މީގެ އިތުރުން މިގަވާއިދަށް އަމަލުކުރަން ފެށިއްޖެނަމަ ކްރެޑިޓް ކާޑު ލިމިޓްވެސް 1400 ޑޮލަރާ ހަމައަށް އިތުރުކޮށްދެވިގެންދާނެކަމަށް ރައީސް ވިދާޅުވިއެވެ.
”އެހެންވީމަ މި ދަންނަވަނީ އަޅުގަނޑުމެން ތިބޭނީ ރައްޔިތުންގެ ފަޅީގައޭ. ނެތިން މިކަމުގައި ގަވާއިދު ބަދަލުކުރާކަށް. ނުކުރާނަން ބަދަލެއް. ވަރަށް ސާފުކޮށް މި ދަންނަވަނީ ގަވާއިދު ބަދަލެއް ނުކުރާނަމޭ. 500 ޑޮލަރު މާރުކުރަން ޖެހޭނެއޭ. ގަވާއިދަށް ތަބާވުމަކީ އެންމެނަށް ލާޒިމްކަމެކޭ. މިއީ ގާނޫނު އަސާސީއާ ގާނޫނާ އެއްގޮތަށް ކުރާކަމެއް. މިކަން އިތުރަށް ތަންފީޒުކުރުމަށް އެމްއެމްއޭއަށް ފަސޭހަކުރުމަށް ގާނޫނެއްވެސް ފާސްކޮށްދޭނަން. ސަރުކާރު އޮންނާނީ 100 އިންސައްތަ ރައްޔިތުންގެ ފަޅީގައި“.
މިކަމާ ގުޅިގެން ރިސޯޓުތައް ހިންގާ ރާއްޖޭގެ ބައެއް ވިޔަފާރިވެރިން ވަނީ ކަންބޮޑުވުންފާޅުކޮށްފައެވެ. ގަވާއިދުގައި ވާގޮތުން ކެޓަގަރީ އޭގެ ގޮތުގައި ހިމެނޭ ފަތުރުވެރިކަމުގެ ރިސޯޓުތަކާއި ހޮޓާތަކާއިި އުޅަނދުތަކުން ކޮންމެ ޓޫރިސްޓަކަށް، ބޮލަކަށް 500 ޑޮލަރުގެ ރޭޓުން، އެ މަހެއްގައި އައިސްފައިވާ ޖުމްލަ ޓޫރިސްޓުންނަށް ޖެހޭ އަދަދު ބޭންކަކަށް ޖަމާކޮށް ރުފިޔާއަށް މާރު ކުރަން ވާނެއެވެ.
އަދި ކެޓަގަރީ ބީގެ ގޮތުގައި ހިމެނޭ ގެސްޓްހައުސްތަކާއި މީހުން ދިރިއުޅޭ ރަށްރަށުގައި ހިންގާ ހޮޓާތަކުގެ ތެރެއިން 50 ކޮޓަރި ނުވަތަ އެއަށް ވުރެ މަދު އަދަދެއްގެ ކޮޓަރި ރަޖިސްޓްރީކޮށްފައިވާ ތަންތަނުން ކޮންމެ ޓޫރިސްޓަކަށް، ބޮލަކަށް 25 ޑޮލަރުގެ ރޭޓުން އެ މަހެއްގައި އައިސްފައިވާ ޖުމްލަ ޓޫރިސްޓުންނަށް ޖެހޭ އަދަދު ބޭންކަކަށް ޖަމާކޮށް ރުފިޔާ އަށް މާރު ކުރަން ވާނެ ކަމަށް ވެސް ބުނެފައިވެއެވެ.
