ފަލަސްތީނުގެ ގާޒާގައި ހިންގަމުންދާ ލާއިންސާނީ ޖަރީމާތަކުގެ ކުށުގައި، އިޒްރޭލުގެ ބޮޑުވަޒީރު، ބެންޖަމިން ނަތަންޔާހޫ އާއި ކުރީގެ ޑިފެންސް މިނިސްޓަރު، ޔޮއޭވް ގަލަންޓް ހައްޔަރު ކުރަން އިންޓަނޭޝަނަލް ކްރިމިނަލް ކޯޓުން ނެރުނު އަމުރަށް ރައީސް ޑރ. މުހައްމަދު މުއިއްޒު މަރުހަބާ ވިދާޅުވެއްޖެ އެވެ.
އެ ކޯޓުން މިއަދު ނެރުނު އަމުރުގައި ބުނީ އެ ދެމީހުން ހައްޔަރު ކުރަން އަމުރު ކުރީ މިދިޔަ އަހަރުގެ އޮކްޓޫބަރުން ފެށިގެން މި އަހަރުގެ މޭ މަހާ ހަމައަށް ހިންގި ލާއިންސާނީ ޖަރީމާތަކުގެ ކުށުގައި ކަމަށެވެ.
”ކާބޯތަކެއްޗާއި ފެނާއި ބޭހާއި ބޭސްފަރުވާގެ އިތުރުން ތެލާއި ކަރަންޓުގެ ހިދުމަތް ފަދަ ދިރިހުރުމަށް ކޮންމެހެން ބޭނުންވާނެ ޒަރޫރީ އެއްޗެހިން ގާޒާގެ ރައްޔިތުން ގަސްދުގައި މަހުރޫމު ކުރުވި ކަމަށް ބެލޭނެ ޖާގަ އެބަ އޮތް،“ އެ ދެ މީހުން ހައްޔަރު ކުރަން ނެރުނު އަމުރުގައި ބުނެފައިވެ އެވެ.
މިދިޔަ އަހަރުގެ އޮކްޓޫބަރުން ފެށިގެން ގާޒާއަށް ވަދެގަނެ، އިޒްރޭލުން ހިންގަމުންދާ ނަސްލުހޭދު ކުރުމަށް 410 ދުވަސް ވެފައިވާއިރު، މިހައިތަނަށް 41،300 ފަލަސްތީނީން ވަނީ މަރުވެފަ އެވެ. އައިސީސީން ނެރުނު އަމުރުގައި ބުނެފައި ވަނީ އެމީހުންގެ މަރުގެ ޒިންމާ ނަގަން ޖެހޭނީ ނަތަންޔާހޫ އައި ގަލަންޓް ކަމަށެވެ.
އެ އަމުރާ ގުޅުވައި އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ، އައިސީސީގެ ނިންމުމަށް ރާއްޖެއިން މަރުހަބާ ކިޔާ ކަމަށާއި މިއީ ހަނގުރާމައިގެ ޖަރީމާތަކާއި އިންސާނިއްޔަތާ ހިލާފު ޖަރީމާތަކަށް ޒިންމާދާރުކުރުވުމަށް އެޅޭ މުހިންމު ފިޔަވަޅެއް ކަމަށެވެ.
”ރާއްޖެއިން އައިސީސީގެ ނިންމުމަށް އިހުތިރާމުކޮށް، ކޯޓުގެ ނިންމުން ތަންފީޒުކުރުމުގެ މުހިންމުކަން ފާހަގަކުރަން،“ އެ މަނިކުފާނު ވިދާޅުވި އެވެ.
މީގެ އިތުރުން ރައިސް ވަނީ، މެދުއިރުމަތީގެ ސުލްހައަށް ޓަކައި ބައިނަލްއަގުވާމީ ގާނޫނުތައް ނަގަހައްޓައި ފަލަސްތީނުގެ ރައްޔިތުންނަށް އިންސާފު ހޯދައިދިނުމަކީ ކޮންމެހެން ކުރަން ޖެހޭ ކަމެއްގެ ގޮތުގައި ސިފަކުރައްވައިފަ އެވެ.
އައިސީސީގެ މެންބަރު ގައުމުތަކުގެ އަދަދު 124 އަށް އަރާއިރު އެއިން ގައުމަކަށް މި އަމުރު ރައްދުވާ މީހަކު ހިނގައްޖެ ނަމަ ހައްޔަރުކުރަން ލާޒިމުވާނެ އެވެ. އެކަމަކު އެފަދަ އަމުރުތައް ތަންފީޒު ކުރުމުގެ ބާރު އައިސީސީއަކަށް ނޯވެ އެވެ.
އެމެރިކާ އާއި އިޒްރޭލަކީ ވެސް އައިސީސީގެ މެންބަރުންނެއް ނޫނެވެ. އެކަމަކު ފަލަސްތީނުން 2015 ވަނަ އަހަރު ވަނީ އައިސީސީ ބަލައިގެންފަ އެވެ.
ނަތަންޔާހޫ އާއި ގަލަންޓް ހައްޔަރުކުރަން އައިސީސީން ނެރުނު އަމުރަށް އިޒްރޭލުގެ ބައެއް އޮފިޝަލުން ވަނީ ރައްދު ދީފަ އެވެ. އިޒްރޭލުގެ އިދިކޮޅު ލީޑަރު ޔައިރް ލަޕިޑް އެކްސްގައި ކުރި ޕޯސްޓެއްގައި ވަނީ ކޯޓުގެ ނިންމުން ކުށްވެރިކުރާ ކަމަށާއި، އިޒްރޭލުން ޣައްޒާގައި ކުރަމުންދާ ހަނގުރާމައަކީ އިޒްރޭލުގެ ދެމިއޮތުމަށް ”ޓެރަރިސްޓުންނާ ދެކޮޅަށް“ ކުރާ ހަނގުރާމައެއް ކަމަށެވެ.
